Job 19:1-29
19 Joban zobab diun mhunnttlem:
2 “Kednam poriant tumi mhozo jiv* khait* ravtole,Tumchea utramnim mhaka mostit ravtole?
3 Atam poriant, dha pavtti tumi mhaka tapoilo,*Mhojea sangata vaitt toren vagonk tumkam loz disona.
4 Ani hanvem khorench chuk kelea zalear,Hanv mhojea guneanvacho porinnam bhogunk toiar asam.
5 Tumi mhojea poros vhoddle mhunn dakhoun,Mhaka zalʼlo opman sarko asa mhunn dakhounk sodhtat zalear,
6 Zannam zaiat, mhaka Devan fosoila,Ani tannem mhaka aplea zallant dhorla.
7 Polloi! ‘Mhojer onʼneai zala!’ mhunn hanv roddot asam, punn konnuch aikon ghena,Hanv modoti pasot roddot asam, punn mhaka neai mellona.
8 Tannem fatrachi vonott ghalun mhoji vatt addailea, ani mhojean fuddem vochonk zaina,Tannem mhoje roste kallkhan dhampleat.
9 Tannem mhoje koddlean mhoji mhoima kaddun ghetlea,Ani mhojea mathea voilo mukutt kaddla.
10 Hanv kosllon poddom poriant, to mhaka soglea vattamnim moddit ravta.
Eka zhadda bhaxen to mhozo bhorvonso umttun uddoita.
11 Tacho rag mhojea add pettla,Ani to mhaka aplo dusman mhunn lekhta.
12 Tache soinikanche zome ektthaim ieun mhaka veddo ghaltat,Ani te mhojea tombu bhonvtonnim gherav ghaltat.
13 Mhojea svotachea bhavank tannem mhojea thaun pois keleat,Ani mhaka vollkhotat te mhojea thaun pois geleat.
14 Mhoje lagxilʼle sangati mhaka soddun gele,*Ani zankam hanv bore toren vollkhotalom te mhaka visorleat.
15 Mhojea ghorantlim soirim ani mhojeo chakorneo mhaka ek onvollkhi munis mhunn lekhtat,Tanchea nodren hanv ek pordexi zaun asa.
16 Hanv mhojea chakrak ulo martam, punn to mhaka zap dina,Mhaka doia-maia dakhoi mhunn hanvem tachea lagim vinoti kelear pasun, to aikona.
17 Mhojea bailek mhojea svasachi pasun vitt ieta,Mhojea bhavankui mhoji ghann marta.
18 Lhan-lhan bhurgim pasun mhaka kainch nhoi koxim lekhtat,Hanv ubo ravtam tednam tim mhaka challoitat.
19 Mhoje sogle ixtt mhozo dves kortat,Ani zancho hanv mog kortalom te mhojea add ube ravleat.
20 Mhojim haddam mhojea katik ani masak lagleant,Hanv mortam-mortam vanchlom.
21 Mhoji kakut korat, mhojea sangateamno, mhoji kakut korat,Karonn hanvem Devachea hatacho mar khaila.
22 Deva bhaxen tumi mhaka dhumallo kiteak ditat,Thambonastana mhojer akromonn kiteak kortat?*
23 Mhojim utram boroun dovorlolim zalear,Eka pustokant boroun dovorlolim zalear kitlem borem zaupachem!
24 Lokhnnachea pen-an* ani xinxean,*Tim sasnak uronk eka khoddpacher kantoilʼlim zalear kitlem borem zaupachem!
25 Karonn mhozo soddoupi jivo asa mhunn hanv bore bhaxen zannam,To magir ietolo ani prithumer* ubo ravtolo.
26 Mhojea katicho nas zalea uprant pasun,Hanv heach kuddin Devak polloitolom.
27 Hanv svota taka polloitolom,Dusreanchea nhoi, punn mhojea svotachea dolleamnim taka polloitolom.
Punn atam hanv bhitorlean samko kabar zalam!*
28 Karonn tumi mhojea vixim mhunnttat, ‘Ami taka dhumallo khoim ditat?’
Chuk mhojich asa oxem tumkam dista.
29 Tachea tolvarik matxe tori bhieiat,Karonn tachi tolvar guneanvkareank khast ditach.
Ek neai korpi asa mhunn ugddas dovrat.”
Footnotes
^ Vo “tumi mhaka bejar korit.”
^ Vo “tumi mhozo opman kelo.”
^ Vo “Mhojim ghorchim mhaka soddun gelim.”
^ Utran utor, “Ani mhojea masan dhadoxi kiteak zainant?”
^ Vo “lekhnnen.” Inglez bhaxent “stylus.”
^ Xobdhkox polloi.
^ Vo “dhulʼlicher.”
^ Vo “atam mhojea kiddneamnim kam korop bond kelam.”
