Job 22:1-30
22 Temanit Elifazan zobab diun mhunnttlem:
2 “Munis Devak upeogacho asa kai?
Kholaiechi somjikai aslolea munxacho Devak kitem tori faido zata kai?
3 Tum nitivont asa dekhun Sorvxoktivontak kitem tori forok poddttolo kai?*
Tum guneanva mekllo ravlo zalear taka koslo tori faido zatolo kai?
4 Tum Devachi bhirant dhorta zalear,To tuji zhoddtti kortolo kai, ani tuka khast laitolo kai?
5 Tujem noxtteponn bhorpur vaddlam,Ani tuje guneanv kabaruch zainant dekhun tuka oxem ghoddonk na kai?
6 Koslench karonn nastana, tum tujea bhavancheo vostu aplea lagim ghannak* dovrun gheta,Ani tum lokam koddlean tanche kopdde kaddun gheun tankam vinglle korun soddtta.
7 Tum thokloleank udok dina,Ani bhukeloleank jevonn dina.
8 Tujea oslea bollvont munxamnim zomnicher kobzo kela,Ani thoim tujea osle vhoddle-vhoddle lok ravtat.
9 Punn tunvem vidvank ritea hatamnim porot dhaddlim,Ani tunvem onathank* tras dile.*
10 Taka lagon tujea bhonvtonnim fas manddlole asat,Ani okosmat akant ieun tuka bhivoita.
11 Itlo kallokh zala ki tuka kainch disona,Buddttechem udok tuka buddoita.
12 Dev unch mollbar na kai?
Soglea noketrank polloi, tim khub unch nant kai?
13 Punn tum oxem mhunntta: ‘Devak kitem khobor asa?
Kupanchea datt kallkhantlean to neai korunk xokta kai?
14 Kupancho poddʼddo amkam tachea thaun lipoita,Mollbachea gol akaracher choltana to amkam pollounk xokona.’
15 Tum adlea kalla voilea tea rostear choltolo kai,Jea rostear noxtte lok cholot aileat,
16 Je lok tancho vell ieunchea poilinch meleat,Ani zanchi buniad buddttechea* udkak lagon vhanvon gelea?
17 Te khorea Devak mhunnttale: ‘Amchea thaun pois voch!’
Ani, ‘Sorvxoktivont Dev amkam kitem korunk xokta?’
18 Tori astana, toch tanchim ghoram borea vostumnim bhorta.
(Oslem noxttem chintop mhojea mona thaun khub pois asa.)
19 Nitivont lok hem polloitole ani khuxal zatole,Ani niropradi lok tancheo moskoreo kortole ani mhunnttole:
20 ‘Amchea virodheancho nas zala,Ani tanchem jem urlam tacho ujeant bhosm zaun voitolo.’
21 Taka lagon, Devak zannam zaun ghe ani tuka xanti mellttoli,Magir tujea sangata soglem borem zatolem.
22 Tachea tonddantlean bhair sorta to kaido manun ghe,Ani tachim utram tujea kallzant dovor.
23 Tum Sorvxoktivont Deva lagim porot ailo zalear, poilim bhaxen porot tuji udorgot zatoli.
Tunvem tujea tombuntlem onitivontponn kaddun uddoilem zalear,
24 Tunvem tujem bhangar dhulʼlint uddoilem zalear,Ani Ofirachem* bhangar khoddpanchea falkeant* uddoilem zalear,
25 Sorvxoktivont Dev tujea pasot bhangra bhaxen,Ani sogleant moladik chandi bhaxen zatolo.
26 Tednam Sorvxoktivont Devak lagon tum khuxal zatolo,Ani tum Deva mukhar tuji tokli voir kaddunk xoktolo.
27 Tum vinoti kortolo ani to tujem aikotolo,Ani tum tujeo angvonneo pallttolo.
28 Tum jem korunk tharaitolo tantunt tuka ies mellttolem,Ani tujea vattecher uzvadd porzollttolo.
29 Punn tum gorvan bhoron uloilo zalear tuzo opman zatolo,Karonn to khalteank salvar kortolo.
30 Niropradi asat tankam to vanchoitolo,Tor tuje hat nitoll asat zalear tum dubhav nastana vanchtolo.”
Footnotes
^ Vo “Sorvxoktivont khuxal zatolo kai?”
^ Mhunnche, poixe udar gheunk, te farik kori poriant gerentti mhunn dovortat ti vost.
^ Vo “Ani zancho bapui bhair poddla tankam tunvem.”
^ Utran utor, “hat moddle.”
^ Utran utor, “nhoim-chea.”
^ Ekdom borea dorjeachem bhangar mellttalo to zago.
^ Vo “wadint.”
