Job 41:1-34
-
Dev ojapachea Leviathana vixim sangta (1-34)
41 “Tum Leviathanak* nusteachea gorien dhorunk xokta kai,Vo eka dorien tachi jib bandunk xokta kai?
2 Tum tachea nakantlean dori ghalunk xokta kai,Vo tachea daddamnim* gori ghalunk xokta kai?
3 Apleachi kakut kor mhunn to tujea lagim bhik magtolo kai,Vo to tujea lagim bore toren uloitolo kai?
4 Jivitbhor tuzo gulam zaun tuji seva korunkTo tujea sangata korar kortolo kai?
5 Tum suknnea sangata khelltta toso tachea koddem khellttolo kai,Vo tujea lhan cheddvamnim tachea sangata khellchem mhunn tum tachea golleak bandun dovortolo kai?
6 Nustekar taka viktole kai?
Te taka veapaream modem vanttole kai?
7 Tum tachea katint kantteanche bhale ghusoitolo kai,Vo tachea toklent nustem marunk uzar kortat te bhale toptolo kai?
8 Taka hat tori lavun polloi,Tuka zhuzacho ugddas ietolo, ani tum porot toxem kednanch korchona!
9 Taka dhorpacho proitn korop pasun nirfoll.
Taka pollounuch tuje hat-paim koddkoddttole.
10 Taka challoun ghalunk konnankuch dhir na.
Toxem zalear, mhojea mukhar konn ubo ravonk xokta?
11 Oso konn asa, zannem mhaka kitem tori dilam jem hanvem taka porot diunk zai?
Mollba khala jem kitem asa tem soglem mhojench.
12 Tachea paim-am vixim, tachea vorteponna vixim,Ani tachi kudd kitle bore toren toiar kelea tea vixim hanv sangonastana ravchom na.
13 Tachi datt kat konnem kaddlea?
Tachea uktea daddamnim konn ghustolo?
14 Tachem tondd* zobordosten konn uktem korunk xokta?
Tache dant polloun konnakui thorthoro suttʼttolo.
15 Tachea fattir khovlleancheo volli astat,*Tim khub ghott bosoilʼlim astat.
16 Tim eka-mekak itlim lagim astat kiTanchea modlean varem pasun pasar zaunk xokona.
17 Tim eka-mekak chittkololim astat,Tim itlim ghott zuddlolim astat ki tim koxinch kuxin kaddunk zainant.
18 To xink marta tednam tachea nakantlean uzvadd bhair sorta toxem dista,Tache dolle fantoddechea kirnnam bhaxen chokchoktat.
19 Tachea tonddantlean zoglam martat,Ujeacheo kittʼtteo bhair sortat.
20 Ujeachea bhottʼttent tonn bhortat tednam dhunvor bhair sorta toso,Tachea nakachea puddantlean dhunvor bhair sorta.
21 Tachea funken kollxe pettʼttat,Ani tachea tonddantlean ujeachem agttem bhair sorta.
22 Tachea gomttek bhorpur boll asta,Ani sogle tachea mukhar bhirantin koddkoddttat.
23 Tachea pottachi kat eka-mekacher ghott bosoilʼli asta,Koddoilʼlo dhatu votoun toiar kelʼlea bhaxen ti ghott asta ani ti halounk zaina.
24 Tachem kalliz fatra itlem ghott asta,Hoi, danteachea sokoilea fatra itlem ghott asta.
25 To voir sorta tednam xoktivont munis pasun bhietat,To udok khodoll korta tednam te samke gondhollant poddttat.
26 Khoinchich tolvar taka harounk xokona,Khoincheach bhaleak, bannak vo koslea-i dusrea hotʼtearak tacher zoit mellona.
27 To lokhnnak tonn,Ani tambeak kuslolem lakudd mhunn lekhta.
28 To bannak bhieun pollon vochona,Gofnnintle fator taka sukhlolea tonna sarke asat.
29 To danddeak suklolem tonn zalʼlea bhaxen lekhta,Ani avaz korta tea bhaleak to hansta.
30 Tachem pott, matiechea aidonachea funttlolea kuddkeam bhaxen dharechem asta,Mollnnek uzar kortat tea lokhnnachea vostu* bhaxen to pasar zata tednam matiecher nixani soddtta.
31 Eka moddkent udok khotkhotʼta tea bhaxen to khol doriak* uchamboll korta,Ani eka aidonant pormollit tel xiztolea bhaxen to doriak khotkhoto haddtta.
32 To fuddem voita tednam aplea fattlean udkant ek chokchokit vatt soddtta,Tea vellar, doriak dhovo kens ailʼlea bhaxen dista.
33 Akʼkhe prithumer tachea bhaxen konnuch na,Taka oxe toren kela ki to konnankuch bhiena.
34 To gorvan bhorlolea zonvarank bhienastana polloit ravta.
To soglea xoktivont ranvotti zonvarancho raza zaun asa.”
Footnotes
^ Hem ghoddie manngem. Inglez bhaxent “crocodile.”
^ Inglez bhaxent “jaw.”
^ Utran utor, “Tachea tonddachim daram.”
^ Vo ghoddie, “Taka aplea khovlleanchea vollincher gorv asta.”
^ Zonvaram voddttat ani mollnni korunk uzar kortat ti vost.
^ Hanga doriak uzar kelʼlem Hebrev utor eka vhoddle nhoim-ek pasun suchit korunk xokta.
