Ebanghelio ni Juan 20:1-31

  • Awan nagyanna a tanem (1-10)

  • Agparang ni Jesus ken Maria Magdalena (11-18)

  • Agparang ni Jesus kadagiti adalanna (19-23)

  • Agduadua ni Tomas ngem namati met laeng (24-29)

  • Panggep daytoy a lukot (30, 31)

20  Iti umuna nga aldaw ti lawas, nasapa a napan ni Maria Magdalena iti tanem*+ bayat a nasipnget pay, ket nakitana a naikkaten ti bato a naiserra iti tanem.*+  Gapuna, nagtartaray a napan ken Simon Pedro ken iti sabali pay nga adalan, a patpatgen ni Jesus.+ Kinuna ni Maria: “Adda nangala iti Apo iti nakaitanemanna,+ ket saanmi nga ammo ti nangikabilanda.”  Gapuna, napan ni Pedro ken ti sabali pay nga adalan iti tanem.  Nagtartarayda a dua, ngem naparpartak ti sabali nga adalan ngem ni Pedro ket immuna a nakadanon iti tanem.  Simmirip ket nakitana ti nakadisso a lienso a lupot,+ ngem saan a simrek.  Nakadanon met sadiay ni Simon Pedro a simmaruno kenkuana. Simrek iti tanem ket nakitana ti nakadisso a lupot a lienso.  Ti lupot a naiputipot iti ulo ni Jesus ket saan a nailaok iti dadduma pay a lupot no di ket nalukot ken naikabil iti sabali a disso.  Idi simrek met ti sabali nga adalan nga immuna a nakadanon iti tanem, nakitana dayta ket namati iti naipadamag kadakuada.  Ta saanda pay idi a natarusan ti imbaga ti kasuratan a masapul a mapagungar ni Jesus.+ 10  Iti kasta, nagawid dagiti adalan iti balbalayda. 11  Ngem nagtalinaed a nakatakder ni Maria iti ruar ti tanem nga agsangsangit. Idi simmirip iti tanem, 12  nakitana ti dua nga anghel+ a nakabado iti puraw ken agtugtugaw iti nakaikabilan idi ti bangkay ni Jesus, maysa iti uluanan ken maysa iti sakaanan. 13  Kinunada kenkuana: “Babai, apay nga agsangsangitka?” Insungbatna: “Innalada ti Apok, ket diak ammo ti nangikabilanda.” 14  Kalpasan a naibagana dagitoy, timmaliaw ket nakitana ni Jesus a nakatakder, ngem saanna a nailasin.+ 15  Kinuna ni Jesus: “Babai, apay nga agsangsangitka? Asino ti sapsapulem?” Gapu ta impagarup ni Maria nga isu ti hardinero, kinunana: “Apo, no innalam ti bangkayna, ibagam ti nangikabilam, ta innak alaen.” 16  Insungbat ni Jesus: “Maria!” Idi timmaliaw, kinunana iti Hebreo: “Rab·boʹni!” (kayatna a sawen, “Mannursuro!”) 17  Kinuna ni Jesus: “Ibbatannak, ta diak pay immuli iti Ama. Ngem inka ibaga kadagiti kakabsatko,+ ‘Umuliak ken Amak+ ken Amayo ken iti Diosko+ ken Diosyo.’” 18  Napan ni Maria Magdalena kadagiti adalan ket impadamagna: “Nakitak ti Apo!” Imbagana met kadakuada ti imbaga ti Apo.+ 19  Idi rumabiin iti dayta nga umuna nga aldaw ti lawas, naguummong dagiti adalan iti maysa a balay ket inkandadoda dagiti ridaw ta mabutengda kadagiti Judio. Nagparang ni Jesus ket kinunana: “Maadda koma kadakayo ti talna.”+ 20  Kalpasanna, impakitana dagiti imana ken ti bakrangna+ ket naragsakan dagiti adalan iti pannakakitada iti Apo.+ 21  Kinuna manen ni Jesus: “Maadda koma kadakayo ti talna.+ No kasano nga imbaonnak ti Ama,+ ibaonkayo met.”+ 22  Idi naibaganan daytoy, pinuyotanna ida ket kinunana: “Awatenyo ti nasantuan nga espiritu.+ 23  No pakawanenyo ti basol dagiti tattao, mapakawanda; no saanyo a pakawanen ti basolda, saanda a mapakawan.” 24  Ngem idi nagparang ni Jesus, awan ni Tomas+ a maysa kadagiti Sangapulo ket Dua ken maawagan iti Singin. 25  Gapuna, imbaga kenkuana ti dadduma nga adalan: “Nakitami ti Apo!” Ngem kinunana: “Saanak a pulos mamati no saanko a makita dagiti abut* ti lansa iti imana ken maiserrek ti ramayko kadagita ken no saanko a maiserrek ti imak iti bakrangna.”+ 26  Walo nga aldaw kalpasanna, naguummong manen dagiti adalanna iti uneg ti balay, ket addan ni Tomas. Nupay nakakandado dagiti ridaw, nagparang ni Jesus ket kinunana: “Maadda koma kadakayo ti talna.”+ 27  Kalpasanna, kinunana ken Tomas: “Kitaem ken iggamam dagiti imak ken ti bakrangko tapno isardengmon ti agduadua* ket mamatikan.” 28  Kinuna ni Tomas: “Apok, Diosko!” 29  Insungbat ni Jesus: “Mamatika kadin gapu ta nakitanak? Naragsak dagidiay mamati nupay saandak a nakita.” 30  Adu pay a pagilasinan ti inaramid ni Jesus iti sanguanan dagiti adalan a saan a naisurat iti daytoy a lukot.+ 31  Ngem naisurat dagitoy tapno mamatikayo a ni Jesus ti Kristo, ti Anak ti Dios, ket no mamatikayo, maaddaankayto iti biag babaen ti naganna.+

Footnotes

Wenno “pakalaglagipan a tanem.”
Wenno “pakalaglagipan a tanem.”
Wenno “marka.”
Lit., “saan a mamatpati.”