Job 31:1-40
31 “Hanvem mhojea dolleam sangata korar kela,Tor hanv khoinchea-i ankvar cheddvak vaitt nodren koso pollounk xoktam?
2 Oxem kelear Deva koddlean mhaka koslo vantto mellttolo?
Voir aslolea Sorvxoktivont Deva koddlean koslem daiz mellttolem?
3 Chukichem kam kortoleacher odruxtt ieunchem na kai?
Ani vaitt kam kortoleacher tras ieunchenant kai?
4 Dev mhojeo vatto polloina kai?
Ani mhojim soglim panvlam mezna kai?
5 Hanvem kednam tori fott marlea kai?*
Hanvem kednam tori konnakui fosoila kai?
6 Devan mhaka sarke tagdden zokcho,Tednam hanv guneanv naslolom* mhunn taka kollon ietolem.
7 Mhoje paim sarkea vatte voile kednam-i koddsorleat zalear,Vo mhojea dolleamnim mhojea kallzak bhuloilam zalear,Vo mhoje hat vaitt kamam korun oxudʼdh zaleat zalear,
8 Hanvem vomplolem pik dusreamnim khaunchem,Ani hanvem lailam tem dusreamnim umttun kaddchem.*
9 Mhojem kalliz dusrea bailek bhulʼlam zalear,Ani xezareachea daracher hanv tichi vatt polloit ravlam zalear,
10 Mhoji bail dusrea dadlea pasot dano dollum,Ani dusrea dadleamnim tichea sangata kuddicho sombond dovrum.
11 Karonn hem lojechem kam,Ek oslo guneanv, zaka neai korpeam koddlean khast favo.
12 Tem* lasoun ani nas korun uddoita toslea ujea sarkem,Jem mhojem soglem pik mullam soit kabar korun uddoitolem* aslem.
13 Mhojea chakrak vo chakornik mhojea add kitem-i* asa zalear,Ani hanvem taka neai diunk na zalear,
14 Dev mhoji zhoddtti kortolo* tednam hanv kitem kortolom?
To mhojea koddlean hixob magtolo tednam hanv kitem zobab ditolom?
15 Mhaka kusveant toiar kela tannench tankam toiar korunk nant kai?
Ami zolmak ieunchea poilim* tannench amkam rochunk nant kai?
16 Hanvem goribachi itsa purnn korunk nakarlam zalear,Vo mhaka lagon vidvechea dolleant dukam aileant zalear,
17 Onathank dinastanaMhojea vantteachem jevonn hanv ekttoch jevlom zalear,
18 (Karonn tornattponnar thaun hanv mhojea sangata vaddlolea onatha* pasot ek bapui koso aslom,Ani mhojea bhurgeponnar* thaun hanv vidvank* modot korit aslom.)
19 Konnui kopdde nastana thondden morta to hanvem polloila zalear,Vo eka gorib munxa lagim pangrunk kainch na tem hanvem polloilam zalear,
20 Mhojea menddranchea vulan* taka ub melltta tednam,Tannem mhaka besanv diunk na zalear,
21 Xarachea darvonttea lagim mhojea modotichi goroz asli* tea onathak,Hanvem mutt dakhoun dhomkailo zalear,
22 Mhozo hat bhuzantlean bhair sorom,Ani kompra lagim moddom.
23 Karonn Deva thaun ieta tea odruxttachi mhaka bhirant asli,Ani tachea vorteponna mukhar hanv ubo ravonk xoklo na.
24 Hanvem mhozo visvas bhangracher dovorlo zalear,Vo ‘Tunch mhaka surokxa ditolem,’ oxem hanvem xudʼdh bhangrak mhunnttlem zalear,
25 Mhojea lagim aslolea girestkaiek lagon,Ani hanvem melloun ghetlolea moladik vostunk lagon, hanv gorvan fultam zalear,
26 Suria* porzolltta to hanvem polloilo zalear,Vo chondrimachi mhoima hanvem polloili zalear,
27 Ani mhojem kalliz guptim tanchea vatten vollʼllam zalear,Ani tanchi bhokti korunk hanvem mhojea haticho umo ghetlo zalear,
28 Ho ek guneanv zaun asa, zachi mhaka neai korpeam koddlean khast favo,Karonn hanvem khorea Devak nakarlolea bhaxen zalem.
29 Mhojea dusmanachem nisontton zalam tem polloun hanv kednam-i khuxal zalam kai?
Vo tancher vaitt ailam tednam hanv sontosbhorit zalam kai?
30 Tankam moronn ieum mhunn xirap diun,Hanvem kednanch mhojea tonddan patok korunk na.
31 Mhojea tombuntlea munxamnim oxem mhunnonk na kai,‘Jobachea ghora jevun* dhadoxi zaunk na, toslo munis sodhlear pasun mellchona.’
32 Khoincheach onvollkhi* munxak bhair rat sarunk poddonk na,Provas kortoleam pasot hanvem mhojea ghorachim daram sodanch uktim dovorlim.
33 Dusream munxam bhaxen hanvem kednam-i mhoje oprad dhampun dovorcho proitn kelo kai?
Hanvem mhoje guneanv mhojea kopddeachea bolsant lipoileat kai?
34 Sogleank kollʼllem zalear kitem zatolem,Vo dusrim opman kortolim mhunn bhieun,Hanv konnankuch kainch sangonastana ghorantuch vogi boson ravlom kai?
35 Konnem-i mhoje aikon ghetlolem zalear kitlem borem zaupachem!
Hanvem mhunnttlolem dor ek utor khorem asa mhunn, hanv soput gheun sangtolom aslom.*
Sorvxoktivont Devan mhaka zobab dium!
Mhozo virodh kortolean mhojer ghatlole sogle oprad boroun dilʼle zalear, kitlem borem zavpachem!
36 Hanv te mhojea khandar gheun bhonvtolom aslom,Ani te mhojea tokler ek mukutt koso ghaltolom aslom.
37 Hanv Devak mhojea dor eka panvlacho hixob ditolom aslom,Eka kunvra sarko dhiran tachea mukhar voitolom aslom.
38 Mhojea zomnin mhojea add bob marli zalear,Ani zot ghatlolea xetantleo sogleo volli ektthaim ieun roddleo zalear,
39 Hanvem tachi pikavoll farik korinastana khailea zalear,Vo hanvem tichea dhoniank tras dileat zalear,
40 Mhojea zomnir gonvachea bodlek kantte zaum,Ani zovachea* bodlek ghann marta toslem ranvotti tonn zaum.”
Jobachim utram hanga somptat.
Footnotes
^ Vo ghoddie, “Hanv kednam tori fotting munxam sangata cholʼlam kai?”
^ Mhunnche, purnn toren bhokti korpi. Inglez bhaxent “integrity.”
^ Vo “Ani mhojea sonstik umttun kaddchi.”
^ Mhunnche, pordvar.
^ Vo “mhojem soglem pik pasun umttun kaddttolem.”
^ Vo “kosli-i kes.”
^ Utran utor, “Dev uttʼttha.”
^ Utran utor, “Kusveant.”
^ Vo “vaddlolo tachea.”
^ Utran utor, “tika.”
^ Utran utor, “avoichea kusvea.”
^ Vo “lhonven.”
^ Vo ghoddie, “Xarachea darvonttear mhozo sangat diunk zaite zann asat mhunn polloun.”
^ Utran utor, “Uzvadd.”
^ Utran utor, “mas khaun.”
^ Vo “pordexi.”
^ Vo “mhunn, hi ghe mhoji sain.”
^ Inglez bhaxent taka “barley” mhunnttat.
