Idugang ang Diosnon nga Debosyon sa Inyo Pagbatas
Idugang ang Diosnon nga Debosyon sa Inyo Pagbatas
“Idugang sa inyo pagtuo . . . ang pagbatas, sa inyo pagbatas ang diosnon nga debosyon.”—2 PEDRO 1:5, 6.
1, 2. (a) Ano nga sahi sang pagtubo ang ginapaabot sa isa ka bata? (b) Daw ano ka importante ang espirituwal nga pagtubo?
IMPORTANTE ang pagtubo sa isa ka bata, apang indi lamang sa pisikal. Ginapaabot man nga magatubo sia sa mental kag sa emosyon. Sa ulihi, dulaon na sang bata ang iya binatabata nga mga padugi kag mangin hamtong nga lalaki ukon babayi. Ginpatuhuyan ini ni apostol Pablo sang magsulat sia: “Sang bata pa ako, nagahambal ako subong sang bata, nagahunahuna subong sang bata, nagapangatarungan subong sang bata; apang karon nga nangin hamtong nga tawo na ako, ginsikway ko ang mga kinabatasan sang bata.”—1 Corinto 13:11.
2 Ginhatagan sing importansia sang mga pulong ni Pablo ang espirituwal nga pagtubo. Dapat mag-uswag ang mga Cristiano gikan sa espirituwal nga pagkalapsag pakadto sa ‘pagkahamtong sa mga ikasarang sa paghangop.’ (1 Corinto 14:20) Dapat nila panikasugan nga malab-ot ang “talaksan sang kataason sang kabug-usan ni Cristo.” Sa amo indi na sila “mga bata, nga ginabolabola sang mga balod kag ginapalidpalid sang tagsa ka hangin sang panudlo.”—Efeso 4:13, 14.
3, 4. (a) Ano ang dapat naton himuon agod mangin hamtong sa espirituwal? (b) Anong diosnon nga mga kinaiya ang dapat naton ipakita, kag daw ano ini ka importante?
3 Paano kita mangin hamtong sa espirituwal? Samtang ang pisikal nga pagtubo natural lang nga nagakatabo sa normal nga mga kahimtangan, kinahanglan ang pagpanikasog agod magtubo sa espirituwal. Nagasugod ini sa pagtigayon sing sibu nga ihibalo sa Pulong sang Dios kag paghikot nahisanto sa aton natun-an. (Hebreo 5:14; 2 Pedro 1:3) Bangod sini, mapakita naton ang diosnon nga mga kinaiya. Subong sang nanuhaytuhay nga mga aspekto sang pisikal nga pagtubo, sa masami dungan ang pagtubo sang diosnon nga mga kinaiya. Si apostol Pedro nagsulat: “Subong sabat, paagi sa inyo pagdugang sing tanan nga hanuot nga panikasog, idugang sa inyo pagtuo ang kaligdong, sa inyo kaligdong ang ihibalo, sa inyo ihibalo ang pagpugong sa kaugalingon, sa inyo pagpugong sa kaugalingon ang pagbatas, sa inyo pagbatas ang diosnon nga debosyon, sa inyo diosnon nga debosyon ang utudnon nga pagpalangga, sa inyo utudnon nga pagpalangga ang gugma.”—2 Pedro 1:5-7.
4 Ang tagsa ka kinaiya nga ginlista ni Pedro importante, kag wala sing puwede dulaon. Nagsiling pa sia: “Kon ining mga butang yara sa inyo kag nagabugana, magapugong ini sa inyo nga mangin di-aktibo ukon di-mabungahon may kaangtanan sa sibu nga ihibalo tuhoy sa aton Ginuong Jesucristo.” (2 Pedro 1:8) Magakonsentrar kita sa kinahanglanon nga idugang ang diosnon nga debosyon sa aton pagbatas.
