Tito 2:1-15
2 Apang, padayon ka nga maghambal nahisuno sa maayo* nga panudlo.+
2 Ang may edad nga mga lalaki dapat makahibalo magpugong sang ila kaugalingon, serioso, maligdong sing hunahuna, mapagros sa pagtuo, sa gugma, kag sa pagbatas.
3 Subong man, ang may edad nga mga babayi maggawi subong mga balaan, indi mabinutangbutangon, indi ulipon sang alak, kag dapat nagatudlo sang maayo,
4 agod mahimo nila laygayan* ang bataon nga mga babayi nga higugmaon ang ila bana kag mga anak,
5 nga mangin maligdong sing hunahuna, putli, mapisan sa sulod-balay,* maayo, nagapasakop sa ila bana,+ agod ang pulong sang Dios indi mapasipalahan.
6 Padayon man nga palig-una ang lamharon nga mga lalaki nga mangin maligdong sing hunahuna.+
7 Ipakita nga maayo ka nga halimbawa sa maayong mga buhat sa tanan nga paagi. Itudlo sing serioso kon ano ang putli,*+
8 nga nagagamit sang maayo* nga panghambal nga indi mapakamalaut,+ agod ang mga nagapamatok mahuy-an, bangod wala sila sing negatibo* nga mahambal nahanungod sa aton.+
9 Ang mga ulipon magpasakop sa mga nagapanag-iya sa ila sa tanan nga butang,+ nga nagatinguha nga mapahamut-an sila, nga wala nagasabat sing mabinatuon,
10 wala nagapangawat sa ila,+ kundi nagapakita nga masaligan gid sila, agod sa tanan nga paagi mapatahom nila ang panudlo sang aton Manluluwas, ang Dios.+
11 Kay ang wala tupong nga kaayo sang Dios napadayag, nga nagadala sang kaluwasan sa tanan nga sahi sang mga tawo.+
12 Nagahanas ini sa aton nga sikwayon ang pagkadidiosnon kag kalibutanon nga mga kailigbon+ kag magkabuhi nga may maligdong nga hunahuna kag pagkamatarong kag diosnon nga debosyon sa tunga sining karon nga sistema sang mga butang,*+
13 samtang ginahulat naton ang makalilipay nga paglaum+ kag mahimayaon nga pagpadayag sang labing gamhanan nga Dios kag sang aton Manluluwas, si Jesucristo,
14 nga naghatag sang iya kaugalingon para sa aton+ agod mahilway* kita+ sa tanan nga sahi sang pagkamalinapason kag matinluan para sa iya kaugalingon ang katawhan nga pinasahi niya nga ginapanag-iyahan, nga makugi sa maayong mga buhat.+
15 Padayon nga ihambal ini, maglaygay* ka kag magsabdong nga may bug-os nga awtoridad.+ Indi pagtuguti nga may magtamay sa imo.
Footnote
^ Ukon “makapapagros; mapuslanon.”
^ Ukon “mapasag-uli nila sa kaligdong; mahanas.”
^ Ukon “nagaatipan sang ila panimalay.”
^ Ukon mahimo, “Magtudlo nga may kaputli.”
^ Ukon “makapapagros; mapuslanon.”
^ Ukon “malain.”
^ Sa literal, “agod matubos; agod maluwas.”
^ Ukon “magpalig-on.”
