Job 28:1-28
28 “Chandi khonnun kaddpachi khonn* asta,Ani oslo-i ek zago asta zoim bhangar melltta, jem te xudʼdh kortat.
2 Zomnintlean lokhonn kaddttat,Ani khoddpam koddoun tambem kaddttat.*
3 Munis kallkhacher zoit vhorta,Kallkhant ani kallea-kitt kallkhant,To moladik dhatu* sodhunk sarko khonnichea kholaiek voita.
4 Lok ravtat tea zagear thaun khub pois, to ek khonn khonntta.
Konn pasar zaina toslea osadd zagear,Munis zomnint denvon umkolltta.
5 Prithumecher voir pik zata,Punn sokol uzo laglolea bhaxen goddbodd asta.*
6 Thoim fatramnim safair* mellttat,Ani dhulʼlint bhangar melltta.
7 Xikar korpi suknneak hea zageachi khobor asona,Kallea ghonnichi* nodor pasun thoim poddona.
8 Bhirankull zonvar thoim panvl pasun dovorna,Tornatto xinv thoim xikar sodhit bhonvona.
9 Munis aplea hatan ghott khoddpam* foddtta,Porvotank tanchea mulla thaun umttun kaddtta.
10 To khoddpantlean udkache kanal* toiar korta.
Tachi nodor dor ek moladik vost sodhun kaddtta.
11 To nhoim-cheo zhori addaita,Ani lipon asloleo vostu uzvaddant haddtta.
12 Punn zannvai khoim mellttoli?
Ani somjikaiechi zor khoim asa?
13 Khoincheach munxak tacho valor kollona,Ani jiveanchea desant ti mellona.
14 Khol udok mhunntta, ‘Ti mhojea lagim na!’
Ani doria mhunntta, ‘Ti mhojea lagim na!’
15 Xudʼdh bhangar diun tika vikti gheunk zaina,Kitli-i chandi zokhun dilear pasun ti mellonk xokona.
16 Ofirantlem* bhangar dilear ti vikti gheunk zaina,Moladik onix* ani safair* fatramnim pasun ti vikti gheunk zaina.
17 Tika bhangrak ani konvchek sor korunk zaina,Borea* bhangrachem aidon diun pasun ti gheunk zaina.
18 Doriantle moladik fator* ani kanchiche fator* tika sor korunk zainant,Karonn zannvaiechem mol, motiamnim bhorlolea bega poros chodd asa.
19 Kushantlo* topaz fator* tika sor korunk zaina,Xudʼdh bhangar diun pasun ti vikti gheunk zaina.
20 Punn zannvai khoim thaun melltta?
Ani somjikaiechi zhor khoim asa?
21 Soglea jivea pranneam thaun ti lipoun dovorlea,Ani mollba voilea suknneankui ti disona.
22 Nisontton ani moronn mhunntta,‘Ami fokot tichi khobor aikolea.’
23 Punn zannvai koxi mellonk xokta tem Devak khobor asa,Ti khoim ravta tem fokot toch zannam,
24 Karonn to prithumechea konnxeam meren polloita,Ani mollba khala aslolem soglem taka dista.
25 Jednam tannem vareacho fors tharailo,*Ani udok mezlem,
26 Jednam tannem pausa pasot nem-kaide tharaile,Ani goroztolea vadollachea kupak vatt dakhoili,
27 Tednam tannem zannvai polloili ani tichea vixim somzailem,Tannem tichi buniad ghatli ani tika topasli.
28 Ani tannem munxak mhunnttlem:
‘Polloi! Jehovachi bhirant dhorop mhunnttlear zannvai,Ani vaittak fatt korop mhunnttlear somjikai.’”
Footnotes
^ Moladik dhatu ani fator khonnon kaddttat to zago. Inglez bhaxent “mine.”
^ Utran utor, “Fatrantlem tambem votoitat.”
^ Utran utor, “fator.”
^ Hanga ghoddie mainir zata tea kamam vixim sanglam.
^ Vo “safair fator.” Ho ghoddie nillea rongachea moladik fatrak suchit korta.
^ Vo “Gidachi.” Inglez bhaxent “kite.”
^ Inglez bhaxent “flint.” Xobdhkox polloi.
^ Vo “kharoz.”
^ Ekdom borea dorjeachem bhangar mellttalo to zago.
^ Ho ghoddie nillea rongachea moladik fatrak suchit korta.
^ Vo “kallo fator.”
^ Vo “Xudʼdh kelʼlea.”
^ Inglez bhaxent “corals.”
^ Inglez bhaxent “crystal.”
^ Vo “Ethiopientlo.”
^ Xobdhkoxant “topaz” polloi.
^ Utran utor, “vareachem vozon tharailem.”