Kinahanglan ang Pagbatas
5. Ngaa dapat kita magbatas?
5 Gin-angot ni Pedro kag ni Pablo ang diosnon nga debosyon sa pagbatas. (1 Timoteo 6:11) Ang pagbatas indi lamang ang pagpakita sing kabakod sa idalom sang kabudlayan kag ang pagpabilin nga malig-on. Nagadalahig ini sang pagpailob, kaisog, kag kalig-on, nga wala nagakadula ang paglaum kon nagaatubang sang mga pagtilaw, balagbag, pagsulay, ukon paghingabot. Bangod nagakabuhi kita nga may “diosnon nga debosyon may kaangtanan kay Cristo Jesus,” pagahingabuton gid kita. (2 Timoteo 3:12) Dapat kita magbatas agod mapamatud-an naton ang aton gugma kay Jehova kag mapalambo ang mga kinaiya nga kinahanglanon agod maluwas. (Roma 5:3-5; 2 Timoteo 4:7, 8; Santiago 1:3, 4, 12) Kon wala sing pagbatas, indi naton matigayon ang kabuhi nga walay katapusan.—Roma 2:6, 7; Hebreo 10:36.
6. Ano ang kahulugan sang pagbatas tubtob sa katapusan?
6 Bisan pa maayo ang panugod naton, ang importante sa ulihi amo nga nagbatas kita. Si Jesus nagsiling: “Sia nga nakabatas tubtob sa katapusan amo sia ang maluwas.” (Mateo 24:13) Huo, dapat kita magbatas tubtob sa katapusan, katapusan man ina sang aton kabuhi karon ukon katapusan sining malaut nga sistema sang mga butang. Ano man ang matabo, dapat naton huptan ang aton integridad sa Dios. Apang, kon indi naton pag-idugang ang diosnon nga debosyon sa aton pagbatas, indi naton mapahamut-an si Jehova, kag indi naton matigayon ang kabuhi nga walay katapusan. Apang ano ang diosnon nga debosyon?
Kon Ano ang Kahulugan sang Diosnon nga Debosyon
7. Ano ang diosnon nga debosyon, kag ginapahulag kita sini nga himuon ang ano?
7 Ang diosnon nga debosyon amo ang daku nga pagtahod, pagsimba, kag pag-alagad sang isa kay Jehova nga Dios bangod sang katutom sa iya bug-os uniberso nga pagkasoberano. Agod mapakita ang diosnon nga debosyon kay Jehova, kinahanglan naton ang sibu nga ihibalo tuhoy sa iya kag sa iya mga dalanon. Dapat naton makilala ang Dios sing personal, sing suod. Magapahulag ini sa aton nga palambuon ang tinagipusuon nga kaangtanan sa iya, nga makita sa aton mga buhat kag pagkabuhi. Dapat naton handumon nga mangin kaangay ni Jehova sa aton masarangan—ilugon ang iya mga dalanon kag ipabanaag ang iya mga kinaiya kag personalidad. (Efeso 5:1) Sa pagkamatuod, ang diosnon nga debosyon nagapahulag sa aton nga pahamut-an ang Dios sa tanan naton nga ginahimo.—1 Corinto 10:31.
8. Ano ang kaangtanan sang diosnon nga debosyon sa eksklusibo nga debosyon?
8 Agod mapakita ang matuod nga diosnon nga debosyon, dapat si Jehova lamang ang aton simbahon, wala nagatugot nga may mag-agaw sang iya lugar sa aton tagipusuon. Subong aton Manunuga, may kinamatarong sia sa aton eksklusibo nga debosyon. (Deuteronomio 4:24; Isaias 42:8) Apang, wala kita ginapilit ni Jehova nga simbahon sia. Luyag niya ang aton kinabubut-on nga debosyon. Ang gugma naton sa Dios, pasad sa sibu nga ihibalo tuhoy sa iya, ang nagapahulag sa aton nga magkabuhi sing matinlo kag magdedikar sa iya sing bug-os kag magkabuhi nahisanto sa sini.
