Job 23:1-17
23 Tednam Joban zobab diun mhunnttlem:
2 “Aiz pasun hanv vogi ravchom na, hanv komplein korit ravtolom.
Haskar-suskar soddun mhojem soglem boll somplam.
3 Dev khoim mellttolo tem hanv zannam aslom zalear kitlem borem zaupachem!
To ravta tea zagear hanv voitolom aslom.
4 Hanv mhoji kes tachea mukhar dovortolom aslom,Ani sogle purave diun mhoji bazu manddttolom aslom.
5 To mhaka koso zobab dita tem hanv aikotolom aslom,Ani to mhaka sangta tacher hanv dhean ditolom aslom.
6 To apli vorti xokti uzar korun mhojea lagim zhogoddttolo kai?
Na, dubhav nastana to mhojem aikotolo.
7 Thoim promannik munis tachea mukhar apli kes uloun suttavi korunk xoktolo aslo,Ani mhozo Neai Korpi sasna pasot mhaka niropradi mhunn tharaitolo aslo.
8 Punn hanv udentek gelear, to thoim na,Ani hanv ostomek gelearui, to mhaka mellona.
9 To utʼtorek kam korta tednam hanv taka pollounk xokona,Uprant to dokxinnek voita, punn tednam pasun to mhaka disona.
10 Punn hanv khoinchea vatter choltam tem to zannam.
Tannem mhoji porikxa kelea uprant, hanv xudʼdh bhangra porim bhair sortolom.
11 Hanv tachea panvlancher-panvl dovrun cholʼlam,Uzvean vo davean vollonastana hanv tache vatten cholʼlam.
12 Tachea tonddantlean bhair sorloli adnea hanvem kednanch moddunk na.
Tannem mhojea koddlean opekxa kelʼli tachea poros chodd, hanvem tachim utram moladik mhunn lekhlim.
13 Tannem nichov kela zalear konn taka addaunk xokta?
To kitem tori korunk sodhta tednam, to tem kelea bogor ravona.
14 Mhoje vixim jem korunk tannem nichov kela tem to kortoloch,Ani oxeo zaiteo vostu asat, jeo tannem chintun dovorleat.
15 Taka lagon, hanv ekdom uskean bhorlam,Hanv tachea vixim chintʼtam tednam, mhoji bhirant vaddtta.
16 Devan mhoji sogli takot kaddun ghetlea,Ani Sorvxoktivont Devan mhaka bhivoila.
17 Kallkhan mhaka gherav ghatla, ani kallea-kitt kallkhan mhojem tondd dhamplam,Tori astana, hanv vogi ravchom na.
