Ebanghelio ni Juan 11:1-57

  • Natay ni Lazaro (1-16)

  • Liwliwaen ni Jesus da Marta ken Maria (17-37)

  • Pagungaren ni Jesus ni Lazaro (38-44)

  • Plano a mangpapatay ken Jesus (45-57)

11  Nagsakit ti maysa a lalaki nga agnagan Lazaro a taga-Betania, iti ili a pagnanaedan ni Maria ken ti kabsatna a ni Marta.+  Isu ti Maria a nangibukbok iti nabanglo a lana iti saka ti Apo ken pinunasanna dayta babaen ti buokna;+ masakit idi ni Lazaro a kabsatna.  Gapuna, impaibaga dagiti kakabsat ni Lazaro ken ni Jesus: “Apo, masakit ti patpatgem a gayyem.”  Ngem kinuna ni Jesus idi nangngegna dayta: “Saan nga ipapatay ti pagtungpalan daytoy a sakit no di ket pakaidaydayawan ti Dios+ tapno maipadayag ti Anak ti Dios.”  Ay-ayaten ni Jesus da Marta, Maria, ken Lazaro.  Ngem idi nadamagna a masakit ni Lazaro, nagtalinaed pay iti dua nga aldaw iti lugar nga ayanna.  Kalpasanna, imbagana kadagiti adalan: “Mapantayo manen idiay Judea.”  Kinuna dagiti adalan: “Rabbi,+ mapanka kadi manen? Saan kadi a nabiit pay daydi panangubor koma kenka+ dagiti umili ti Judea?”  Insungbat ni Jesus: “Saan kadi nga adda 12 nga oras iti agmalem?+ Ti magna iti aldaw, saan a maitibkol ta makitkitana ti lawag iti daytoy a lubong. 10  Ngem ti magna iti rabii, maitibkol ta awan ti lawag kenkuana.” 11  Idi naibaganan dagitoy, kinunana pay: “Matmaturog ni Lazaro a gayyemtayo,+ ngem mapanko riingen.” 12  Gapuna, kinuna dagiti adalan: “Apo, no matmaturog laeng, umimbagto.” 13  Ti kayat a sawen ni Jesus ket natayen ni Lazaro ngem impagarupda a gagangay a pannaturog ti tuktukoyenna. 14  Inlawlawag ni Jesus: “Natayen ni Lazaro,+ 15  ngem imbag laengen ta awanak idi sadiay gapu ta ti aramidek ket mangpabileg iti pammatiyo. Mapantayo iti ayanna.” 16  Kinuna ni Tomas, a naawagan iti Singin, kadagiti padana nga adalan: “Kumuyogtayo uray mairamantayo a matay.”+ 17  Idi simmangpet ni Jesus, uppat nga aldawen ni Lazaro iti tanem.* 18  Agarup dua a milia* laeng ti kaadayo ti Betania iti Jerusalem. 19  Adu a Judio ti napan nangliwliwa kada Marta ken Maria gapu iti ipapatay ti kabsatda. 20  Simmabat ni Marta idi nadamagna a sumungsungad ni Jesus; ngem nagbati ni Maria+ a nakatugaw idiay balayda. 21  Kinuna ni Marta: “Apo, no addaka koma idi ditoy, saan koma a natay ti kabsatko. 22  Ngem mamatiak latta nga aniaman a kiddawem iti Dios, patgannanto.” 23  Kinuna ni Jesus: “Agbiagto ti kabsatmo.” 24  Insungbat ni Marta: “Ammok nga agbiagto inton panagungar+ iti maudi nga aldaw.” 25  Kinuna ni Jesus: “Siak ti panagungar ken ti biag.+ Ti agtultuloy a mangipakita iti pammati kaniak, uray no matay, agbiagto; 26  ken asinoman a sibibiag nga agtultuloy a mangipakita iti pammati kaniak, saanto a matay.+ Mamatika kadi iti daytoy?” 27  Insungbat ni Marta: “Wen, Apo, mamatiak a sika ti Kristo, ti Anak ti Dios, daydiay umay ditoy lubong.” 28  Idi naibaganan daytoy, pimmanaw ket inayabanna ni Maria a kabsatna. Inyarasaasna: “Addan ti Mannursuro+ ket damdamagennaka.” 29  Idi nangngeg daytoy ni Maria, timmakder a dagus ket napan ken Jesus. 30  Saan pay idi a nakadanon ni Jesus iti ili, ta adda pay laeng iti nangsabatan kenkuana ni Marta. 31  Adda idi dagiti Judio iti balay da Maria a mangliwliwa kenkuana. Idi nakitada a timmakder ken agdardaras a rimmuar, sinurotda ta impagarupda a mapan agsangit idiay tanem.