Magpalambo sing Kaangtanan sa Dios
9, 10. Paano naton mapalambo kag mahuptan ang suod nga kaangtanan sa Dios?
9 Sa tapos masimbuluhan ang aton dedikasyon sa Dios paagi sa pagpabawtismo, kinahanglan gihapon naton nga magpalambo sing suod pa nga kaangtanan sa iya. Busa, ang handum naton nga himuon ini kag alagdon si Jehova sing matutom nagapahulag sa aton nga magpadayon sa pagtuon sang iya Pulong kag pamalandungan ini. Samtang ginatugutan naton nga maimpluwensiahan sang espiritu sang Dios ang aton hunahuna kag tagipusuon, nagadalom ang aton gugma kay Jehova. Ang aton kaangtanan sa iya padayon nga amo ang pinakaimportante nga butang sa aton kabuhi. Ginakabig naton si Jehova nga aton pinakasuod nga Abyan kag luyag naton nga pahamut-an sia sa tanan nga tion. (1 Juan 5:3) Ang aton kalipay sa aton kaangtanan sa Dios nagatubo, kag nagapasalamat kita nga mahigugmaon niya kita nga ginatudluan kag ginatadlong kon kinahanglanon.—Deuteronomio 8:5.
10 Kon indi kita magpadayon sa pagpanikasog nga pabakuron ang aton hamili nga kaangtanan kay Jehova, magaluya ini. Kon matabo ini, indi mabasol ang Dios, kay “indi sia malayo sa tagsatagsa sa aton.” (Binuhatan 17:27) Malipayon gid kita nga indi mabudlay ang pagpalapit kay Jehova! (1 Juan 5:14, 15) Siempre pa, dapat kita magpanikasog nga mahuptan ang suod nga kaangtanan kay Jehova. Apang, nagabulig sia sa aton nga mangin suod sa iya paagi sa paghatag sa aton sang tanan nga bulig nga kinahanglan naton agod mapalambo kag mahuptan ang diosnon nga debosyon. (Santiago 4:8) Paano naton magamit sing bug-os ining tanan nga mahigugmaon nga bulig?
Magpabilin nga Mabakod sa Espirituwal
11. Ano ang pila ka paagi sang pagpakita sang aton diosnon nga debosyon?
11 Ang aton tudok nga gugma sa Dios magapahulag sa aton nga ipakita ang kadakuon sang aton diosnon nga debosyon, nahisanto sa laygay ni Pablo: “Himua ang imo bug-os nga masarangan nga ipakita ang imo kaugalingon nga nahamut-an sang Dios, manugpangabudlay nga wala sing dapat ikahuya, nga nagagamit sing matadlong sang pulong sang kamatuoran.” (2 Timoteo 2:15) Agod mahimo ini, dapat naton huptan ang maayo nga rutina sa regular nga pagtuon sa Biblia, pagtambong sa mga miting, kag pagpakigbahin sa ministeryo sa latagon. Nagasuod man kita kay Jehova paagi sa ‘indi pag-untat sa pagpangamuyo.’ (1 Tesalonica 5:17) Pagpakita ini sang aton diosnon nga debosyon. Ang pagpatumbaya bisan sa isa sini mahimo magresulta sa balatian sa espirituwal kag mahimo kita mabiktima sang mga padugi ni Satanas.—1 Pedro 5:8.
