Ebanghelio ni Juan 12:1-50

  • Mangibukbok ni Maria iti lana kadagiti saka ni Jesus (1-11)

  • Naballigi nga iseserrek ni Jesus (12-19)

  • Ipakpakauna ni Jesus ti ipapatayna (20-37)

  • Saan a mamati dagiti Judio kas kaitungpalan ti padto (38-43)

  • Immay ni Jesus a mangisalakan iti lubong (44-50)

12  Innem nga aldaw sakbay ti Paskua, nakadanon ni Jesus idiay Betania, a pagnanaedan ni Lazaro+ a pinagungarna.  Gapuna, insaganaanda iti pangrabii. Ni Marta ti paraidasar iti taraon,+ ngem maysa ni Lazaro kadagiti nangan* a kadua ni Jesus.  Nangala ni Maria iti maysa a libra* a nabanglo a lana, nakanginngina a puro a nardo, ket imbukbokna dayta kadagiti saka ni Jesus sa pinunasanna babaen ti buokna. Iti kasta, nagayamuom ti nabanglo a lana+ iti intero a balay.  Ngem kinuna ni Judas Iscariote,+ a maysa kadagiti adalanna a dandanin mangtraidor kenkuana:  “Apay a di pay la koma nailako daytoy a nabanglo a lana iti 300 a denario* sa naited kadagiti napanglaw?”  Imbagana daytoy, saan a gapu ta maseknan kadagiti napanglaw, no di ket gapu ta mannanakaw. Isu idi ti paraiggem iti kuarta ket naruam nga agala iti dayta.  Kinuna ni Jesus maipapan ken Maria: “Bay-anyo a mangaramid iti daytoy kas panagsagana para iti aldaw a pannakaitabonko.+  Ta kanayon a kaduayo dagiti napanglaw,+ ngem saan a kanayon a kaduadak.”+  Naammuan ti adu a Judio nga adda sadiay ni Jesus, isu a napanda kinita agraman ni Lazaro a pinagungarna.+ 10  Nagtutulag dagiti panguluen a papadi a patayenda met ni Lazaro, 11  ta isu ti makagapu nga adu a Judio ti napan sadiay ket namatida ken Jesus.+ 12  Iti simmaruno nga aldaw, adu a tattao a nakipiesta ti nakadamag nga agturturong ni Jesus idiay Jerusalem. 13  Nangalada kadagiti sanga ti kayo a palma sa rimmuarda a sumabet kenkuana, ket impukpukkawda: “Maisalakanka koma! Mabendisionan koma daydiay umay iti nagan ni Jehova,*+ ti Ari ti Israel!”+ 14  Idi nakasarak ni Jesus iti urbon nga asno, nagsakay iti dayta,+ kas iti naisurat: 15  “Dika agbuteng, anak a babai ti Sion. Kitaem! Um-umayen kenka ti arim, a nakasakay iti urbon nga asno.”+ 16  Saan idi a maawatan daytoy dagiti adalanna, ngem idi naipadayagen ni Jesus,+ nalagipda a ti inaramidda ket ti mismo a naisurat maipapan kenkuana.+ 17  Dagiti tattao a nakakita iti panangawag ni Jesus ken ni Lazaro iti tanem*+ ken iti panangpagungarna kenkuana intultuloyda nga impadamag ti napasamak.+ 18  Isu a simmabat kenkuana ti adu a tattao, ta nadamagda daytoy a pagilasinan nga inaramidna. 19  Gapuna, imbaga dagiti Fariseo: “Makitayo? Awanen ti maaramidantayo. Simmuroten kenkuana ti intero a lubong!”+ 20  Adda idi sumagmamano a Griego a napan nakipiesta tapno agdaydayawda iti Dios. 21  Inasitganda ni Felipe+ a taga-Betsaida idiay Galilea ket kiniddawda: “Apo, kayatmi a makita ni Jesus.” 22  Imbaga dayta ni Felipe ken ni Andres, sa imbaga met dayta da Andres ken Felipe ken ni Jesus. 23  Ngem insungbat ni Jesus: “Dimtengen ti oras a maipadayag ti Anak ti tao.+ 24  Pudno unay kunak kadakayo, no saan a matnag iti daga ti maysa a bukel ti trigo sa matay, agtalinaed a maysa laeng a bukel; ngem no matay,+ agbunga iti adu. 25  Ti mangipateg iti biagna,* madadaelnanto dayta; ngem ti manggura iti biagna*+ iti daytoy a lubong, agbiagto iti agnanayon.+ 26  Ti mayat nga agserbi kaniak, sumurot kaniak, ta no sadino ti ayanko, addanto met sadiay.