Job 9:1-35
9 Joban zobab diun mhunnttlem:
2 “Hem oxench mhunn hanv bore bhaxen zannam.
Punn ek-na-ek dis morta to munis, Deva mukhar apunn sarko mhunn koso sangonk xokta?
3 Konnui Deva lagim vad-vivad korunk* sodhta zalear,To tachea hozar prosna modlea ekui prosnacho zobab diunk xokchona.
4 Dev khub zannvaiecho ani khub xoktivont asa.
Tachea add vochon, zokhmi zainastana konnui uronk xokta kai?
5 To porvot haloita* ani konnank kollona,To aplea ragan tankam porte korun uddoita.
6 To prithumek tichea zagea voili haloita,Zaka lagon tiche khambe thorthortat.
7 To suriak porzollcho nhoi mhunn adnea dita,Ani noketrancho uzvadd bond korta.
8 To svota mollob posraita,Ani doriachea unch lharancher cholta.
9 Tannem Ash,* Kesil* ani Kima* noketranche zome keleat,Ani dokxinnek aslolea* noketranche zome pasun tannench keleat.
10 To vortim, ani ami somzonk pasun xokona toslim kamam korta,Tachim ojapachim kamam mezunk zaina titlim asat.
11 To mhojea kuxichean pasar zata, tori hanv taka pollounk xokona,To mhojea mukhavoilean voita, punn hanv taka vollkhonk pavona.
12 To kitem-i kaddun vhorta zalear, taka konn addaunk xokta?
‘Tum hem kitem korta,’ mhunn taka konn vicharunk xokta?
13 Dev aplo rag addaunchona,Rahabak* modot korpi pasun tachea mukhar paim-am poddttole.
14 Tor taka zobab ditana hanvem samballun ulounk poddttolem,Tachea lagim vad-vivad kortana hanvem bariksannen chintun mhojim utram uzar korunk poddttolim!
15 Mhoje vatten hanv sarkom aslom zalear pasun, hanv taka zobab diunchom na,Mhojea neai korpea lagim* hanv fokot kakut kor mhunn bhik magonk xoktam.
16 Punn hanvem taka ulo marlo zalear to mhaka zobab ditolo kai?
To mhojem aikotolo oxem mhaka disona.
17 To vadoll haddun mhaka mostita,Ani karonn nastana mhoje ghave vaddoit ravta.
18 To mhaka svas pasun gheunk dina,Mhojer anik tras haddit ravta.
19 Xokte vixim sangchem zalear, to sogleant xoktivont asa.
Neai-a vixim sangchem zalear, to mhunntta: ‘Mhojea koddlean konn hixob ghetolo?’*
20 Mhoje vatten hanv sarkom aslom zalear mhojench tondd mhaka guneanvkari tharaitolem.
Hanv guneanva mekllom ravlom* zalear pasun to mhaka opradi* mhunn tharaitolo.
21 Hanv guneanva mekllom asam* vo na tem mhakach khoborna.
Mhaka mhojea jivachi vitt ailea.*
22 Kitem-i zaum, soglem ekuch. Taka lagon hanv mhunnttam,‘To noxtteacho ani niropradeacho* dogaincho-i nas korta.’
23 Okosmat buddtti ieun lok mortat tednam,Niropradi lokanchi vaitt poristhiti polloun to hansta.
24 Prithum noxtteachea hatant dilea,Tannem neai korpeanchea dolleancher* pottʼtti bandlea,Hem tannem korunk na zalear, konnem kelam?
25 Atam mhoje dis sondexkara poros fastt* dhanvtat.
Tantuntlo ekui dis boro asa oxem na.
26 Tonnachea boddiemnim kelʼlea tarvam sarke,Aplea xikareacher uddi marta tea ghonni sarke, te dis fastt voitat.
27 Hanvem zor oxem mhunnttlem ‘Hanv mhojem dukh visortolom,Hanv mhojea tondda voilo usko kaddun uddoun khuxal ravtolom.’
28 Torui mhaka mhojea soglea dukhak lagon bhirant distolich,Ani hanv zannam, tednam pasun tum mhaka niropradi mhunn manun gheunchom na.
29 Hanv guneanvkari* thortolonch zalear,Hanv niropradi mhunn dakhouncho proitn kiteak korum?
30 Hanv pigolltta tea borfachea udkan nhanvlom,Ani sabanvan* hanvem mhoje hat dhuile zalear pasun,
31 Tum mhaka chiklachea fonddant buddoitolo,Zaka lagon, mhojea kopddeank pasun mhoji vitt ietoli asli.
32 Karonn Devak zobab diunk ani tachea add korttant kes zhogddonk,To mhojea sarko ek munis nhoi.
33 Oso konnuch* na, zo amchi poristhiti suttavi korunk xokta,Neai korpi zaun nit korunk xokta.*
34 Tannem mhaka marop bond kelem,Ani mhaka bhievop soddun dilem zalear,
35 Hanv bhienastana tachea lagim uloitolom aslom,Karonn, taka bhieunk mhaka koslench karonn na.
Footnotes
^ Vo “Devak korttant vhoronk.”
^ Vo “kaddun uddoita.”
^ Ghoddie Great Bear noketrancho zomo; Soptrixi. Sat noketrancho zomo.
^ Ghoddie Orion noketrancho zomo; Mrigashira.
^ Ghoddie Taurus noketranchea zomeantlim Pleiades noketram; Krittika.
^ Utran utor, “dokxinnechea bhitorlea rumant aslole.”
^ Ghoddie doriant ravpi ek vhoddlo pranni.
^ Vo ghoddie, “Korttant mhojea add asa tachea lagim.”
^ Utran utor, “Mhaka korttant konn apoitolo?”
^ Vo “Hanv niropradi aslom.” Mhunnche, purnn toren bhokti korpi. Inglez bhaxent “integrity.”
^ Vo “naddbudʼdhecho.”
^ Vo “Hanv niropradi asam.” Mhunnche, purnn toren bhokti korpi. Inglez bhaxent “integrity.”
^ Vo “Hanv hem jivit nakartam.”
^ Vo “guneanva mekllo jietoleacho.” Mhunnche, purnn toren bhokti korpi. Inglez bhaxent “integrity.”
^ Utran utor, “tonddancher.”
^ Vo “vegan.”
^ Utran utor, “noxtto.”
^ Gobra thaun toiar kelʼlo ek torecho sabanv. Inglez bhaxent “potash, lye.”
^ Vo “modesti.”
^ Utran utor, “Amcher dogaincher aplo hat dovrunk xokta.”
