Job 24:1-25
24 “Sorvxoktivont Dev ek vell kiteak tharaina?
Taka vollkhotat te, tacho dis* kiteak pollounk xokonant?
2 Lok ximeche fator haloitat,Dusreanche hindd chorun, aplea chorvachea mollar vhortat.
3 Te onath bhurgeachea* gaddvak gheun voitat,Ani vidvecho boil zobordosten ghannak* dovortat.
4 Te goribank rostear cholonk pasun dinant,*Adar nasloleank tanchea thaun lipchem poddtta.
5 Ranvott vattarantlea ranvotti gaddva bhaxen gorib lok jevonn sodhit bhonvtat,Te aplea bhurgeam pasot oronnʼnneant jevonn sodhtat.
6 Tankam dusreanchea xetant vochon lunvnni korunk poddtta,*Ani noxtteachea mollar urlolim drakxam ektthaim korunk poddttat.
7 Tanchea lagim kopdde nant, te akʼkhi rat vingllech sartat.
Thonddent pasun pangrunk tanchea lagim kainch asona.
8 Porvotacher poddtta tea pausant te bhiztat,Asro naslolean te khoddpank chittkon bostat.
9 Onath bhurgeak* tachea avoichea horddea* thaun voddun kaddttat,Goribache kopdde rinna khatir ghannak dovortat.
10 Taka lagon, goribank vingllech bhonvchem poddtta,Te daneache bhore mathear martat punn svota upaxinch astat.
11 Drakxanchea molleachea dhoddemnim te donparchea vellar koxtt kortat.*
Drakxam maddovpachea zagear drakxam maddoitat, punn svota tanelʼlech astat.
12 Moronk pavlole lok xarant pirgot ravtat,Zokhmi zalole lok modoti pasot ulo martat,Punn Devak kainch poddon vochonk na.*
13 Uzvadda add voitat tosle-i lok asat,Tankam tacheo vatto khobornant,Ani te tachea vatten cholonant.
14 Khun korpi fantodder uttʼttha,To adar nasloleank ani goribank jivexim marta,Ani ratchea vellar chori korta.
15 Pordvar korpi sanz zata kai mhunn vatt polloita,‘Mhaka konn pollounchona!’ oxem mhunntta,Ani aplem tondd dhampta.
16 Kallokh zatanch te ghoram foddun bhitor sortat,Disachea vellar te aplea ghoramnim liptat,Uzvadd mhunnttlear kitem tem tankam khoboruch asona.
17 Sokallcho uzvadd noxtteak kallea-kitt kallkha bhaxenuch dista,Tachi ixttagot tea kallkha lagim asa zaka dusrim bhietat.
18 Punn te udkachea lottan vhanvon voitole,Tanchea zomnichea vantteacher xirap poddttolo,Te aplea drakxanchea mollear kednanch porot ieunk pavchenant.
19 Dukoll ani gormek lagon borfachem udok na zaun voita toxem,Fonddak* lagon patki na zaun voitat!
20 Tachi avoi* taka visortoli, to kiddeanchem jevonn zatolo.
Konnuch tacho ugddas korchona.
Ani to onitivont munis eka zhadda bhaxen moddon poddttolo.
21 To vanz bailek apli xikar korta,Ani vidve sangata vaitt toren vagta.
22 Dev* aplem boll uzar korun xoktivont munxank kabar korun uddoitolo,Te voir sorle zalear pasun tankam aplea jivitacho kosloch bhorvonso asona.
23 Dev* tankam koslich bhirant nastana ani surokxit jieunk dita.
Punn tachi nodor tanchea dor eka kamacher* asta.
24 Thoddea vella pasot te voir sortat, uprant te nanch zatat.
Konnsam bhaxen tankam katrun uddoitat ani ektthaim kortat.
Tankam sokol haddttat ani te sogleam bhaxen mortat.
25 Hanv ek fottkiro mhunn konn dakhounk xokta?
Vo mhojim utram sarkim nhoi mhunn konn mhunnonk xokta?”
Footnotes
^ Mhunnche, tacho zhoddttecho dis.
^ Vo “Te zancho bapui bhair poddla, tanchea.”
^ Mhunnche, poixe udar gheunk, te farik kori poriant gerentti mhunn dovortat ti vost.
^ Vo “Te goribank zobordosten rostea voile kuxik martat.”
^ Vo ghoddie, “xetant tonn kapchem poddtta.”
^ Vo “Zacho bapui bhair poddla tea bhurgeak.”
^ Inglez bhaxent taka “breast” mhunnttat.
^ Vo ghoddie, “molleachea vonttim modem tel kaddttat.”
^ Vo ghoddie, “Dev konnankuch guneanvkari tharaina.”
^ Utran utor, “Kusvo.”
^ Utran utor, “To.”
^ Utran utor, “To.”
^ Utran utor, “vattecher.”