12. Paano naton mabatas sing madinalag-on ang mga pagtilaw?
12 Ang pagpabilin nga mabaskog kag aktibo sa espirituwal nagabulig man sa aton nga maatubang ang madamo nga pagtilaw nga nagaabot sa aton. Ang mga ginhalinan sini mahimo gid magtilaw sa aton. Ang di-pagsapak, pagpamatok, kag paghingabot mas mabudlay batason kon naghalin ini sa suod nga mga miembro sang pamilya, paryente, ukon kaingod. Ang maluibon nga mga pag-ipit agod magkompromiso kita sa Cristianong mga prinsipio mahimo mag-utwas sa aton ginatrabahuan ukon sa eskwelahan. Ang pagluya sang buot, balatian, kag kapung-aw makapaluya sa aton sa pisikal kag nagapabudlay pa gid nga batason ang mga pagtilaw sa pagtuo. Apang mabatas naton sing madinalag-on ang tanan nga pagtilaw kon magpadayon kita “sa balaan nga paggawi kag sa mga buhat sang diosnon nga debosyon, nga nagahulat kag ginahuptan sing suod sa hunahuna ang presensia sang adlaw ni Jehova.” (2 Pedro 3:11, 12) Kag mahuptan naton ang aton kalipay sa paghimo sini, nagasalig nga pakamaayuhon kita sang Dios.—Hulubaton 10:22.
13. Ano ang dapat naton himuon agod padayon naton nga mapakita ang diosnon nga debosyon?
13 Bisan pa nga ginapuntariya ni Satanas ang mga nagabuhat sing diosnon nga debosyon, indi kita dapat mahadlok. Ngaa? Bangod “makahibalo si Jehova kon paano luwason ang mga tawo nga may diosnon nga debosyon gikan sa pagtilaw.” (2 Pedro 2:9) Agod mabatas ang mga pagtilaw kag maagom ini nga pagluwas, dapat naton “sikwayon ang pagkadidiosnon kag kalibutanon nga mga handum kag magkabuhi nga may kaligdong sa hunahuna kag pagkamatarong kag diosnon nga debosyon sa tunga sining karon nga sistema sang mga butang.” (Tito 2:12) Subong mga Cristiano, dapat kita magbantay agod wala sing kaluyahon nga nagadalahig sa undanon nga mga kailigbon kag mga buhat ang maghingalit sa aton diosnon nga debosyon kag magguba sini. Binagbinagon naton karon ang pila sini nga mga katalagman.
Mag-andam sa mga Katalagman sa Diosnon nga Debosyon
14. Ano ang dapat naton dumdumon kon ginasulay kita sang siod sang materyalismo?
14 Ang materyalismo nagasiod sa madamo. Mahimo naton madaya bisan ang aton kaugalingon, “nagahunahuna nga ang diosnon nga debosyon isa ka paagi sang [materyal nga] pagdaug.” Sa amo, basi mangisog kita nga hingalitan sing di-nagakaigo ang pagsalig nga ginapakita sang mga masigkatumuluo. (1 Timoteo 6:5) Mahimo pa gani kita maghinakop sing sayop nga wala sing malain sa pag-utang sa manggaranon nga Cristiano bisan indi naton masarangan ang pagbayad. (Salmo 37:21) Apang ang diosnon nga debosyon, indi ang pagtigayon sing materyal nga mga butang, ang ‘nagasaad sing kabuhi karon kag sa palaabuton.’ (1 Timoteo 4:8) Bangod ‘wala kita sing nadala sa kalibutan kag indi makadala sing bisan ano nga butang paguwa,’ mangin labi kita ka determinado nga ipakita ang “diosnon nga debosyon upod ang pagkanaayawan sa kaugalingon” kag mangin ‘kontento kita sa pagkaon kag panapton.’—1 Timoteo 6:6-11.
15. Ano ang himuon naton kon ginapahigad sang pagtinguha sa kalipayan ang aton diosnon nga debosyon?
15 Ang pagtinguha sa kalipayan makapahigad sa diosnon nga debosyon. Kinahanglan bala naton nga magbag-o gilayon sa sini nga bahin? Matuod, may pila ka benepisyo ang paghanas nga lawasnon kag ang pagliwaliwa. Apang, ini nga mga bentaha diutay lang kon ipaanggid sa walay katapusan nga kabuhi. (1 Juan 2:25) Sa karon, madamo ang “mahigugmaon sa kinasadya sa baylo sang sa Dios, nga may dagway sang diosnon nga debosyon apang nagapanghiwala sang gahom sini,” kag dapat naton sila likawan. (2 Timoteo 3:4, 5) Ang mga nagapakadaku sa diosnon nga debosyon “mahalungon nga nagatipon para sa ila kaugalingon sing maayo nga sadsaran para sa palaabuton, agod makapanguyapot sila sing hugot sa matuod nga kabuhi.”—1 Timoteo 6:19.
