Job 32:1-22
32 Tor Jobak aplea nitivontponnacher purnn khatri asa,* tem hea tin munxamnim polloilem tednam, tannim tachea lagim bhasabhas korop bond kelem.
2 Punn Elihu, zo Ramachea ghoranneantlo, Buzitachea Barakelacho put aslo, to khub ragar zalʼlo. Joban Devachea bodlek apunn sarko asa mhunn dakhouncho proitn kelo, dekhun taka Jobacho boroch rag ailo.
3 To Jobachea tin sangateancher pasun khub ragar aslo, karonn tannim sarko zobab diunchea bodlek, Devak noxtto mhunnttlolo.
4 Punn te tachea poros piraien vhodd asle dekhun, tanchem ulovop sompo poriant, Joba lagim ulounk Elihu vatt polloit ravlo.
5 Tigaim lagim Jobak sangonk anik kainch na tem polloun Elihucho rag samko pettlo.
6 Tor Buzitachea Barakelacho put Elihun ulounk suru kelem:
“Tumi mhojea poros piraien vhodd asat,Ani hanv lhan asam.
Dekhun tumkam resped diun tumi uloitale tednam hanv modem ulounk na.
Ani mhaka jem khobor asa tem hanvem sangonk na.
7 Hanvem chintlem, ‘Vhoddleank uloum-di,Zaitim vorsam jieleat tannim zannvaiechim utram sangom-di.’
8 Punn lokank Devachea povitr xokten,Sorvxoktivont Devachea svasan, somjikai melltta.
9 Fokot pirai ekleak zannvaiecho korina,Toxench, sarkem kitem tem fokot zanntteankuch somzota oxem nhoi.
10 Tor hanv mhunnttam, ‘Mhojem aikat,Ani hanv kitem zannam tem hanv-ui tumkam sangtolom.’
11 Polloi! Tumi kitem sangtat tem aikonk hanv ravlom,Tumchem ulovop hanv aikot ravlom,Fuddem kitem sangchem, tem tumi chintʼtale tednam pasun hanv ravlom.
12 Hanv tumchem dhean diun aikotalom,Punn tumchea modlo konnuch Job chuklo mhunn*Vo tache vad-vivad chukiche mhunn dakhoun diunk xoklona.
13 Tor oxem mhunno nakat, ‘Amkam zannvai mellʼllea,To chukla mhunn Dev dakhoun dita, munis nhoi.’
14 Job jem uloilo tem mhojea add ulounk na,Taka lagon hanv tumchea vad-vivadanchea adarit taka zobab diunchom na.
15 Te* bhieleat, tanchea lagim anik zobab na,Tanchea lagim ulounk anik kainch uronk na.
16 Te fuddem uloitole mhunn hanv vatt polloit ravlam,Punn tanche lagim kainch zobab na dekhun te vogich ube asat.
17 Taka lagon hanv atam zobab ditolom,Hanv zannam tem hanv-ui sangtolom.
18 Mhojea lagim ulounk zaitem asa,Povitr xokti mhaka ulounk fuddem kaddtta.
19 Uloilea bogor mhojean ravonk zaina,*Ani hanv uloina zalear mhojem kalliz funttʼttolem.*
20 Mhaka ulounk diat, tednanch mhaka suseg mellttolo!
Hanv mhojem tondd uktem korun zobab ditolom.
21 Hanv konnanchich bazu gheunchom na,Ani mhojea utramnim konnankuch fulounchom na.*
22 Karonn dusreank bexttech fulounk mhaka kollona,Hanvem toxem kelʼlem zalear, mhozo Rochnnar* mhaka rokddoch kabar korun uddoitolo aslo.
Footnotes
^ Vo “Job svotachea nodren nitivont asa.”
^ Vo “Jobak sudhraunk.”
^ Hanga ghoddie Elihu Joba lagim uloita.
^ Vo “Mhojeo antkoddeo ghott bond kelʼlea drakxanchea soreachea potie sarkeo asat.”
^ Vo “Mhojeo antkoddeo funttonk pavlolea drakxachea soreachea novea potie sarkeo asat.”
^ Vo “konnankuch manachi podvi diunchom na.”
^ Vo “zalear, zannem mhaka kela to.”
