1 Pedro 5:1-14
5 Gani, subong masigkagulang, isa ka saksi sa mga pag-antos sang Cristo kag isa ka umalambit sang himaya nga ipahayag,+ nagapangabay* ako sa mga gulang sa tunga ninyo:
2 Bantayi ninyo ang panong sang Dios+ nga yara sa inyo pag-atipan, nga nagaalagad subong mga manugtatap,* indi nga napilitan, kundi sing kinabubut-on sa atubangan sang Dios;+ indi tungod sa gugma sa mga bentaha,+ kundi sing malangkagon;
3 wala nagapakaginuo sa mga ginapanag-iyahan sang Dios,+ kundi mangin mga halimbawa sa panong.+
4 Kag kon mapadayag na ang puno nga manugbantay,+ mabaton ninyo ang wala nagakalaya nga purongpurong sang himaya.+
5 Sa amo man nga paagi, kamo nga lamharon nga mga lalaki, magpasakop kamo sa mga lalaki nga mas magulang sa inyo.*+ Apang tanan kamo dapat mangin mapainubuson sa inyo pagpakig-angot sa isa kag isa, bangod ginapamatukan sang Dios ang mga matinaastaason, apang nagahatag sia sang wala tupong nga kaayo sa mga mapainubuson.+
6 Gani, magpaubos kamo sa idalom sang gamhanan nga kamot sang Dios, agod bayawon niya kamo sa gintalana nga tion,+
7 samtang ginatugyan* ninyo sa iya ang tanan ninyo nga kabalaka,+ kay nagaulikid sia sa inyo.+
8 Hupti ang inyo ikasarang sa paghunahuna sing maayo, mangin mabinantayon!+ Ang inyo kaaway, ang Yawa, nagaluyong subong sang nagangurob nga leon, nga nagapangita sing tulukbon.+
9 Apang magtindog kamo batok sa iya+ kag mangin malig-on sa pagtuo, bangod nahibaluan ninyo nga ang amo man nga sahi sang mga pag-antos naeksperiensiahan man sang tanan ninyo nga kauturan* sa bug-os nga kalibutan.+
10 Apang, sa tapos kamo mag-antos sa malip-ot nga tion, ang Dios nga puno sang wala tupong nga kaayo, nga nagtawag sa inyo nga mga nahiusa sa Cristo sa iya wala katapusan nga himaya+ magatapos sang inyo paghanas. Pabaskugon niya kamo,+ pabakuron niya kamo,+ kag lig-unon sing maayo.
11 Mangin sa iya ang gahom nga wala sing katapusan. Kabay pa.*
12 Paagi kay Silvano,*+ nga ginakabig ko nga matutom nga utod, nagsulat ako sing malip-ot sa inyo agod palig-unon kamo kag agod ipahibalo sa inyo nga amo ini ang matuod nga wala tupong nga kaayo sang Dios. Magtindog kamo sing malig-on sa sini.
13 Sia* nga yara sa Babilonia, nga isa man ka pinili kaangay ninyo, nagapangamusta sa inyo, kag subong man si Marcos+ nga akon anak.
14 Magkamustahanay kamo paagi sa halok sang gugma.
Kabay nga may paghidait kamo tanan nga nahiusa sa Cristo.
