Job 1:1-22
1 Uz nanvachea desant ek munis ravtalo. Tachem nanv Job* aslem. To sarkem tem kortalo ani guneanv naslolo* munis aslo. To Devachea bhirantin choltalo ani vaittacho dves kortalo.
2 Taka sat put ani tin dhuvo asleo.
3 Tache lagim 7,000 menddram, 3,000 untt, 1,000 gorvam* ani 500 gaddvam aslim. Tachea lagim zaitim chakram pasun aslim. Taka lagon, udentek ravtolea lokam modem to ek vhodd munis aslo.
4 Jobache sogle put tharailʼlea disa aplea* ghorant jevonn dovortale, ani aplea tinui bhoinnank aplea sangata khaunk-pieunk apoitale.
5 Tanchea sogleanchea ghora jevnnam zalea uprant, Job tankam xudʼdh korunk aplea koddem apoun haddttalo. Uprant, to sokallim fuddem utthon tanchea modlea dor eklea pasot hulpailʼleo bhetto bhettoitalo. Job sodanch oxem kortalo. Karonn to mhunnttalo: “Ghoddie mhojea bhurgeamnim patok kelam zait ani aplea kallzant tim Deva vixim vaitt uloileant zait.”*
6 Atam to dis ailo jednam khorea Devache put,* Jehova* mukhar ieun ube ravle. Soitan* pasun tanchea sangata ailo.
7 Uprant Jehovan Soitanak vicharlem: “Tum khoim thaun aila?” Soitanan Jehovak mhunnttlem: “Hanv prithumer hanga-thoim bhonvon ailam.”
8 Jehovan Soitanak mhunnttlem: “Mhozo sevok Jobacher tunvem dhean dilam? Prithumer tachea sarko konnuch na. To sarkem tem korpi ani guneanv naslolo* munis zaun asa. To Devachea bhirantin cholta ani vaittacho dves korta.”
9 Tednam Soitanan Jehovak mhunnttlem: “Job bexttoch tujea bhirantin cholta kai?
10 Tunvem taka, tachea ghorak, ani tachea lagim asloleo sogleo vostu surokxit dovrunk tanchea bhonvtonnim ek voim ghalunk na kai? Tunvem tachea soglea kamacher besanv ghatlam, ani tachim gorvam-menddram itlim zaleant ki tim akʼkhea desant posorleant.
11 Punn atam tum tuzo hat ubar ani tachea lagim asa tem soglem kaddun ghe. Magir to tujea tonddar, tuka xirap ghalta vo na tem polloi.”
12 Uprant Jehovan Soitanak mhunnttlem: “Polloi! Tachea lagim asa tem soglem tujea hatant* asa. Tuka zai toxem kor, punn taka mat hat lainaka!” Tednam Soitan Jehovachea mukhavoilo gelo.
13 Atam, jea disa Jobache sogle put ani dhuvo aplea sogleant vhoddlea bhavachea ghorant jevtalim ani drakxancho soro pietalim,
14 tea disa eka munxan Joba lagim ieun hi khobor dili: “Xetant boilanchem zot ghatlolem ani tanchea kuxikuch gaddvam chortalim
15 tednam okosmat Sebachea lokamnim akromonn korun soglea zonvarank luttun vhelim ani tujea chakrank tolvarin marun uddoilim. Fokot hanv ekloch vanchlom ani tuka hi khobor sangonk ailam.”
16 To uloita astana anik ek munis ailo ani tannem oxem sanglem: “Mollbar thaun Devacho uzo ailo* ani tujea menddrank ani chakrank zolloun kabar kelim! Fokot hanv ekloch vanchlom ani tuka hi khobor sangonk ailam.”
17 To uloita astana anik ek munis ailo ani tannem oxem sanglem: “Kaldeikar tin zome korun aile ani te tujea unttancher akromonn korun tankam gheun gele. Tannim tujea chakrank tolvarin marun uddoilim. Fokot hanv ekloch vanchlom ani tuka hi khobor sangonk ailam.”
18 To uloita astana anik ek munis ailo ani tannem oxem sanglem: “Tuje put ani dhuvo aplea sogleant vhoddlea bhavachea ghorant jevtalim ani drakxancho soro pietalim.
19 Tednam okosmat ranvott vattarantlean ek vhoddlem vadoll ailem, ani tacho varo ghorachea charui konnxeancher marlolean tem tujea bhurgeancher kosllon poddlem, ani tim soglim moron gelim. Fokot hanv ekloch vanchlom ani tuka hi khobor sangonk ailam.”
20 Hem aikotanch Joban ubo ravon aple kopdde pinzle, ani aplea matheache kens tasle. Uprant, to zomnir poddlo ani tannem apli man bagoili
21 ani mhunnttlem:
“Hanv mhojea avoichea kusveantlean vingllo ailam,Ani vinglloch porot voitolom.
Jehovan dilem ani Jehovan vhelem.
Jehovachea nanvak vakhannʼnni mellot ravom.”
22 Itlem soglem zaun pasun Joban kainch patok korunk na, vo Devan kitem tori chuk kelea mhunn tacher arop lavunk na.
Footnotes
^ Hacho orth ghoddie “Zacho Dves Kortale.”
^ Mhunnche, purnn toren bhokti korpi. Inglez bhaxent “integrity.”
^ Utran utor, “gorvancheo 500 zoddi.”
^ Vo “apli palli ietali tednam.”
^ Vo “Devak xirap dila zait.”
^ Hebrev bhaxent devdutank suchit korta ti mhunnʼnni.
^ Mhunnche, purnn toren bhokti korpi. Inglez bhaxent “integrity.”
^ Vo “tabeant.”
^ Vo ghoddie, “thaun zoglam marlim.”
