Job 5:1-27
5 “Matso ulo marun polloi! Konnui tuka zobab dita kai?
Devdutam* modem tum konnam lagim modot magtolo?
2 Karonn rag murkhak jivexim marun uddoita,Ani nattkai nennar munxacho jiv kaddtta.
3 Pallam ghetlolea zhadda bhaxen murkhachi udorgot zata ti hanvem polloilea,Punn okosmat tachea ravpachea zagear xirap poddtta.
4 Tachea putank kainch surokxa mellona,Ani xarachea darvontteacher tankam mostitat, tankam salvar korunk konnuch asona.
5 Tannem lunvlolem pik bhukelʼlo munis khata,To tem kantteam modlean pasun kaddun gheta,Tachea ani tachea bhurgeanchea soglea vostuncher kobzo korta.
6 Karonn sonkoxtt tor dhulʼlintlean upzona,Ani tras zomnintlean bhair soronant.
7 Uzo asa mhunnttoch kittʼtteo voir sortoleoch,Toxench, munis zolmola mhunnttoch tras tor ietolech.
8 Punn hanv zalear Deva lagim vinoti kortolom aslom,Ani tachea mukhar mhoji kes dovortolom aslom.
9 To vortim ani ami somzonk xokonant toslim kamam korta,Tachim ojapachim kamam mezunk zainant titlim asat.
10 To prithumer paus dhaddtta,Ani xetamnim udok ghalta.
11 Lhanvikank to voir kaddtta,Niraxi zaloleank to taronn dita.
12 Naddbudʼdhi kortoleancheo manddnneo to fiskottaun uddoita,Jea udexim tanchea hatanchea kamank ies mellona.
13 To zannvaiechea munxank tancheach naddbudʼdhen dhorta,Jea vorvim budvontancheo ievzonneo sufoll zainant.
14 Disachea uzvaddant tankam kallokh gherav ghalta,Ani donparchea vellar te rat zalʼlea bhaxen sanspotat.
15 To lokank tanchea jibechea dhare thaun salvar korta,To goribank bollixttanchea hatantlean soddoita.
16 Tor lhanvikank bhorvonso asa,Punn onitivontanchim tonddam bond keleant.
17 Polloi! Dev zaka sudhraita to munis khuxal,Tor Sorvxoktivont Dev dita ti xist nakarum naka!
18 Karonn to dukh dita, punn ghaveak pottʼtti pasun bandta,To marta, punn aplea hatamnim boro pasun korta.
19 To eka-fattlean-ek sov odruxttam thaun tuka vattaitolo.
Ani satvea thaun tuka kainch luksonn zaunchem na.
20 Bhuk poddtta tednam mornna thaun,Ani zhuz zata tednam tolvari thaun to tuka soddoitolo.
21 Chabka bhaxen martolea jibe thaun tuji rakhonn zatoli,Ani nisontton ieta tednam tuka bhirant dischina.
22 Nas ani bhukek tum hanstolo,Ani prithumechea ranvotti zonvarank tum bhieunchona.
23 Moidanantle fator tuka kainch vaitt korchenant,*Ani moidanantlim ranvotti zonvaram tujea sangata xantin ravtolim.
24 Tuzo tombu surokxit* asa mhunn tuka khatri astoli,Ani tujea chorvachea molleachi topasnni kortana kainch unnem na mhunn tum polloitolo.
25 Tuka khub bhurgim zatolim,Ani prithumer zata tea tonna sarki tuji sonsot vaddttoli.
26 Lunvnne vellar ektthaim kelʼlea konnsanchea bhorea sarko,Tum fonddant vocho poriant ghott astolo.
27 Polloi! Ami heo vostu topasleat, ani teo khoreo asat.
Taka lagon aik, ani teo manun ghe.”
