Job 21:1-34
21 Joban zobab diun mhunnttlem:
2 “Hanv kitem sangonk sodhtam tem dhean diun aikat.
Itlench kelear pasun mhaka bhuzvonn mellttoli.
3 Hanv uloita astana mhojem aikon gheiat,Mhojem uloun zalea uprant, tumi mhojeo moskoreo korunk zatat.
4 Hanv mhojea trasam vixim eka munxak sangtam kai?
Hanvem oxem kelʼlem zalear mhojem pasiens kabar zaunchem naslem kai?
5 Mhaka polloiat ani ojap zaiat.
Tumchea tonddar tumcho hat dovrat.
6 Hanv tea vixim chintʼtam tednam hanv bejar zatam,Ani mhojea akʼkhe kuddik koddkoddo suttʼtta.
7 Noxtte lok zaito temp, zanntte zai poriant kiteak jietat,Ani te girest* kiteak zatat?
8 Tanchim bhurgim sodanch tanchea dolleam mukhar astat,Ani tankam apli sonsot pollounk melltta.
9 Tanchim ghoram surokxit astat, tankam koslich bhirant asona,Ani Dev tankam aplea danddean khast laina.
10 Tanche boil gaienk gorbest kortat,Tancheo gaio paddkuleank zolm ditat, eklecho-i gorbpat zaina.
11 Tanche chedde menddreanchea hindda bhaxen bhair khellttat,Ani tanchim bhurgim khuxalkaien uddio martat.
12 Tim ddofli* ani kinorechea* avazar gaitat,Ani basurechea* avazan sontosbhorit zatat.
13 Te* aple dis dhadosponnan sartat,Ani xantin* Fonddant* voitat.
14 Punn te khorea Devak mhunnttat, ‘Amchea thaun pois voch!
Amkam tujeo vatto zannam zaunk naka.
15 Ami tachi seva korunk, Sorvxoktivont Dev konn?
Tachea vixim zannam zaun amkam kitem faido?’
16 Punn tanchea svotachea girestkaiecher tankam tabo na mhunn hanv zannam.
Noxttea lokanchem chintop* mhojea thaun pois asa.
17 Noxtteancho divo kitle pavtti palvola?
Tancher kitle pavtti odruxtt ailam?
Devan ragan bhoron tancho kitle pavtti nas kela?
18 Varem tankam suklolea tonna bhaxen,Ani vadoll tankam bhatachea sali* bhaxen kednam tori uboun vhorta kai?
19 Eka munxachea guneanvak lagon Dev tachea putank khast laitolo,Punn Devan tea munxakui khast lavum, jea vorvim tannem chuk kelea mhunn taka kollon ietolem.
20 Taka aplem nisontton apleach dolleamnim pollounk mellom,Ani Sorvxoktivont Devachea ragacho pelo takach pieunk poddom.
21 Tachea jivitache mhoine unne kele zalear,Tachea uprant tachea putanchem kitem zatolem tem taka kiteak poddlam?
22 Devak konnui gineana vixim* xikounk xokta kai?
To tor vhoddlea-vhoddleancho pasun neai korta!
23 Ek oslo munis morta, zo jivan ekdom ghott-mutt aslo,Zaka kainch poddon vochonaslem ani zo dhadosponnan aplem jivit sartalo,
24 Tachim zangllam chorben bhorlolim aslim,Ani tachim haddam ghott aslim.
25 Punn ek oslo-i munis morta zo khub niraxi aslo,Taka aplea jivitant boreo vostu kednanch chakunk mellonk nant.
26 Te dogui dhulʼlint voitole,Ani tankam dogainkui kidde khaun uddoitole.
27 Polloi! Tumi kitem chintʼtat,Ani mhaka tras korunk jeo manddnneo kortat teo hanv sarkom zannam.
28 Karonn tumi mhunnttat, ‘Manadik munxachem ghor khoim asa,Ani noxtto munis ravtalo to tombu khoim asa?’
29 Tumi provas kortoleank kednam-i prosn korunk na kai?
Tannim jem polloilam tacher* dhean diat,
30 Tednam tumkam kollon ietolem ki noxtto munis odruxttantlean suttʼtta,Ani krodhachea disa to vanchta.
31 Tachi vagnnuk sarki na mhunn konn taka sangtolo,Ani tannem jem kelam tachem farikponn taka konn ditolo?
32 Taka fondda lagim vhortat tednam,Tachea dholicher nodor dovortole.
33 Falkeache* matieche gulle* taka godd lagtole,Tachea poilim mezunk zainant title lok fonddant gele toxe,Tachea uprantui akʼkhem munxakull fonddant voitolem.*
34 Tor tumi bexttech mhaka bhuzvonn kiteak ditat?
Tumchea zobabamnim fottim bogor anik kainch na!”
Footnotes
^ Vo “xoktivont.”
^ Hem ek hatamnim vazoitat toslem chambddeachem songitachem sadhon. Inglez bhaxent taka “tambourine” mhunnttat.
^ Hi ek vazoupachi vost jika gitara bhaxen tar astat, punn ticho akar gitara bhaxen na. Inglez bhaxent tika “harp” mhunnttat.
^ Inglez bhaxent taka “flute” mhunnttat.
^ Mhunnche, noxtte lok.
^ Vo “ekach khinnant,” mhunnche, tankam rokddench moronn ieta ani tankam koslich dukh sosunk poddona.
^ Vo “lokancho solʼlo; lokanchi manddnni.”
^ Vo “kunddea.”
^ Vo “konnui kitem tori.”
^ Utran utor, “tea khunnancher.”
^ Vo “Wadiche.”
^ Vo “dhepe.”
^ Utran utor, “Ani to aplea sangata soglea munxakullak voddun vhortolo.”
