Job 38:1-41
38 Uprant vadollantlean Jehovan Jobak zobab diun mhunnttlem:
2 “Tor ho konn, zo mhojea solʼleacher poddʼddo ghalta,Ani ginean nastana uloita?
3 Upkar korun eka xoktivont munxa bhaxen toiar* rav,Hanv tuka prosn vichartolom, ani tum mhaka zobab di.
4 Hanvem prithumechi buniad ghatli tednam tum khoim aslo?
Tum hea vixim zannam zalear mhaka sang.
5 Prithumechi lambai ani rundai konnem tharaili,Vo mezpache dorien tachem zokh konnem kaddlem, tem tum zannam?
6 Tache khambe kiteant ghatleat,Vo tacho konnxeacho fator konnem bosoila?
7 Fantoddechea noketramnim sangata mellon khuxalkaien bob marli,Ani Devachea soglea putamnim* sontosbhorit zaun taka vakhannlo tednam tum khoim aslo?
8 Doriak dara fattlean konnem addailo,Jednam to kusveantlean uddi marun bhair sorlo,
9 Jednam hanvem taka kupamnim nhesoilo,Ani datt kallkhant taka guttlailo,
10 Jednam hanvem taka tachi xim tharaili,Ani tache lokhnnache dandde ani daram zagear ghatlim,
11 Jednam hanvem mhunnttlem, ‘Tum hanga poriant ieo, anik fuddem ieum naka,Tujea gorvixtt lharamnim hangach thambonk zai,’ tednam tum khoim aslo?
12 Tunvem kednam-i* sokall zaunchi mhunn adnea dilea,Vo suriak khoim udeuncho tem kolloilam?
13 Sokallchim kirnnam prithumechea konnxea-konnxeamnim pavonkAni noxttea lokank thoinche dhanvddaunk, tunvem sanglolem kai?
14 Ek xikʼko chiklachea matiechem rup bodolta tea toren him kirnnam prithumechem rup bodoltat,Ani kopddeacher chitrailʼleo vostu distat tea toren prithumer asloleo sogleo vostu spoxtt toren distat.
15 Punn noxttea koddlean tancho uzvadd kaddun ghetla,Ani jea hatan te dusreancher zulum korta, to hat moddun uddoila.
16 Tum doriant denvon tachea zhorim poriant pavla kai,Vo khol doriant kitem-kitem melltta tem tum sangonk xokta kai?
17 Mornnache darvontte khoim asat te tuka kolloileat kai,Vo kallea-kitt kallkhache* darvontte tunvem polloileat kai?
18 Prithum kitli vhodd asa hem tum somzola kai?
Tuka hem soglem khobor asa zalear mhaka sang.
19 Uzvadd khoinchea vatten asa?
Ani kallokh khoim ravta?
20 Tum taka tachea vattarant vhoronk xokta kai,Ani tachea ghora koddem vochpi roste tum zannam kai?
21 Tum poilinch zolmolʼlo,Ani tuji pirai khub asa dekhun tum hem soglem zannam kai?
22 Tum borfachea gudanvamnim bhitor sorla kai,Vo tunvem kednam-i korveanchea pausache gudanv polloileat kai,
23 Zankam hanvem akantachea vella pasot,Zhuzachea ani zhogddeachea disa pasot samballun dovorleat?
24 Uzvadd khoinchean posorta,*Ani udentecho varo khoim thaun prithumer marta?
25 Ghogeamnim paus poddonk mollbar konnem vatt toiar kelea,Ani goroztolea vadollachea kupam pasot konnem vatt toiar kelea,
26 Jea vorvim konnuch munis ravona thoim,Khoinchoch munis na toslea ranvott vattarant paus poddttolo,
27 Padd zalʼli zomin dhadoxi zatoli,Ani tonn kirlonk lagtolem?
28 Pausak bapui asa kai,Vo dovachea thembeank konnem zolmak haddleat?
29 Jhel* konnanchea kusveantlean bhair sorla,Ani mollba voilea borfak konnem zolm dila,
30 Jednam udok fatran dhamplolea bhaxen ghott zalem,Ani khol udok voilean borfa bhaxen ghott zalem?
31 Tum Kima* noketrancho zomo bandun dovrunk xokta kai,Vo Kesil* noketranchea zomeak soddunk xokta kai?
32 Tum khoinchea-i noketranchea zomeak* nemlolea vellar bhair soronk lavunk xokta kai,Vo Ash* noketranchea zomeak ani tachea putank vatt dakhounk xokta kai?
33 Mollbar soglem sarkem koxem cholta tem tum zannam kai,Vo tench tum tankam* prithumer korunk lavunk xokta kai?
34 Tum vhoddlea avazan kupam lagim uloun,Apnnak pausan bhizoi mhunn sangonk xokta kai?
35 Tum zoglank tujem kam kor mhunn adnea diunk xokta kai?
Ani tim tujea lagim ieun, ‘Ami ailim,’ mhunn tuka sangtolim kai?
36 Kupamnim* zannvai konnem ghatli?
Mollbar zata tea ojapank* somzonni konnem dili?
37 Kupam mezunk xokta, itlo zannvaiecho konn asa,Vo oso konn asa zo mollbar thaun udkachim aidonam votounk xokta,
38 Jea vorvim dhulʼl chikol zatoloAni matieche gulle* eka-mekak chittkotole?
39 Tum xinva pasot xikar korunk xokta kai,Vo tornattea xinvanchi bhuk bhagounk xokta kai,
40 Jednam te aplea zagear xikar dhorunk boson ravtat,Vo aplea dholimnim xikar dhorunk lipon bostat?
41 Kavlleak jevonn konn dita,Jednam tachim poram Devak ulo martatAni bhuken tollmollot hevtten-tevtten bhonvtat?
Footnotes
^ Vo “tuji komor bandun toiar.”
^ Hebrev bhaxent devdutank suchit korta ti mhunnʼnni.
^ Utran utor, “tujea disamnim.”
^ Vo “mornnache savlleche.”
^ Vo ghoddie, “Zoglam koxim posortat.”
^ Inglez bhaxent “ice.”
^ Ghoddie Taurus noketranchea zomeantlim Pleiades noketram; Krittika.
^ Ghoddie Orion noketrancho zomo; Mrigashira.
^ Utran utor, “Mazzaroth.” 2 Raza 23:5-ant, hea utrak jem bhovochon uzar kelam, tem raxichokrantlea noketrank suchit korta.
^ Ghoddie Great Bear noketrancho zomo; Soptrixi. Sat noketrancho zomo.
^ Vo ghoddie, “taka.”
^ Vo ghoddie, “Munxa bhitor.”
^ Vo ghoddie, “Monak.”
^ Vo “dhepe.”
