Ebanghelio ni Juan 10:1-42
10 “Pudno unay kunak kadakayo, ti sumrek iti pagaponan ti karnero a saan a magna iti ruangan no di ket kumalay-at iti alad, dayta ket mannanakaw.+
2 Ngem ti sumrek iti ruangan isu ti pastor dagiti karnero.+
3 Isu ket ilukatan ti parabantay iti ruangan,+ ken denggen dagiti karnero ti timekna.+ Awaganna dagiti karnerona iti naganda ken iruarna ida iti pagaponan.
4 No mairuarna aminen a karnerona, mapan iti sanguananda, ket sumurotda kenkuana, ta mailasinda ti timekna.
5 Pulos a saanda a sumurot iti estranghero no di ket itarayanda, ta saanda a mailasin ti timek dagiti estranghero.”
6 Imbaga kadakuada ni Jesus daytoy nga ilustrasion, ngem saanda a naawatan ti kayatna a sawen.
7 Gapuna, kinuna manen ni Jesus: “Pudno unay kunak kadakayo, siak ti ruangan a pagserkan dagiti karnero.+
8 Mannanakaw ti amin a mangibaga nga isuda ti pudno a pastor; ngem saan ida a denggen dagiti karnero.
9 Siak ti ruangan. Asinoman a sumrek babaen kaniak maisalakanto; mabalin a sumrek ken rummuar ket makabirokto iti pagaraban.+
10 Umay ti mannanakaw tapno agtakaw, pumatay, ken mangdadael.+ Ngem immayak tapno agbiag dagiti karnero ken maaddaanda iti biag nga agnanayon.
11 Siak ti nasayaat a pastor;+ ti nasayaat a pastor itedna ti biagna* para kadagiti karnero.+
12 Ti matangdanan a mangaywan kadagiti karnero ket saan a pastor. No makitana nga umay ti lobo, baybay-an ken itarayanna dagiti karnero—ket papatayen ida ti lobo ken mawarawarada—
13 ta natangdanan laeng ken saan a maseknan kadagiti karnero.
14 Siak ti nasayaat a pastor. Am-ammok dagiti karnerok ket am-ammodak met dagiti karnerok,+
15 no kasano nga am-ammonak ti Ama+ ken am-ammok met ti Ama. Itedko ti biagko* para kadagiti karnero.+
16 “Adda pay sabsabali a karnerok, nga awan iti daytoy a pagaponan;+ masapul nga iyaponko met ida, ket denggendanto ti timekko. Agbalindanto a maymaysa nga arban nga aywanan ti maymaysa a pastor.+
17 Ay-ayatennak ti Ama+ gapu ta itedko ti biagko,*+ tapno maaddaanak manen iti biag.
18 Awan ti tao a makaala iti biagko, no di ket situtulok nga itedko dayta. Adda autoridadko a mangited iti biagko, ken adda autoridadko a maaddaan manen iti dayta.+ Imbilin daytoy ni Amak.”
19 Nagsusupiat manen dagiti Judio+ gapu kadagitoy nga imbagana.
20 Adu kadakuada ti nangibaga: “Adda demonio dayta a tao ken agmauyong! Apay a dumdumngegkayo kenkuana?”
21 Kuna met ti dadduma: “Saan a kasta ti panagsasao ti naluganan iti demonio. Kabaelan aya ti demonio a luktan dagiti mata ti bulsek a tao?”
22 Madama idi ti Piesta ti Dedikasion idiay Jerusalem. Panawen idi ti lam-ek,
23 ket magmagna ni Jesus idiay templo, iti kolonada ni Solomon.+
24 Inaribungbongan dagiti Judio ket kinunada: “Kaanonto nga ibagam kadakami* ti pudpudno maipapan kenka? No sika ti Kristo, ibagamon.”
25 Insungbat ni Jesus: “Imbagakon, ngem saankayo a mamati. Dagiti inaramidko iti nagan ni Amak ti mangsaksi iti maipapan kaniak.+
26 Ngem saankayo a mamati, ta saan a dakayo ti karnerok.+
27 Denggen dagiti karnerok ti timekko, ket am-ammok ida, ken surotendak.+
28 Ikkak ida iti biag nga agnanayon,+ ket saandanto a pulos madadael, ken awanto ti mangagaw kadakuada iti imak.+
29 Napatpateg ti inted kaniak ti Amak ngem iti amin a banag, ket awan ti makaagaw kadakuada iti ima ti Ama.+
30 Siak ken ti Ama maymaysakami.”*+
31 Nangpidut manen dagiti Judio kadagiti bato tapno uborenda.
32 Kinuna ni Jesus: “Nagadu ti impakitak kadakayo a nasayaat nga aramid nga imbilin ti Ama. Ania kadagita ti panguboranyo kaniak?”
33 Insungbat dagiti Judio: “Saan a dagiti nasayaat nga aramid ti makagapu nga uborendaka no di ket agsasaoka maibusor iti Dios;+ ta ibagbagam a maysaka a dios idinto ta taoka.”
34 Imbaga ni Jesus: “Saan aya a naisurat iti Lintegyo, ‘Kinunak: “Dakayo ket dios”’?*+
35 No inawaganna a ‘dios’+ dagiti kinondenar ti saona—ket saan a mabalin a baliwan ti kasuratan—
36 apay ngarud nga ibagayo kaniak, siak a pinagbalin ti Ama kas nasantuan ken imbaonna ditoy lubong, ‘Agsasaoka maibusor iti Dios,’ gapu ta kinunak, ‘Siak ti Anak ti Dios’?+
37 No saanko nga aramiden ti ipapaaramid ni Amak, saandak a patien.
38 Ngem no aramidek dagita, uray no saandak a patien, patienyo koma dagiti aramidko,+ tapno maammuanyo ken agtultuloy a maammuanyo a ti Ama ket naikaykaysa kaniak ken naikaykaysaak iti Ama.”+
39 Gapuna, inkagumaanda manen a tiliwen, ngem nakalibas.
40 Napan manen ni Jesus iti ballasiw ti Jordan, iti lugar a nangbabautisaran idi ni Juan,+ ket nagyan sadiay.
41 Adu a tattao ti napan kenkuana ket kinunada: “Awan ti pagilasinan nga inaramid ni Juan, ngem pudno amin nga imbagana maipapan iti daytoy a tao.”+
42 Adu ti namati ken Jesus sadiay.
