Job 16:1-22
16 Joban zobab diun mhunnttlem:
2 “Adim hanvem osleo zaiteo vostu aikoleat.
Tumi sogle, mhoje tras vaddoitat tosle bhuzvonn diupi zaun asat!
3 Tumchim pokoll utram kednam tori somptolim kai?
Tumi mhojea lagim oxe kiteak uloitat?
4 Tumi mhojea zagear asle zalear,Hanv-ui osoch ulounk xoktalom.
Hanv tokli haloun-haloun,Tumchim fokannam korun, tumkam lamb bhaxonnam diunk xoktalom.
5 Punn hanv oxem korchom naslom, tachea bodlek hanv mhojea utramnim tumkam dhir ditolom aslom,Ani tumchem dukh unnem kortolom aslom.
6 Hanv uloilear mhojem dukh unnem zaina,Ani hanvem ulounchem bond kelear, mhoji dukh khoim unni zatoli?
7 Devan mhaka samko thokoila,Tannem mhojem ghorannem* kabar korun soddlam.
8 Tannem mhaka oxe ritin dhorlo ki mhoji kudd oskot zali,Ani mhoji poristhiti mhojea add govai dita.
9 Ragan bhoron tannem mhaka pinzun uddoila, ani tachea kallzant mhojea add dusmankai asa.
Mhaka polloun to aple dant korkoraita,Mhozo dusman mhaka krur nodren polloita.
10 Lok aplem tondd ugddun mhaka gillunk sodhtat,Mhojer thapttam marun mhozo opman kortat.
Vhoddlo zomo ektthaim korun mhaka gherav ghaltat.
11 Dev mhaka tornattea cheddeanchea tabeant dita,To mhaka noxtteanchea hatant dita.
12 Hanv susegad jietalom, punn tannem mhozo churo kelo.
Tannem mhojea golleak dhorlo ani mhaka mostilo,Ani uprant tannem mhojer aplo nixano lailo.
13 Tache bann marpi mhaka gherav ghalun asat,To mhoji matui kakut korina, to mhojea kiddnenk ar-par topta.
Ani mhojem pint zomnir votoita.
14 Xarachea durgacher akromonn kelʼlea bhaxen to mhojer akromonn korit asa,Eka zhuzarea bhaxen to mhojer akromonn korunk dhanvon ieta.
15 Mhojem ang dhampunk hanvem sak xinvon ghatla,Hanv itlo lachar zalam ki hanv dhulʼlint boslam.*
16 Roddon-roddon mhojem tondd tambddem zalam,Mhojea dolleanchea pateancher* kallkhachi* savlli posorlea.
17 Khorem mhunnttlear, hanvem kednanch konnank vaitt korunk na,Ani mhojem magnnem xudʼdh asa.
18 Prithume, mhojem rogot dhampinaka!
Ani mhojem roddnnem kednanch bond zaunk dinaka!
19 Atam pasun, mhozo govai diupi sorgar asa,Mhojea bazun uloupi voir bosla.
20 Mhoje sangati mhojeo moskoreo kortat,Ani hanv Deva mukhar dukam golloitam.*
21 Don munxam modem aslolo vad-vivad eklo suttavo korta toso,Konnem tori mhojea modem ani Deva modem aslolo vad-vivad suttavo korcho.
22 Karonn atam thoddinch vorsam urleant,Ani hanv beginuch tea vatter voitolom jea vatter thaun hanv porot ieunchom na.