16. Anong makasasala nga mga handum ang nagasablag sa iban nga magkabuhi suno sa matarong nga mga ginapatuman sang Dios, kag paano naton madaug ini nga mga handum?
16 Ang pag-abuso sa alkoholiko nga ilimnon kag sa droga, imoralidad kag ang makasasala nga mga handum makaguba sang aton diosnon nga debosyon. Ang pagpadala sa sini magapugong sa aton nga magkabuhi suno sa matarong nga mga ginapatuman sang Dios. (1 Corinto 6:9, 10; 2 Corinto 7:1) Bisan si Pablo kinahanglan sadto magbatas sang padayon nga pagpakigbato sa makasasala nga unod. (Roma 7:21-25) Kinahanglan ang estrikto gid nga mga tikang agod madula ang sayop nga mga handum. Una, dapat kita mangin determinado nga magpabilin nga matinlo sa moral. Si Pablo nagasiling sa aton: “Patya ninyo ang mga bahin sang inyo lawas nga yara sa ibabaw sang duta may kaangtanan sa pakighilawas, pagkadimatinlo, seksuwal nga kailigbon, malaut nga handum, kag pagkamahamkunon, nga amo ang idolatriya.” (Colosas 3:5) Ang pagpatay sa mga bahin sang aton lawas may kaangtanan sa sining makasasala nga mga butang nagakinahanglan sing determinasyon agod madula ini sing bug-os. Ang hanuot nga pagpangamuyo para sa bulig sang Dios magabulig sa aton nga isikway ang sayop nga mga handum kag himuon ang pagkamatarong kag diosnon nga debosyon sa tunga sining malaut nga sistema sang mga butang.
17. Paano naton dapat tamdon ang disiplina?
17 Ang pagluya sang buot makapahuyang sang aton pagbatas kag makahalit sa aton diosnon nga debosyon. Madamo sa mga alagad ni Jehova ang nakaeksperiensia sing pagluya sang buot. (Numeros 11:11-15; Esdras 4:4; Jonas 4:3) Makahalalit gid ang epekto sa aton sang pagluya sang buot kon may kaupod ini nga paghinakit tungod nasandad kita ukon matigdas kita nga ginsabdong ukon gindisiplina. Apang, ang pagsabdong kag disiplina pamatuod sang interes kag mahigugmaon nga pag-ulikid sang Dios. (Hebreo 12:5-7, 10, 11) Dapat tamdon ang disiplina indi lamang subong silot kundi isa ka paagi sang paghanas sa aton sa dalanon sang pagkamatarong. Kon mapainubuson kita, apresyahon naton kag batunon ang laygay, nakahibalo nga “ang mga pagsabdong sang disiplina amo ang dalanon sang kabuhi.” (Hulubaton 6:23) Makabulig ini sa aton nga mag-uswag sa espirituwal sa pagpakita sing diosnon nga debosyon.
