Job 36:1-33
36 Elihun fuddem mhunnttlem:
2 “Anik thoddo vell pasiens dhor ani hanv sangtam tem aik,Karonn Devachea vatten mhaka anikui ulounchem asa.
3 Hanv jem zannam tem soglem hanv sangtolom,Ani mhozo Rochnnar* kitlo nitivont asa tem hanv ukteponnim sangtolom.
4 Hanv khorench sangtam, hanv fott uloina,Zachea lagim soglem ginean asa, to tujea mukhar asa.
5 Khorench, Dev xoktivont ani to konnankuch nakarna.
Taka somzon ghevpachi vorti xokti asa.
6 To noxtteachea jivachi rakhonn korchona,Punn koxtt-dukh sostoleank to neai dita.
7 To nitivont lokam voili apli nodor kaddina,To tankam razam sangata* xinvasonar bosoita ani tankam sodankal voir kaddtta.
8 Punn tankam sanklleamnim bandlole asat zalear,Ani koxtt-dukhachea doriemnim dhorlole asat zalear,
9 Tannim kitem kelam tem to tankam dakhoun dita,Tannim gorvan kelʼle oprad to tankam kolloita.
10 Nittaier haddunk to tanche kan ugoddtta,Ani to tankam chukichi vatt soddun diunk sangta.
11 Tannim tachem aikon tachi seva keli zalear,Te khuxalkaien aple dis sartole,Ani dhadosponnan aplem jivit jietole.
12 Punn te aikonant zalear, te tolvarin* mortole,Ani ginean melloun ghenastananch te mortole.
13 Noxtte* kallzant rag dhorun ravtat,Dev tankam bandun dovorta, punn te modoti pasot ulo marinant.
14 Te mondirantlea xindollki korpi dadleam sangata jivit sartat,*Ani tornattponnaruch mortat.
15 Dev* koxtt-dukh sostoleank tanchea trasantlean vanchoita,Tim zulum sostat tednam, aplem aikonchem mhunn to tanche kan ugoddtta.
16 Akantachea chopkeantlo voddun,To tuka eka uktea zagear vhorta, zoim kosleoch addkholleo nant,Ani tuka bhuzvonn diunk, tujea mezar borem-borem jevonn manddtta.
17 Noxtteanchi zhoddtti zalea tem polloun tuka dhadosponn mellttolem,Neai kela ani tankam khast dilea tem polloun tuka dhadosponn mellttolem.
18 Punn ragan bhoron vaitt toren vagona zaunk* tum samballun rav.
Bhorpur lonch mellʼlli mhunn chukichea vatten vochonaka.
19 Tunvem modoti pasot kitlo-i ulo marlo,Vo kitlo-i vavr kelear pasun tum sonkoxttantlean salvar zatolo kai?
20 Tum rati pasot axeum naka,Jednam lok ap-aplea zagear thaun nanch zata.
21 Vaitt kamam korina zaunk samballun rav,Koxtt-dukh soschea bodlek vaitt kamam korunk vinchun kaddinaka.
22 Polloi! Dev khub xoktivont asa,Tachea oslo xikoupi anik konnui asa kai?
23 Konnem-i taka vatt dakhoilea* kai?
Vo ‘Tunvem kelam tem chukichem,’ oxem konnem-i taka mhunnttlam kai?
24 Tachea kamachi vhoddvik korunk visornaka,Zachea vixim lokamnim gitam gaileant.
25 Akʼkhea munxakullan tachim kamam polloileant,Ek-na-ek dis morta to munis pois thaun tim polloita.
26 Hoi, ami chintʼtat tachea poros Dev khub vorto,To kitlea vorsam thaun asa hem konnuch mezunk pasun xokona.*
27 To udkachea thembeanchi vaf korun voir voddun gheta,Tea vafecho dov ani pausachim kupam toiar zatat.
28 Uprant tea kupantlean paus poddtta,To paus akʼkhea munxakullacher poddtta.
29 Kupam koxim posortat,Ani Devachea tombu thaun goddgodd koso marta, tem konnui somzonk xokta kai?
30 To koxe toren mollbar zoglam* marum-xim korta,Ani khol doriak* koso dhampta tem polloi.
31 Hancheach vorvim to lokank posta,*To tankam bhorpur jevonn dita.
32 To zoglank aplea hatamnim dhampta,Ani apleak zai thoim, zoglank mar mhunn adnea dita.
33 Goddgodd tachea iennea vixim sangta,Gorvam-menddram pasun konn* ieta tem sangtat.
Footnotes
^ Vo “Ani zannem mhaka kela to.”
^ Vo ghoddie, “To razank.”
^ Vo “hotʼtearan.”
^ Vo “Devak soddun geleat te.”
^ Vo ghoddie, “sangata aplem jivit kabar kortat.”
^ Utran utor, “To.”
^ Vo “Punn tum talleo marun-marun tachim fokannam korina zaunk.”
^ Vo ghoddie, “Konnem tori tachea vagnnukent khodd kaddlea; Konnem tori tachea vagnnukek lagon hixob magla.”
^ Vo “konnanchean sodhun kaddunk pasun zaina.”
^ Utran utor, “uzvadd.”
^ Utran utor, “doriachim mullam.”
^ Vo ghoddie, “to lokanchea vatten vinoti korta.”
^ Vo ghoddie, “Kitem.”