*+ 32  Idi nakadanon ni Maria iti ayan ni Jesus, nagrukob iti sakaananna ket kinunana: “Apo, no addaka koma idi ditoy, saan koma a natay ti kabsatko.” 33  Idi nakita ni Jesus nga agsangsangit ni Maria ken dagiti Judio a kimmuyog kenkuana, nagasug ti pusona* ket naladingitan. 34  Insaludsodna: “Sadino ti nakaitanemanna?” Insungbatda: “Apo, umaymo kitaen.” 35  Nagsangit ni Jesus.+ 36  Gapuna, kinuna dagiti Judio: “Kitaenyo ti napalalo a panangipategna kenkuana!” 37  Ngem kinuna ti dadduma: “No napaimbagna ti bulsek a lalaki,+ saan kadi a kabaelanna met koma a linapdan ti ipapatay ni Lazaro?” 38  Nagasug manen ni Jesus idi napan iti tanem.* Kinapudnona, maysa dayta a kueba a naserraan iti bato. 39  Kinuna ni Jesus: “Ikkatenyo ti bato.” Kinuna met ni Marta, a kabsat ti natay: “Apo, nabangsiten ta uppat nga aldawen.” 40  Insaludsod ni Jesus: “Saanko aya nga imbaga kenka a no mamatika, makitam ti dayag ti Dios?”+ 41  Gapuna, inikkatda ti bato. Timmangad ni Jesus+ ket kinunana: “Ama, agyamanak ta dinengngegnak. 42  Ammok a kanayon a denggennak; ngem agsaoak maigapu kadagitoy a tattao tapno mamatida nga imbaonnak.”+ 43  Idi naibaganan dagitoy, impukkawna: “Lazaro, rummuarka!”+ 44  Rimmuar ti tao a natayen a naputipotan iti lupot dagiti saka, ima, ken rupana. Kinuna ni Jesus: “Ikkatenyo dagiti naiputipot kenkuana ket bay-anyo a magna.” 45  Gapuna, namati ti adu a Judio a kimmuyog ken Maria ken nakakita iti inaramid ni Jesus,+ 46  ngem napan ti dadduma kadagiti Fariseo ket imbagada ti inaramid ni Jesus. 47  Naguummong dagiti panguluen a papadi ken Fariseo iti Sanhedrin ket kinunada: “Ania ti aramidentayo, ta adu a pagilasinan ti ar-aramiden daytoy a tao?+ 48  No baybay-antayo, mamatinton kenkuana ti amin, ket agawento dagiti Romano ti lugartayo* ken ti nasiontayo.” 49  Ngem kinuna ti maysa kadakuada a ni Caifas,+ ti nangato a padi iti dayta a tawen: “Awan a pulos ti ammoyo. 50  Saanyo aya nga ammo a nasaysayaat a matay ti maysa a tao para iti adu a tattao ngem iti madadael ti intero a nasion?” 51  Saan a ti bukodna a kapanunotan ti imbagana, ngem gapu ta isu ti nangato a padi iti dayta a tawen, impadtona a matay ni Jesus para kadagiti Judio, 52  ken saan laeng a para kadagiti Judio no di ket tapno urnongenna dagiti naiwarawara nga annak ti Dios. 53  Manipud iti dayta nga aldaw, nagtutulagandan a patayen. 54  Gapuna, saanen a nagnagna ni Jesus iti tengnga dagiti Judio, no di ket pimmanaw a napan idiay let-ang, iti siudad a naawagan Efraim,+ ken nagyan sadiay a kaduana dagiti adalan. 55  Asideg idin ti Paskua+ dagiti Judio, ket adu a tattao iti away ti napan idiay Jerusalem sakbay ti Paskua tapno dalusanda ti bagbagida kas imbilin ti Linteg. 56  Sapsapulenda ni Jesus ket ibagbagada iti maysa ken maysa bayat a nakatakderda iti aglawlaw ti templo: “Iti panagkunayo, umay ngata makipiesta?” 57  Ngem imbilin dagiti panguluen a papadi ken Fariseo a no adda makakita ken Jesus, ibagana tapno tiliwenda.*

Footnotes

Wenno “pakalaglagipan a tanem.”
Agarup 3 km. Lit., “agarup 15 estadia.” Kitaem ti App. B14.
Wenno “pakalaglagipan a tanem.”
Lit., “espirituna.”
Wenno “pakalaglagipan a tanem.”
Kayatna a sawen, ti templo.
Wenno “arestuenda.”