18. Ano ang aton responsabilidad kon makasala ang iban sa aton?
18 Ang di-paghangpanay kag ang mga sala sa aton sang iban mahimo mangin hangkat sa aton diosnon nga debosyon. Mahimo ini tunaan sang pagkabalaka ukon bangod sini, di-maalamon nga magpahilayo ang iban sa ila espirituwal nga mga kauturan. (Hulubaton 18:1) Apang dapat naton dumdumon nga ang paghinakit ukon ang pagdumot sa iban makahalit sa aton kaangtanan kay Jehova. (Levitico 19:18) Sa pagkamatuod, “sia nga wala nagahigugma sang iya utod, nga makita niya, indi makahigugma sa Dios, nga indi niya makita.” (1 Juan 4:20) Sa iya Sermon sa Bukid, ginpadaku ni Jesus ang kinahanglanon nga maghulag sa gilayon agod malubad ang personal nga mga problema. Ginsilingan niya ang iya mga tagpalamati: “Kon, nian, nagadala ka sang imo dulot sa halaran kag didto nadumduman mo nga ang imo utod may isa ka butang nga batok sa imo, bayai didto ang imo dulot sa atubangan sang halaran, kag maglakat ka; una makighidait ka sa imo utod, kag nian, sa pagbalik mo, ihalad ang imo dulot.” (Mateo 5:23, 24) Ang pagpangayo sing pasaylo mahimo magpaayo sa pilas nga resulta sang masakit nga hambal ukon buhat. Malubad ang di-paghangpanay kag mapasag-uli ang maayo nga mga kaangtanan kon magpangayo kita sing pasaylo kag batunon nga nagsayop kita. Naghatag man si Jesus sang iban pa nga laygay sa pag-atubang sa mga problema. (Mateo 18:15-17) Malipayon gid kita kon magmadinalag-on ang aton mga panikasog nga lubaron ang mga problema!—Roma 12:18; Efeso 4:26, 27.
Sunda ang Halimbawa ni Jesus
19. Ngaa importante gid nga ilugon ang halimbawa ni Jesus?
19 Magaabot gid sa aton ang mga pagtilaw, apang indi ini dapat magsablag sa aton sa dalaganon padulong sa kabuhi nga walay katapusan. Dumduma nga masarangan ni Jehova ang pagluwas sa aton gikan sa pagtilaw. Samtang ‘ginasikway naton ang tagsa ka kabug-atan’ kag ‘nagadalagan kita nga may pagbatas sang dalaganon nga ginabutang sa aton atubangan,’ ‘magtulok kita sing maayo sa Pangulo nga Ahente kag Manughimpit sang aton pagtuo, si Jesus.’ (Hebreo 12:1-3) Ang pagbinagbinag sing maayo sang halimbawa ni Jesus kag ang pagpanikasog nga ilugon sia sa pulong kag buhat magabulig sa aton nga mapalambo ang diosnon nga debosyon kag ipakita ini sing kapin pa.
20. Ano nga mga padya ang magaresulta gikan sa pagbatas kag pagpakita sing diosnon nga debosyon?
20 Naangot gid sing suod ang pagbatas kag diosnon nga debosyon agod mapat-od ang aton kaluwasan. Paagi sa pagpakita sining hamili nga mga kinaiya, matuman naton sing matutom ang aton sagrado nga pag-alagad sa Dios. Bisan sa idalom sang pagtilaw, magakalipay kita samtang ginaagom naton ang malum-ok nga pagpalangga kag pagpakamaayo ni Jehova bangod nagabatas kita kag nagapakita sing diosnon nga debosyon. (Santiago 5:11) Dugang pa, si Jesus mismo nagapasalig sa aton: “Paagi sa inyo pagbatas matigayon ninyo ang inyo mga kalag.”—Lucas 21:19.
Paano Mo Sabton?
• Ngaa importante ang pagbatas?
• Ano ang diosnon nga debosyon, kag paano ini mapakita?
• Paano naton mapalambo kag mahuptan ang suod nga kaangtanan sa Dios?
• Ano ang pila ka katalagman sa aton diosnon nga debosyon, kag paano naton ini malikawan?
[Mga Pamangkot sa Pagtinuon]
[Mga retrato sa pahina 12, 13]
Mapakita ang diosnon nga debosyon sa madamo nga paagi
[Mga retrato sa pahina 14]
Mag-andam sa mga katalagman sa imo diosnon nga debosyon
