Job 13:1-28
13 “Hoi, hem soglem hanvem mhojea dolleamnim polloilam,Mhojea kanamnim aikon somzon ghetlam.
2 Tumi zannant titlem hanv-ui zannam,Hanv tumchea poros khoincheach vatten unnom na.
3 Karonn hanv zalear, Sorvxoktivont Deva lagim uloitolom,Tachea mukhar hanv mhoji bazu manddttolom.
4 Punn tumi fott uloun mhojem nanv piddʼddear kortat,Tumi sogle upeog naslole dotor zaun asat.
5 Tumi vogich ravlole zalear kitlem borem zaupachem,Tumkam zannvai asa mhunn dison ievpachi.
6 Upkar korun, hanv jem sangtam tem aikat,Ani hanv mhoji bazu manddttana dhean diat.
7 Devachea vatten tumi onʼneai-an uloitole kai,Ani tachea vatten tumi fosoita tea toren uloitole kai?
8 Tumi tachi bazu ghetole kai,Tumi khoro Dev sarko mhunn dakhouncho proitn kortole kai?
9 Devan tumchi porikxa keli zalear to khuxal zatolo kai?
Ek-na-ek dis morta toslea munxak fosoitat toxe tumi Devak fosounk xoktole kai?
10 Tumi guptim bhedbhav korcho proitn kelo zalear,Dubhav nastana to tumkam tapoitoloch.
11 Tachem vorteponn polloun tumi ghaborchimnant kai,Ani tachi bhirant tumcher posorchina kai?
12 Tumcheo zannvaiecheo mhunnʼnneo* gobra bhaxen kainch upeog nasloleo asat,Tumi manddttat teo bazu* matiechea ddhali bhaxen oskot asat.
13 Vogi ravat ani mhaka ulounk diat,Magir mhojem kitem zata tem zaum-di!
14 Hanvem mhojeruch moronn kiteak voddun haddchem,Hanvem mhozo jiv dokheant kiteak ghalcho?*
15 Ghoddie Dev mhaka jivexim marit, torui hanv tacher visvas dovortolom.
Hanv tachea mukhar mhoji bazu manddttolom.
16 Tednam Dev mhaka taronn ditolo,Karonn khoinchoch noxtto munis* Deva mukhar vochonk xokona.
17 Mhojim utram kan diun aik,Hanv uloita tacher dhean di.
18 Polloi, atam hanv mhoji kes zhogddonk toiar asam.
Mhoje vatten hanv sarkom asam mhunn hanv zannam.
19 Mhojea lagim vad-vivad konn kortolo?
Hanv vogi ravlom zalear hanv mortolom!*
20 Deva, hanv tuje koddem fokot don vostu magtam,*Jea udexim mhaka tujea thaun liponk poddchem na.
21 Tuzo zhodd hat mhoje thaun pois kadd.
Ani tujea bhirantek lagon mhaka ghabrunk dinaka.
22 Ek tor tum uloi ani hanv zobab ditolom,Vo mhaka uloum-di ani tum zobab di.
23 Hanvem kosle guneanv keleat ani koslim patkam keleant?
Mhozo oprad ani mhojem patok kitem, tem mhaka kolloi.
24 Tum mhojea thaun tujem tondd kiteak lipoita,Ani mhaka tuzo dusman mhunn kiteak lekhta?
25 Varear uddtta tea panak tum bhiouncho proitn kortolo kai,Vo tum sukea tonna fattlean dhanvcho proitn kortolo kai?
26 Mhojea add aslolo dor ek arop tum boroun dovorta,Ani mhojea tornattponnachea patkancho tum mhoje koddlean hixob gheta.
27 Tunvem mhoje paim lakddachea khoddeant* ghatleat,Hanv khoim voita tem tum bariksannen polloita,Ani mhojea dor eka panvlacher nodor dovorta.
28 Taka lagon, munis* eka kuslolea vostu sarko kusta,Kidd* laglolea kopddea sarko kabar zait voita.
Footnotes
^ Vo “Tumchim ugddas dovorpa sarkim utram.”
^ Utran utor, “Tumcheo ddhali.”
^ Utran utor, “Hanvem mhojem mas mhojea dantamnim kiteak dhorchem?”
^ Vo “Karonn jea munxan Devak soddla to.”
^ Vo ghoddie, “Konnui korunk xokta zalear, hanv vogi ravtolom ani mortolom.”
^ Utran utor, “Mhojea thaim fokot don vostu korinaka.”
^ Utran utor, “to,” ghoddie Jobak suchit korta.
^ Ho ek nas korta toslo kiddo zo fulpakhea sarko dista. Inglez bhaxent taka “moth” mhunnttat.
