Job 2:1-13

  • Soitan Jobachea hetu vixim anik ek pavtt prosn ubarta (1-5)

  • Soitanak Jobachea kuddik hat lavunk porvangi melltta (6-8)

  • Jobache bailen mhunnttlem: “Devak xirap ghal ani mor!” (9, 10)

  • Jobache tin sangati ietat (11-13)

2  Uprant to dis ailo jednam khorea Devache put,* Jehova mukhar ieun ube ravle. Soitan* pasun tanchea sangata ieun Jehova mukhar ubo ravlo. 2  Uprant Jehovan Soitanak vicharlem: “Tum khoim thaun aila?” Soitanan Jehovak mhunnttlem: “Hanv prithumer hanga-thoim bhonvon ailam.” 3  Jehovan Soitanak mhunnttlem: “Mhozo sevok Jobacher tunvem dhean dilam? Prithumer tachea sarko konnuch na. To sarkem tem korpi ani guneanv naslolo* munis zaun asa. To Devachea bhirantin cholta ani vaittacho dves korta. Tunvem mhaka kainch karonn nastana tacho nas korunk* tachea add uksauncho proitn kelo, tori astana tannem aplem visvaxiponn soddun diunk na.” 4  Punn Soitanan Jehovak mhunnttlem: “Katik kat. Ek munis aplea jiva pasot soglem diunk xokta. 5  Punn atam tum tuzo hat ubar ani tachea haddank ani katik lai. Magir to tujea tonddar tuka xirap ghalta vo na tem polloi.” 6  Uprant Jehovan Soitanak mhunnttlem: “Polloi! To tujea hatant* asa! Fokot tum tacho jiv kaddinaka!” 7  Tednam Soitan Jehovachea mukhavoilo gelo. Ani tannem Jobak tachea tokle thaun paim-am poriant bhorpur dukhtat toslea foddamnim bhorlo. 8  Joban apleak khorpunk matiechea futtlolea aidonacho kuddko ghetlo ani to gobrant boson ravlo. 9  Xevottak tachea bailen taka mhunnttlem: “Tum azunui guneanva mekllo* ravonk sodhta? Devak xirap ghal ani mor!” 10  Joban tika mhunnttlem: “Tum ginean naslolea baile bhaxen uloita. Khorea Deva koddlean ami fokot borem asa tench manun gheunchem kai, vaitt asa tem manun gheunchem nhoi kai?” Hea soglea vostumnim Joban aplea vonttamnim patok korunk na. 11  Jobache tin sangati,* Temanitkar Elifaz, Shuaitkar Bildad ani Namathitkar Zofar, hannim tacher ailolea soglea odruxttam vixim aikolem tednam tanchea modlo dor eklo ap-aplea zagear thaun ailo. Tannim sangata mellon tachea lagim vochon taka kallji dakhounk ani taka bhuzvonn diunk tharailem. 12  Tannim taka pois thaun polloilo tednam te taka vollkhonk nant. Te mottʼttean roddonk lagle, tannim aple kopdde pinzle, ani varear dhulʼl uddoili ani ap-aplea mathear dhulʼl ghatli. 13  Te sat dis ani sat rati tachea sangata zomnir boson ravle. Konnuch tachea lagim ekui utor ulounk na, karonn tachi dukh khubuch chodd asa mhunn tannim polloilem.

Footnotes

^ Hebrev bhaxent devdutank suchit korta ti mhunnʼnni.
^ Xobdhkox polloi.
^ Mhunnche, purnn toren bhokti korpi. Inglez bhaxent “integrity.”
^ Utran utor, “taka gillun uddounk.”
^ Vo “tabeant.”
^ Mhunnche, purnn toren bhokti korpi. Inglez bhaxent “integrity.”
^ Vo “vollkhiche munis.”

Copyrights for this publication