Job 4:1-21
4 Tednam Temanit Elifazan Jobak zobab diun mhunnttlem:
2 “Konnem-i tuka kitem-i sangcho proitn kelo zalear tum bejar zatolo kai?
Karonn atam mhojean uloinastana ravonk zaina.
3 Hem khorem ki tunvem zaitea zannank sudhrailim,Ani oskotank ghottai dili.
4 Addkhollttoleank tujea utramnim bhuzvonn mellttali,Ani zancheo dimieo koddkoddttaleo tankam tum ghottai ditalo.
5 Punn tench tuka ghoddlem tednam tum cheplo,*Tujer sonkoxtt ietanch tum bhielo.
6 Tum Devachi bhirant dhorta zalear tum kiteak bhieta?
Tujem guneanva mekllem* jivit tuka bhorvonso dina kai?
7 Matxe chintun polloi: Khoincho-i niropradi munis kednam-i kabar zala kai?
Sarkem tem korta tea munxacho kednam-i nas zala kai?
8 Hanvem zalear hench polloilam, je vaittachem zot ghaltat*Ani tras vomptat, tankam tench mellttolem.
9 Devachea svasan tancho nas zata,Ani tacho rag choddlolean tanchem nisontton zata.
10 Xinv gorzota ani tornatto xinv gurgurta,Punn xoktivont xinvache pasun dant moddttat.
11 Xikar mellona zalʼlean xinv moron voita,Ani tachim poram hevtten-tevtten ximpoddttat.
12 Hanv ekttoch astana konnem tori mhaka ek khobor sangli,Ani tachem kuchkuchop mhojea kanar poddlem.
13 Ratchea vellar lok sust nhident astana, mhaka dorxonam dislim,Ani mhojim chintnam mhaka sotaunk laglim.
14 Hanv itlo bhielom,Ki mhojim haddam koddkoddonk laglim.
15 Ek savlli* mhojea tondda voilean geli,Ani bhirantin mhoji lonv ubi zali.
16 Ti eka zagear vochon ravli,Ti savlli konnachi tem hanv vollkhonk xoklom na.
Mhojea dolleam mukhar fokot ti savlli asli.
Soglem xant aslem tednam mhaka ek avaz aikonk ailo.
17 ‘Ek-na-ek dis morta to munis Deva poros chodd nitivont asonk xokta kai?
Ek munis tachea Rochnnara poros povitr asonk xokta kai?’
18 Polloi! Devak aplea sevokancher visvas na,Ani to aplea dutancheo* pasun chuki sodhun kaddtta.
19 Tor matiechea ghoramnim ravpeam vixim kitem!
Tanchi buniad tor fokot dhulʼl,Ani kiddea* bhaxen tankam sompeponnim mostunk zatat!
20 Sokall thaun sanz meren, ekach disa bhitor te kabar zaun voitat,Te sasnak nanch zatat, ani konnankuch kollona.
21 Dori soddlolea tombu sarke te asat,Te zannvai nastana mortat.
Footnotes
^ Utran utor, “tum thoklo.”
^ Mhunnche, purnn toren bhokti korpi. Inglez bhaxent “integrity.”
^ Vo “je vaitt korchi ievzonn kortat.”
^ Vo “Disona tosli xokti.” Xobdhkoxant “Ruʹach; Pneuʹma” polloi.
^ Vo “sondexkarancheo.”
^ Ho ek nas korta toslo kiddo zo fulpakhea sarko dista. Inglez bhaxent taka “moth” mhunnttat.
