Job 27:1-23
27 Joban aplem ulovop* chalu dovrun mhunnttlem:
2 “Mhaka neai diunk na tea Devachea jivacho soput gheun hanv sangtam,Mhojem jivit koddsannen bhorlam tea Sorvxoktivont Devachea jivacho soput gheun hanv sangtam,
3 Jea meren mhozo svas mhojea bhitor asa,Ani Devan ghatlolo svas mhojea naka puddamnim asa tea meren,
4 Mhojea vonttamnim hanv koslench onitivontponn ulounchom na,Ani mhojea jiber fosovpachem kainch aschem na.
5 Tumkam nitivont mhunnonk hanv chintunk pasun xokona,Moro poriant hanv guneanva mekllom ravtolom!
6 Hanv mhojem nitivontponn samballttolom ani tem kednanch soddun diunchom na,Hanv jivo asam tea meren mhojem kalliz mhaka guneanvkari mhunn tharaunchem na.*
7 Mhojea dusmanachi poristhiti noxttea sarki zaum,Ani mhojer akromonn kortoleanchi poristhiti onitivontponnan vagtoleam sarki zaum.
8 Karonn noxtteacho* nas zata, ani Dev tacho jiv kaddtta tednam,Taka koslo bhorvonso asa?
9 Tacher sonkoxtt ieta tednamDev tachem roddnnem aikotolo kai?
10 Vo oslo munis Sorvxoktivont Devak lagon khuxal zatolo kai?
To soglea vellar Devak ulo martolo kai?
11 Hanv tumkam Devache xokte vixim* xikoitolom,Sorvxoktivont Deva vixim hanv tumche koddlean kainch lipounchom na.
12 Polloi! Tumkam sogleank dorxonam mellʼlleant zalear,Tumchem ulovop itlem polkem kiteak asa?
13 Noxttea munxak Deva thaun hoch vantto melltta,Zulum kortoleank Sorvxoktivont Deva koddlean hench daiz melltta.
14 Taka zaite put zale zalear pasun, te tolvarin mortole,Ani tache sonstik goroz titlem jevonn mellchem na.
15 Tachea fattlean urtat te pidden mortole ani tankam purtole,Tancheo vidva tanchea pasot dukam gollouncheonant.
16 Tannim dhulʼli bhaxen chandichi ras ektthaim kelear pasun,Ani matiechea raxi bhaxen ekdom bore kopdde bhorun dovorlear pasun,
17 Hoi, tea noxttea munxan te ektthaim kelear pasun,Te kopdde nitivont munis ghaltolo,Ani ti chandi niropradi munis vanttun ghetolo.
18 To bandta tem ghor eka kiddeachea* ghora sarkem,Eka rakhonndaran bandlolea khompi sarkem, oskot asa.
19 Nhidtana to girest astolo, punn tachi girestkai urchina,*To dolle ugoddtta tednam tachea lagim kainch aschem na.
20 Buddtte bhaxen tacher akant ietolo,Ratchea vellar taka vadoll gheun voitolem.
21 Udentechem varem taka uboun vhortolem ani to nanch zatolo,Tem taka tachea zagea voilem zhaddun uddoitolem.
22 To pollon vochonk apleachean zata titlo proitn kortolo,Punn kakut korinastana tem varem tacher ietolem.
23 Tachi poristhiti polloun varem talleo martaAni tachim fokannam korun fivnneo* marta.*
Footnotes
^ Utran utor, “mhunnʼnneamnim ulovop.”
^ Vo “mhaka tomnne marchem na.”
^ Vo “Devak soddun voitolea munxacho.”
^ Vo ghoddie, “Devachea hatan.”
^ Ho ek nas korta toslo kiddo zo fulpakhea sarko dista. Inglez bhaxent taka “moth” mhunnttat.
^ Utran utor, “punn to kainch ektthaim korchona.”
^ Inglez bhaxent taka “whistle” mhunnttat.
^ Vo ghoddie, “Tachi poristhiti polloun te talleo martat ani tachim fokannam korun fivnneo martat.”
