Job 42:1-17
42 Uprant, Joban Jehovak zobab diun mhunnttlem:
2 “Tum soglem korunk xokta mhunn atam mhaka kollon ailam,Ani tujea monant ieta tem tum korunk xokona oxem kainch na.
3 Tunvem mhunnttlem, ‘Ginean nastana mhojea solʼleacher poddʼddo ghalta to ho konn?’
Khorench, hanv somjikai nastana uloilom,Samkea ojapachea vostum vixim uloilom, jea vostum vixim mhaka khoboruch nasli!
4 Tunvem mhunnttlem, ‘Upkar korun aik, ani hanv uloitolom,Hanv tuka prosn vichartolom, ani tum mhaka zobab di.’
5 Hanvem tujea vixim mhojea kanamnim aikolʼlem,Punn atam hanv tuka mhojea dolleamnim polloitam.
6 Taka lagon, hanv mhojim utram porot ghetam,Ani dhulʼlint ani gobrant boson poschatap kortam.”
7 Jehovachem Joba lagim uloun zalea uprant, Jehovan Temanit Elifazak mhunnttlem:
“Tujea add ani tujea donui sangateam add mhozo rag samko pettla, karonn mhozo sevok Joba bhaxen tumi mhojea vixim sot ulounk nant.
8 Atam sat boil ani sat menddre gheun, mhozo sevok Joba lagim vochat ani tumchea pasot hulpailʼli bhett bhettoiat. Ani mhozo sevok Job tumchea pasot magnnem kortolo. Tumi mhozo sevok Joba bhaxen sot ulounk nant, tori astana hanv tachi vinoti manun ghetolonch ani tumkam tumchea murkhponnachi khast diunchom na.”
9 Tor Temanit Elifazan, Shuaitkar Bildadan ani Namathit Zofaran vochon Jehovan sanglolem toxench kelem. Ani Jehovan Jobachem magnnem manun ghetlem.
10 Joban aplea sangateam pasot magnnem kelea uprant, Jehovan Jobacher ailolem sonkoxtt kaddlem ani tachi girestkai taka porot dili.* Tache koddem poilem jem aslem, tachea poros Jehovan taka dobradan dilem.
11 Tachim soglim bhav-bhoinnam ani tachim soglim poilinchim ixttam taka mellonk ailim ani tim tachea ghorant jevlim. Jehovan tacher ieunk dilolea sonkoxttak lagon Jobak jem dukh bhogchem poddlem tem tannim somzon ghetlem ani taka bhuzvonn dili. Dor eklean taka ek chandicho kuddko ani ek bhangrachi mudi dili.
12 Tor Jehovan Jobak poilim poros, tachea jivitachea xevottak chodd besanvam dilim. Joba lagim 14,000 menddram, 6,000 untt, gorvancheo 1,000 zoddi ani 1,000 gaddvam zalim.
13 Jobak anik sat put, ani anik tin dhuvo pasun zolmoleo.
14 Tannem poile dhuvechem nanv Jemima, dusreachem Kezia, ani tisre dhuvechem nanv Keren-hapuk mhunn dovorlem.
15 Akʼkhea desant Jobachea dhuvam itlim sobit cheddvam anik khoinch naslim. Joban aplea putam sangata aplea dhuvank pasun daizacho vantto dilo.
16 Tea uprant Job anik 140 vorsam jielo, ani tannem aplea bhurgeank, natrank ani pontturank polloilim. Tannem sogleo mellon char pillgeo polloileo.
17 Xevottak, lamb ani dhadosponnachem jivit* jielea uprant Job melo.
