Job 29:1-25
29 Joban aplem ulovop* chalu dovrun mhunnttlem:
2 “To poilincho temp porot ailʼlo zalear kitlem borem zaupachem!
Te dis, jednam Dev mhojer nodor dovortalo,
3 Jednam tacho divo mhojea mathea voir chokchoktalo,Ani tacho uzvadd mhaka kallkhant pasun vatt dakhoitalo,
4 Jednam hanv tornattom* aslom,Ani mhojea tombunt hanv Devachi ixttagot onnbhovunk xoklom,
5 Jednam Sorvxoktivont Dev mhojea sangata aslo,Ani mhojim soglim bhurgim mhojea bhonvtonnim aslim,*
6 Jednam mhoje paim bottorant* buddlole astale,Ani khoddpantlean mhojea pasot telacheo zhori vhanvtaleo.
7 Jednam hanv xarachea darvonttear voitalom,Ani xarachea nakear mhojea zagear bostalom,
8 Tednam tornatte mhaka polloitanch, kuxin soron mhaka vatt ditale,*Ani zanntte pasun utthon ube ravtale.
9 Kunvor mhojea mukhar ulounk sodhinasle,Te aplo hat aplea tonddar dovortale.
10 Manadik munis aplea tonddantlean ekui utor bhair kaddinasle,Tanchi jib tanchea talliek chittkotali.
11 Zo mhojim utram aikotalo to mhoji vhoddvik kortalo,Ani je mhaka polloitale te mhojea vatten govai ditale.
12 Karonn modoti pasot ulo marta tea goribak hanv vanchoitalom,Ani onathak* ani adar nasloleak hanv soddoitalom.
13 Moronk pavlolo munis mhaka besanv ditalo,Hanvem kelʼlea modotik lagon vidvanchem kalliz khuxal zatalem.
14 Hanvem nitivontponnak mhoji nhesonn keli,Neai-ak, mhoje kopdde* ani munddaso* kelo.
15 Hanv kuddʼddeam pasot dolle zalom,Ani longddeam pasot paim zalom.
16 Hanv goribam pasot bapui zalom,Hanv vollkhonaslom tea lokanchea kesinchi choukoxi kortalom.
17 Vaitt korta tachem hanv tondd foddttalom,*Tachea tonddant sampoddloleak soddoitalom.
18 Hanv mhunnttalom, ‘Mhoje dis renvechea konna bhaxen mezunk zainant title astole,Ani hanv mhojea ghorantuch* mortolom.
19 Mhojim mullam udka meren posortolim,Ani mhoje khande rat-bhor dovan bhizlole astole.
20 Mhoji mhoima sodanch novi zait ravta,Ani mhojem boll unnem zaunchem na.’*
21 Lok mhojem utsuktaien aikotale,Vogi ravon mhojea solʼleachi vatt polloitale.
22 Hanv uloilea uprant tanchea lagim anik ulounk kainch asonaslem.
Barik pausa bhaxen mhojim utram tanchea kanar poddttalim.
23 Konnui pausachi vatt polloita tea toren, te mhoji vatt polloitale,Uprant poddtta tea pausachi* utsuktaien vatt polloita tea toren, te mhojea utranchi vatt polloitale.
24 Hanv hanson tanchea koddem polloitalom tednam tankam visvasuch zainaslo,Mhojem khuxal tondd polloun tankam dhir mellttalo.*
25 Tancho mukheli zalʼlea bhaxen hanv tankam margdorxon ditalom,Aplea soinikanchea zomeam modem ravta tea raza sarko,Ani dukhi aslolea lokank bhuzvonn dita tachea sarko, hanv tanchea modem ravtalom.
Footnotes
^ Utran utor, “mhunnʼnneamnim ulovop.”
^ Utran utor, “mhojea tornattponnachea disamnim.”
^ Vo “mhoje sogle sevok mhojea bhonvtonnim asle.”
^ Inglez bhaxent “butter.”
^ Utran utor, “polloitanch liptale.”
^ Vo “zacho bapui bhair poddla taka.”
^ Vo “mhozo hat naslolo kott.”
^ Vo “pogddi.”
^ Vo “tachim hanv daddam moddttalom.”
^ Utran utor, “ghontterantuch.”
^ Vo “Ani hanv mhojea hatant aslolea dhonuntlean bann marit ravtolom.”
^ Ho paus Abril mhoineachea modem suru zata. Mahiti B15 polloi.
^ Vo ghoddie, “Tankam lagon mhojea tondda voili khuxalkai unni zaunk na.”
