Job 40:1-24
40 Jehovan Jobak zobab diun fuddem mhunnttlem:
2 “Dusreancheo chuki sodhtolea munxan Sorvxoktivont Deva lagim vad-vivad korcho kai?
Devak sudhraunk sodhta, tannem zobab diuncho.”
3 Tednam Joban, Jehovak zobab diun mhunnttlem:
4 “Polloi! Hanv purto na.
Hanv tuka kitem zobab dium?
Hanv mhojea tonddar hat dovortam.
5 Hanv ek pavtt uloilom, punn hanv porot zobab diunchom na,Hanv dusre pavtti uloilom, punn hanv anik ulounchom na.”
6 Uprant, Jehovan vadollantlean Jobak zobab diun mhunnttlem:
7 “Upkar korun eka xoktivont munxa bhaxen toiar* rav,Hanv tuka prosn vichartolom, ani tum mhaka zobab di.
8 Hanv jea toren neai kortam tea vixim tum prosn ubartolo kai?
Tum apunn sarko mhunn dakhounk, mhaka guneanvkari tharaitolo kai?
9 Tuzo hat khorea Devachea hata itlo xoktivont asa kai,Vo tuzo avaz Deva bhaxen, goddgodda itlo vhodd asa kai?
10 Upkar korun, tuka mhoimen ani vorteponnan,Toxench, manan ani sobitkaien nettoi.
11 Tujea ragacho uzo votoi,Soglea gorvixttank polloi, ani tankam sokol hadd.
12 Soglea gorvixttank polloi, ani tankam khalte kor,Ani noxtteank te ube asat thoinch mostun uddoi.
13 Tankam sogleank dhulʼlint lipoi,Tankam* Fonddant bandun dovor.
14 Tednam tuzo uzvo hat tuka salvar korunk xokta mhunn,Hanv pasun manun ghetolom.*
15 Atam, Behemothak* polloi, tuka kela toso hanvem taka-i kela.
To boila bhaxen tonn khata.
16 Tachea paim-ank aslolem boll,Ani tachea angak* asloli xokti polloi!
17 To apli xempddi cedar* zhaddam bhaxen ghott korta,Tachea zangllancheo xiro sangata vinnloleo asat.
18 Tachim haddam tambeachea nolliem bhaxen asat,Tache paim lokhnnachea varanvam bhaxen asat.
19 Vhoddlea-vhoddlea zonvaram modem Devan taka sogleant poilim* rochlo,Fokot tacho Rochnnar* tachea mukhar tolvar gheun vochonk xokta.*
20 Porvot taka jevonn utpon kortat,Zoim soglim ranvotti zonvaram khellttat.
21 To kantteanchea jhilkuttam* ponda,Rebddant zatolea tonnachea savllek add poddtta.
22 Kantteanchim jhilkuttam taka savlli ditat,Ani falkeantlim* zhaddam* taka gherav ghalun astat.
23 Nhoim-ent hunvar ailear to abuz zaina.
Jordan nhoim tachea* add vhanvta zalear pasun taka koslich bhirant asona.
24 To zago astana konnui taka dhorunk xokta kai,Vo konnui tachea nakant gori* ghalunk xokta kai?
Footnotes
^ Vo “tuji komor bandun toiar.”
^ Utran utor, “Tanchim tonddam.”
^ Vo “Hanv pasun tuka xabaski ditolom.”
^ Ho ghoddie nodintlo ghoddo. Inglez bhaxent “hippopotamus.”
^ Utran utor, “pottachea masolank.”
^ Vo “devdar.” Eke torechem vhoddlem zhadd.
^ Utran utor, “taka survatek.”
^ Vo “Fokot taka kela to.”
^ Vo “taka tolvarin marunk xokta.”
^ Hebrev bhaxent hem “Zizyphus lotus” haka suchit korta, tem “buckthorn” familintlem ek lhan jhilkutt vo zhadd zaun asa.
^ Vo “wadintlim.”
^ Hea utrak uzar kelʼlem Hebrev utor eka zhaddak uzar kelam jem sompeponnim nhoim-chea deger melltta. Inglez bhaxent “poplar.”
^ Vo “tachea tondda.”
^ Utran utor, “fas.”