+ Ti mayat nga agserbi kaniak, padayawanto ti Ama. 27  Ita, mariribukanak,*+ ket ania ti ibagak? Ama, isalakannak iti daytoy nga oras.+ Ngem ammok a daytoy ti makagapu nga immayak para iti daytoy nga oras. 28  Ama, padayagem ti naganmo.” Kalpasanna, kuna ti timek+ manipud langit: “Pinadayagko dayta ket padayagekto manen.”+ 29  Nangngeg dayta dagiti tattao nga agtaktakder sadiay ket imbagada a naggurruod. Kinuna met ti dadduma: “Adda anghel a nakisarita kenkuana.” 30  Insungbat ni Jesus: “Nangngegyo daytoy a timek, saan a maigapu kaniak, no di ket maigapu kadakayo. 31  Mauk-ukomen daytoy a lubong, ket mapapanawto+ ti agturay iti daytoy a lubong.+ 32  Ngem inton maibitinak,+ maguyugoyto nga umasideg kaniak ti amin a kita ti tattao.” 33  Ibagbagana daytoy tapno ipakaammona nga asidegen ti ipapatayna.+ 34  Gapuna, kinuna dagiti tattao: “Nangngegmi iti Linteg nga agtalinaed iti agnanayon ti Kristo.+ Apay ngarud nga ibagbagam a masapul a maibitin ti Anak ti tao?+ Asino daytoy nga Anak ti tao?” 35  Insungbat ni Jesus: “Bassit laengen a tiempo a kaduayo ti silaw. Magnakayo bayat nga adda kadakayo ti silaw, tapno saannakayo a maparmek ti sipnget. Ti magna iti kasipngetan saanna nga ammo ti papananna.+ 36  Bayat nga adda kadakayo ti silaw, ipakitayo ti pammatiyo iti silaw, tapno agbalinkayo nga annak ti lawag.”+ Idi naibagan ni Jesus dagitoy, pimmanaw ket naglemmeng. 37  Nupay adu a pagilasinan ti inaramidna iti sanguananda, saanda a namati kenkuana. 38  Iti kasta, natungpal daytoy nga impadto ni propeta Isaias: “Jehova,* asino ti namati iti imbagami?*+ Ket asino ti nangipakitaan ni Jehova* iti pannakabalinna?”+ 39  Imbaga manen ni Isaias no apay a saanda a namati: 40  “Binulsekna dagiti matada ken pinatangkenna dagiti pusoda tapno saan a makakita ti matada ken saan a makatarus ti pusoda, ket agbalbaliwda ken paimbagek ida.”+ 41  Imbaga dagitoy ni Isaias maipapan iti Kristo ta nakitana ti dayagna.+ 42  Adu ti namati kenkuana,+ a pakairamanan dagiti panguluen dagiti Judio, ngem saanda a kayat nga ipakita dayta ta mabutengda kadagiti Fariseo, amangan no mailaksidda iti sinagoga;+ 43  ta kaykayatda ti pammadayaw dagiti tattao ngem ti pammadayaw ti Dios.+ 44  Ngem imbaga ni Jesus iti napigsa: “Ti mamati kaniak saan laeng a siak ti pinatina, no di ket daydiay pay nangibaon kaniak;+ 45  ket ti makakita kaniak nakitana metten Daydiay nangibaon kaniak.+ 46  Immayak kas silaw ditoy lubong,+ tapno saan nga agtalinaed iti sipnget ti asinoman a mamati kaniak.+ 47  Ngem saanko nga ukomen ti asinoman a makangngeg iti sasaok a saan a mangtungpal kadagita; ta saanak nga immay mangukom iti lubong no di ket tapno isalakanko ti lubong.+ 48  Adda mangukom iti saan a dumngeg kaniak ken saan a mangawat iti sasaok. Ti sao nga imbagak ti mangukomto kenkuana iti maudi nga aldaw. 49  Ta saanak a nagsao iti bukodko a nakem, no di ket imbilin ti Ama a nangibaon kaniak no ania ti ibagak ken sawek.+ 50  Ammok a ti bilinna ket makaited iti biag nga agnanayon.+ Isu a ti aniaman nga ibagak, dayta ti imbilin ti Ama nga ibagak.”+

Footnotes

Wenno “nagsadag iti lamisaan.”
Kayatna a sawen, libra ti Roma. Agarup 327 g. Kitaem ti App. B14.
Kitaem ti App. B14.
Kitaem ti App. A5.
Wenno “pakalaglagipan a tanem.”
Wenno “kararuana.”
Wenno “kararuana.”
Wenno “mariribukan ti kararuak.”
Kitaem ti App. A5.
Wenno “impadamagmi?”
Kitaem ti App. A5.