Ebanghelio ni Juan 16:1-33
16 “Imbagak dagitoy kadakayo tapno saankayo a maitibkol.
2 Ilaksiddakayto dagiti tattao iti sinagoga.+ Kinapudnona, umayto ti tiempo nga ipagarup dagiti mangpapatay kadakayo+ a mangipapaayda iti Dios iti sagrado a panagserbi.
3 Ngem aramidendanto dagitoy gapu ta saandak nga am-ammo wenno ti Ama.+
4 Nupay kasta, imbagak dagitoy tapno malagipyo inton mapasamakda.+
“Saanko nga imbaga dagitoy a nasapsapa ta addaak pay kadakayo.
5 Ita, agsubliakon iti Daydiay nangibaon kaniak;+ ngem awan kadakayo ti nangisaludsod, ‘Sadino ti papanam?’
6 Ngem gapu ta imbagak dagitoy kadakayo, napno iti ladingit dagiti pusoyo.+
7 Kinapudnona, pagimbaganyo ti ipapanawko. Ta no saanak a pumanaw, saan nga umay kadakayo ti katulongan;+ ngem no pumanawak, ibaonkonto kadakayo.
8 Ket inton umay, ipakitana iti lubong ti nalawag a pammaneknek maipapan iti basol ken iti kinalinteg ken iti panangukom:
9 umuna, maipapan iti basol,+ ta saanda a nangipakita iti pammati kaniak;+
10 kalpasanna, maipapan iti kinalinteg, ta mapanak iti Ama ket saandakton a makita;
11 sa maipapan iti panangukom, ta naukomen ti agturay iti daytoy a lubong.+
12 “Adu pay ti ibagak kadakayo, ngem saanyo a matarusan dagita iti agdama.
13 Ngem inton umay daydiay,* ti espiritu a mangipakaammo iti kinapudno,+ idalannakayto tapno naan-anay a matarusanyo ti kinapudno, ta saan nga agsao iti bukodna a nakem, no di ket sawenna dagiti mangngegna iti Dios, ken ibagananto dagiti mapasamak iti masanguanan.+
14 Ipadayagnakto daydiay,+ ta ibagananto kadakayo dagiti nangngegna kaniak.+
15 Amin a kukua ti Ama ket kukuak,+ isu a kinunak nga ibagananto kadakayo dagiti nangngegna kaniak.
16 Iti din agbayag, saandakton a makita,+ ngem iti di met laeng agbayag, makitadakto.”
17 Gapuna, kinuna ti sumagmamano kadagiti adalanna: “Ania ti kayat a sawen ti imbagana nga, ‘Iti din agbayag, saandakton a makita, ngem iti di met laeng agbayag, makitadakto,’ ken, ‘ta mapanak iti Ama’?”
18 Kinunada pay: “Ania ti kayat a sawen ti imbagana nga ‘iti din agbayag’? Ditay maawatan ti ibagbagana.”
19 Ammo ni Jesus a kayatda ti agsaludsod, isu a kinunana: “Agsisinnaludsodkayo kadi gapu ta imbagak: ‘Iti din agbayag, saandakton a makita, ngem iti di met laeng agbayag, makitadakto’?
20 Pudno unay kunak kadakayo, agsangit ken agdung-awkayto, ngem agrag-onto ti lubong; agladingitkayto, ngem masuktanto dayta iti rag-o.+
21 No agpasikalen ti maysa a babai, makarikna iti ut-ot* ta dimtengen ti oras a panaganakna; ngem no nakaanaken, masukatanen iti rag-o ti panagrigatna ta nakitanan ti anakna.
22 Kasta met kadakayo, agladingitkayo ita ngem makitakayto manen ket agrag-okayto,+ ken awanto ti makaikkat iti rag-oyo.
23 Iti dayta nga aldaw, awanton ti isaludsodyo kaniak. Pudno unay kunak kadakayo, patganto ti Ama ti aniaman+ a kiddawenyo iti naganko.+
24 Agingga ita, awan pay ti kiniddawyo iti naganko. Agkiddawkayo ket mapatganto, tapno naan-anay ti rag-oyo.
25 “Imbagak dagitoy babaen kadagiti ilustrasion. Ngem dumtengto ti tiempo a saanakon nga agsao kadakayo babaen ti ilustrasion, no di ket silalawag nga agsaoak maipapan iti Ama.
26 Iti dayta nga aldaw, agkiddawkayto iti Ama iti naganko; ngem saanko nga ibagbaga nga agkiddawakto para kadakayo.
27 Ta ay-ayatennakayo ti Ama, gapu ta ay-ayatendak+ ken mamatikayo nga immayak kas pannakabagi ti Dios.+
28 Immayak ditoy lubong kas pannakabagi ti Ama. Ita, panawakon ti lubong ket agsubliak iti Ama.”+
29 Kinuna dagiti adalanna: “Apo, maawatanmin ti ibagbagam ta saanka a nagusar iti ilustrasion.
30 Maawatanmin nga ammom ti amin ket saanen a kasapulan nga adda agsaludsod kenka. Isu a mamatikami a naggapuka iti Dios.”
31 Insungbat ni Jesus: “Mamatikayo kadin?
32 Adtoy! Um-umayen ti oras, ken nakaas-asideg daytan. Agkamangto ti tunggal maysa kadakayo iti balayna ket baybay-andak nga agmaymaysa.+ Ngem saanak nga agmaymaysa, ta kaduak ti Ama.+
33 Imbagak dagitoy tapno maaddaankayo iti talna babaen kaniak.+ Agrigatkayto ditoy lubong, ngem patibkerenyo ti pakinakemyo! Naparmekko ti lubong.”+
Footnotes
^ Ti sao a “daydiay” iti ber. 13 ken 14 ket isu ti “katulongan” iti ber. 7. Inusar ni Jesus ti sao a “katulongan” a kasla persona a mangirepresentar iti nasantuan nga espiritu (maysa a puersa, saan a persona).
^ Lit., “agladingit.”
