Job 39:1-30
39 “Dongravoileo bokddeo porank kednam zolmak haddtta tem tum zannam?
Horonn* aplea porank zolm ditana tunvem kednam-i polloilam?
2 Tim kitle mhoine gorbest astat tem tum mezta kai?
Tim porank kednam zolmak haddttat to vell tum zannam kai?
3 Porank zolm ditana tim bagovtat,Ani zolm dilea uprant tanche vollvolle somptat.
4 Tanchim poram uktea moidanar vaddttat ani ghott-mutt zatat,Uprant tim voitat, ani tanchea lagim porot ienant.
5 Ranvotti gaddvak konnem soddlem,Tacheo dorio konnem soddleo?
6 Hanvem oronnʼnneak tachem ghor kelem,Ani kharea zomnir taka ravonk zago dilo.
7 Xarant zaupi bovallachem taka kainch poddon vochonk na,Zonvarank kam korunk laitoleachi bob taka aikonk iena.
8 Tem dongrancher chorov mellonk bhonvot ravta,Ani hirvim zhaddam sodhit ravta.
9 Ranvotti boil tujea pasot kam korunk toiar zatolo kai?
To tujea gotteant* rat sartolo kai?
10 Tum taka dorien zotak bandun xet nagrunk xokta kai,Vo falkeantlea xetant zot ghalunk to tujea fattlean ietolo kai?
11 Taka bhorpur boll asta, tor tacher patieun,Tum tache koddlean zodd kam korun gheunk xokta kai?
12 To tujea xetantlem pik* ektthaim korun,Mollnnechea khollar* haddttolo mhunn tum tacher patietolo kai?
13 Xohamrugache* pakhotte khuxalkaien foddfoddttat,Punn tachea pakhotteanchi ani pakhanchi sor bokeachea pakhotteam sangata korunk zata kai?
14 Karonn tem tantiam ghalun, tim zomnir soddun voita,Ani tankam matientuch ub dita.
15 Konnancho-i paim poddon tim futtʼttolim,Vo ranvotti zonvar tim maddoitolim mhunn taka usko asona.
16 Aplim pilam aplim nhoich zalʼlea bhaxen tem tanchea sangata vaitt toren vagta,Tannem zo koxtt kela to funkott voitolo mhunn taka koslich bhirant asona.
17 Devan taka zannvai diunk na,Toxench taka somjikai pasun diunk na.
18 Punn tem aple pakhotte foddfoddaun dhanvta tednam,Tem ghoddeak ani tachea ghoddesvarak hansta.
19 Ghoddeank boll diupi tum kai?
Tachea maner aslole kens tunvem taka dileat kai?
20 Tum taka tollam bhaxen uddi mar mhunn sangonk xokta kai?
To nakantlean vhoddlo avaz korta tednam koddkoddo suttʼtta.
21 Falkeantlea moidanar to aplea fuddamnim zomin ustita ani khuxalkaien uddio marta,To nettan zhuzachea moidanar* dhanvta.
22 Bhirantik polloun to hansta, ani kiteakuch bhiena,Tolvar polloun to fatti sorona.
23 Begantle bann tache fattir dhaddvon khoddkhoddit avaz kortat,Bhalo ani bann chokchokta,
24 To umedin bhorta ani vegan dhanvonk lagta,Xingacho avaz aikolea uprant to thambonk xokona.*
25 Xingacho avaz ieta tednam to vhoddlean killonch marta,Poisulʼleanuch taka zhuzacho vas ieta.
Senapotincho ani zhuzareancho avaz tachea kanar poddtta.
26 Gid mollbar uddttaAni dokxinne vatten vochonk aple pakhotte posraita, tem tujea somjikaiek lagon kai?
27 Vo tujea hukuman ghonn voir uddtta kai,Ani aplo ghontter unchaier bandta kai,
28 Tujea hukuman apli rat voir khoddpar sarta kai,Ani khoddpachea tengxer aplo kilʼlo bandta kai?
29 Thoim thaun to jevonn sodhta,Apli nodor pois poriant pavoita.
30 Tachim pilam rogot pietat,Ani moddim astat thoim to asta.”
