Job 3:1-26
3 Hachea uprant Joban ulounk suru kelem. Ani to aplea zolmachea disak xirap diunk laglo.
2 Joban mhunnttlem:
3 “Hanv zolmolʼlom to dis nanch zaum.
Ani ti ratui nanch zaum jednam konnem oxem mhunnttlem: ‘Ek cheddo zolmola!’
4 To dis kallkhant buddom.
Sorgar aslolea Devan tacher dhean diunchem nhoi,Tacher kosloch uzvadd poddcho nhoi.
5 Datt kallokh* tacher aplo hokʼk dakhoum.
Pausachem kallem kup tacher bosom,Tacho uzvadd kallea-kitt kallkhant nanch zaum.
6 Kallea-kitt kallkhan tea raticher kobzo korum.
Vorsachea khoinchea-i disa to khuxal zauncho nhoi.
Khoincheach mhoineant taka mezcho nhoi.
7 Khorench! Ti rat vanz zaum,Khuxalkaiecho avaz aikonk ieuncho nhoi.
8 Disak xirap diupeamno! Leviathanak* zago korpeamno!
Hanv zolmolʼlom tea disak xirap diat.
9 Fantea voilea noketrancho uzvadd kallkhant buddom.
Uzvaddachi vatt polloit ravon to thokom,Ani to suriachim kirnnam pollounk pavcho nhoi.
10 Karonn tea disan mhojea avoicho kusvo bond korunk na,Toxench, mhojea thaun dukh lipounk na.
11 Hanv zolmotanch kiteak moronk na?
Kusveantlean bhair sortanch mhozo jiv kiteak vochonk na?
12 Mhaka manddier kiteak ghetlo?
Mhaka dudh kiteak pivoilem?
13 Na zalear aiz mhaka kainch khobor aschi nasli,Hanv sust nhident, susegad nhidtolom aslom.
14 Zannim bandloleo bilddingo aiz padd zaun geleat*Tea razam sangata ani solʼlo diupeam sangata hanv astolom aslom.
15 Vo zanchea lagim bhorpur bhangar aslem ani zanchim ghoram chandin bhorlolim aslim,Tea kunvram sangata hanv astolom aslom.
16 Hanv kusveant vaddchea poilinch kabar kiteak zaunk na?
Kednanch uzvadd pollounk na tea bhurgea bhaxen kiteak zaunk na?
17 Thoim noxtteank trasantlean suttka melltta,Thokloleank visov melltta.
18 Thoim sogle koidi susegad asat,Tanche koddlean zobordosten kam korun ghetat tanche dhengxe tankam aikonk ienant.
19 Thoim lhan-vhodd sogle ek-sarkech asat,Chakor aplea dhonia koddlean svotontr zala.
20 Dev tras sostoleank uzvadd kiteak dita,Ani dukhan buddon gelʼleank jivo ravonk kiteak dita?
21 Je moronk axetat tancher moronn kiteak iena?
Te liplolea thevea poros chodd taka sodhtat.
22 Moronn ieta tednam te khuxal zatat,Fondd polloun te sontosbhorit zatat.
23 Zaka Devan svota voim ghalun addaila,Tea vatt sanddlolea munxak, Dev uzvadd kiteak dakhoita?
24 Karonn haskar-suskar soddop mhojem jevonn zalam,Ani mhojem pirgop udka sarkem vhanvta.
25 Zachi mhaka bhirant distali tench mhaka ghoddlem,Zaka lagon hanv ghabortalom tench mhojer ailem.
26 Mhaka sukh na, xanti na, visov na,Punn mhojer tras ieit ravtat.”
