Job 18:1-21
18 Shuaitkar Bildadan zobab diun mhunnttlem:
2 “Tum kednam meren uloit ravtolo?
Matxi tori somjikai dakhoi, jea udexim amkam ulounk mellttolem.
3 Tum amkam zonvaram sarke kiteak lekhta,Ani amkam murkh* kiteak somzota?
4 Tunvem ragan tujech kuddkean-kuddke kele zalear pasun,Tuka lagon prithum osadd poddttoli kai,Vo khoddop tachea zagea voilem kuxin sortolem kai?
5 Hoi, noxtteacho uzvadd palvotolo,Ani tachem ujeachem agttem palvotolem.
6 Tachea tombuntlo uzvadd kallkhant bodoltolo,Tachea ghoracho divo palvotolo.
7 Taka cholonk anik xokti aschina,Tacheo svotacheo ievzonneo taka trasant uddoitoleo.
8 Karonn tache paim manddlolea zallachea vatten voitole,Ani choltana to tantunt xirkotolo.
9 Tacho paim fasak xirkon urtolo,Ani to zallak sampoddttolo.
10 Tachea pasot zomnir ek dori lipoilea,Ani tachea vatter ek fas manddla.
11 Soglea vatten tacher bhirant posorlea,Ti tachea fattik laglea.
12 Tachem boll sovkas-sovkas korun na zaun voita,Ani odruxttak lagon tache paim loktat.*
13 Tachi kat kuson voita,Ek bhirankull duens tache hat ani paim khaun uddoita.
14 To surokxit ravtalo tea tombuntlo kaddun,Taka akantachea raza* lagim vhortat.
15 Onvollkhi* tachea tombumnim ravtole,Tachea ghoracher zolltta tosle fator* posortole.
16 Sokol tachim mullam sukon voitolim,Ani voir tache khande bavon voitole.
17 Prithumer tacho ugddas anik urchona,Ani rosteacher tachem nanv konnank khobor aschem na.*
18 Taka uzvaddantlean kallkhant uddoitole,Ani borem pik zata tea desantlo* taka dhanvddaun ghaltole.
19 Tachea lokam modem, tachi sonsot ani tachi pillgi aschina,Ani to ravta thoim,* tachi vonxavoll fuddem vhoronk konnuch aschona.
20 Tacho nas zatolo tea disa, Ostomeche lok thottakun polloitole,Ani Udenteche lok bhirantin koddkoddttole.
21 Vaitt korta tachea tombunchi,Ani Devak vollkhona tachea zageachi oxich poristhiti zata.”
Footnotes
^ Vo ghoddie, “oxudʼdh.”
^ Vo “lagon to longoddtta.”
^ Vo “Taka bhirankull mornna.”
^ Utran utor, “Jem tachem nhoi tem.”
^ Vo “ghoracher gondhok.” Inglez bhaxent “sulfur.”
^ Utran utor, “rosteacher taka nanv aschem na.”
^ Vo “Ani sonvsarantlo.”
^ Vo “to thoddeach vella pasot ravta tea zagear.”
