Job 15:1-35
15 Tednam Temanit Elifazan zobab diun mhunnttlem:
2 “Ek zannvaiecho munis polke vad-vivad kortolo kai?
Vo udentechea varean aplem pott bhortolo kai?*
3 Fokot utramninch sudhravop upeogachem asona,Ani bexttench ulovop faideachem asona.
4 Karonn tuka lagon, lokank asloli Devachi bhirant unni zalea,Tuka lagon, Deva vixim niallop tannim bond kelam.
5 Tuzo guneanv tuka oxem ulounk xikoita,Ani tum fosoita toslea munxa bhaxen uloita.
6 Tujench tondd tuka guneanvkari tharaita, hanv nhoi.
Tujech vontt tujea add govai ditat.
7 Munxam modem tum sogleant poilo zolmolʼlo kai?
Vo tuzo zolm dongram poilim zalʼlo kai?
8 Dev guptim korta teo ievzonneo tum aikota kai?
Sogli zannvai tukach asa kai?
9 Tum oxem kitem zannam jem ami nokllo?
Tuka oxi kosli somzonni asa, ji amkam na?
10 Amchea modem piklolea kensanche ani pirai zalʼle lok asat,Te tujea bapai poros vhoddle asat.
11 Dev dita ti bhuzvonn tuka puro nhoi kai,Vo tujea lagim mogan uloilʼlim utram tuka puro nhoi kai?
12 Tum tujeach bhavnamnim vhanvon kiteak voita,*Ani tuje dolle ragan tambddech kiteak zatat?
13 Tum Devacho virodh korta,Taka lagon tum tujea tonddantlean oslim utram bhair kaddtta.
14 Ek-na-ek dis morta to munis, xudʼdh koso asonk xokta?
Vo eke bailek zolmota to munis, nitivont koso asonk xokta?
15 Polloi! Devak aplea dutancher* visvas na,Sorg pasun tachea nodren povitr na.
16 Tor, eka vitt haddtta toslea ani broxtt munxa vixim kitem sangchem,To udok pieta titlea sompea ritin onitivontponnachim kamam pieun uddoita!
17 Aik, hanv tuka sangtam!
Hanvem kitem polloilam tem hanv tuka sangtam.
18 Hanv tuka teo vostu sangtam jeo zannvaiechea munxamnim aplea purvozam koddlean aikolʼleo.
Tannim teo vostu lipounk nant.
19 Tancho des fokot tanchea purvozank dilʼlo,Khoinchoch onvollkhi munis thoim thaun pasar zaunk na.
20 Ek noxtto munis jivitbhor tollmollot ravta,Tea krur munxachea jivitantlim soglim vorsam koxttan bhorlolim astat.
21 Bhirankull avaz tachea kanant vazot ravtat,Xantichea vellar pasun luttpi tacher akromonn kortat.
22 To kallkhantlo vanchon urtolo oxem taka disona,To tolvarin mortolo.
23 To hevtten-tevtten jevonn* sodhit bhonvta, ani oxem vicharta, tem khoim asa?
Kallkhacho dis lagim asa mhunn to zannam.
24 Dukh ani usko taka sotait ravta,Akromonn korunk toiar ravlolea raza bhaxen heo donui vostu tacher ietat.
25 Karonn to Deva add aplo hat ubarta,Sorvxoktivont Deva lagim zhogddonk fuddem sorta.*
26 To hottʼttiponnan apli bollixtt ddhal gheun,Tachea add voita.
27 Tachem tondd chorben bhorlam,*Ani tachem bhendd chorben mottem zalam.
28 Nas zauncho asa tea xaramnim to ravta,Konnuch ravona tea ghoramnim to ravta,Tim beginuch fatranchi ras zatolim.
29 To girest zaunchona, ani girestkai ektthaim korunk pavchona.
Toxench tachea lagim asloleo vostu desant posorcheo nant.
30 To kallkha thaun vanchon urcho na,Ujeachea agtteak lagon tacho khando zollon* voitolo,Devachea* tonddantlea ek vhoddlea funken to nanch zatolo.
31 Tannem upeog naslolea vostuncher visvas dovrun apleakuch fosouncho nhoi,Karonn tachea bodlek taka upeog nasloleo vostuch mellttoleo.
32 Tacho dis ieunchea poilim hem soglem ghoddttolem,Tache khande kednanch vaddchenant.
33 To drakxanchea oslea vali sarko zatolo zachim drakxam pikchea poilinch zhoddttat.
To zoitunachea oslea zhadda sarko zatolo zachim fulam zhoddttat.
34 Noxttea lokanchi* zomat vaddchina,Ani lonch ghetoleanche tombu ujeant bhosm zaun voitole.
35 Te aplo kusvo vaittan bhortat ani vaittak zolm ditat,Toxench, tancho kusvo fosounnek zolmak haddtta.”
Footnotes
^ Vo “Vo aplem kalliz chukichea chintnamnim bhortolo kai?”
^ Vo “Tujem kalliz itlem hottʼtti kiteak zalam?”
^ Utran utor, “povitr zannancher.”
^ Utran utor, “unddo.”
^ Vo “Deva koddem jikhpacho proitn korta.”
^ Vo “To gorvan fugla.”
^ Mhunnche, vanchon urcho kainch bhorvonso aschona.
^ Utran utor, “Tachea.”
^ Vo “Devak soddun gelʼlea lokanchi.”
