Job 6:1-30

  • Jobacho zobab (1-30)

    • To chintinastana uloilo tem sarkem oxem mhunntta (2-6)

    • Taka bhuzvonn diupi ghatki zaun asat (15-18)

    • “Promannik utram dukhoinant!” (25)

6  Uprant Joban zobab diun mhunnttlem:  2  “Zor konnem-i mhojem dukh mezun polloilem,Ani mhojem odruxtt tagddent ghalun zokhlem!  3  Zalear tanchem vozon doriantlea renve poros zodd astolem. Dekhun hanv chintinastana* uloilam.  4  Sorvxoktivont Devache bann mhojea bhitor khol rombleat,Tanchem vik mhojea soglea kuddik posrot asa. Deva thaun ietat tim sonkoxttam mhojer akromonn korunk mhojea add ubim asat.  5  Ranvotti gaddvak tonn mellʼllem zalear tem roddttolem kai,Vo boilak khaunk tonn mellʼllem zalear to hambetolo kai?  6  Ruch naslolem jevonn mitt ghalinastana konn jevtolo,Vo svad naslolea lhan zhaddacho ros konn ruchin pietolo?  7  Oslea vostunk hanv hat pasun lavunk sodhina. Teo* mhaka piddʼddear zalʼlea jevnna bhaxen asat.  8  Devan mhoji vinoti manun ghetloli,Ani mhoji itsa purnn keloli zalear kitlem borem zaupachem!  9  Devan mhaka mostun uddoilʼlo,Ani aplo hat ubarun marun uddoilʼlo zalear kitlem borem zaupachem! 10  Karonn oxem zalear mhaka bhuzvonn mellttoli asli,Mhaka kitli-i dukh sosunk poddom, hanv khuxalkaien moronn apnnaitolom aslom,Karonn Povitr Devachim utram hanvem kednanch nakarunk na. 11  Anik vatt polloupachi xokti hanv khoim thaun haddum? Atam jieunk mhojea pasot anik kitem urlam? 12  Hanv khoddpa itlo ghott asam kai? Vo mhoji kudd tambeachi kelea kai? 13  Mhozo soglo adar kaddun uddoilʼlo astana,Hanv mhojich modot korunk xoktam kai? 14  Zo konn aplea sangateak visvaxi mog dakhoina,Taka Sorvxoktivont Devachi bhirant khoim astoli! 15  Mhoje svotache bhav thonddechea disamnim vhanvta tea vhalla bhaxen ghatki asat,Thonddechea disamnim suktat tea vhallam bhaxen te asat. 16  Pigolltta tea jhelak lagon,Ani pigolltta tea borfak lagon te vhall khodoll zaleat. 17  Punn vell voita toso te suktat ani nanch zaun voitat,Gormi vaddlea uprant te sukon voitat. 18  Te voltam gheit vhanvtat,Te vhanvot-vhanvot oronnʼnneant vochon nanch zatat. 19  Temache veapari* provas kortana tankam sodhtat. Sheba thaun ailole provasi* tanchi vatt polloitat. 20  Tancher visvas dovrun tankam loz zalea,Thoim ieun te fokot niraxi zaleat. 21  Tumi-i mhojea sangata oxech vagleat,Mhojer ailolem bhirankull sonkoxtt polloun tumi bhieleat. 22  “Mhaka ek dennem di,” oxem hanvem mhunnttlam kai? Vo tumchea girestkaientlean mhaka kitem tori di mhunn hanvem tumche koddem vinoti kelea kai? 23  Tumi eka dusmana thaun mhoji rakhonn korchi,Vo mhojer zulum korpea thaun mhaka soddouncho mhunn hanvem tumche lagim maglam kai? 24  Hanvem kitem kelam tem mhaka sangat ani hanv vogi ravon tumchem aikotolom. Mhoji chuk somzonk mhaka modot korat. 25  Promannik utram dukhoinant! Punn tumi mhaka sudhraitat tacho kitem faido? 26  Tumi mhaka utramnim dhorunk sodhtat kai? Dukhi munis khub uloun voita, punn varem tem soglem uboun vhorta. 27  Tumi zalear eka onathacher pasun sorti ghaltole,Ani tumchea ixttak vikunk* pasun fatti sorchenant! 28  Atam matxe vollon mhaka polloiat,Karonn hanv tumkam fott sangchom na. 29  Upkar korun porot ek pavtt chintat, mhaka bexttoch guneanvkari tharainakat. Hoi, porot ek pavtt chintat, karonn hanv azunui nitivont asam. 30  Hanv kitem-i chukichem uloitam kai? Hanv kitem-i chukichem uloilʼlom zalear mhaka* kollchem naslem kai?

Footnotes

^ Vo “kaiche-kai.”
^ Hanga ghoddie Jobachea sonkoxttam vixim vo tachea sangateamnim dilʼlea solʼlea vixim sanglam.
^ Poslolim zonvaram gheun bhonvpi veapari. Inglez bhaxent “caravans.”
^ Vo “Sebache provasi.”
^ Vo “kiteachea-i bodlek diunk.”
^ Vo “mhoje jibek.”

Copyrights for this publication