Malakae 2:1-17
2 “Taswe ol pris, oda ya i blong yufala.+
2 Sipos yufala i no wantem lesin mo yufala i no wantem putum tok ya long hat blong yufala, blong yufala i leftemap nem blong mi, bambae mi singaot trabol i kam long yufala,+ mo bambae mi jenisim blesing blong yufala i kam ol trabol.+ Yes, mi mi jenisim finis ol blesing blong yufala i kam ol trabol, from we yufala i no putum tok ya long hat blong yufala.” Hemia nao tok blong Jehova komanda blong ol ami.
3 “!Yufala i luk! From fasin blong yufala, bambae mi spolem* ol sid we yufala i planem,+ mo bambae mi mekem se sitsit blong animol i go olbaot long fes blong yufala, yes ol sitsit blong ol animol long taem blong lafet blong yufala. Mo bambae mi sakem yufala long ples blong olgeta.*
4 Nao bambae yufala i save se mi mi givim oda ya long yufala, blong mekem se kontrak blong mi wetem Livae i save gohed nomo,”+ hemia nao tok blong Jehova komanda blong ol ami.
5 “Kontrak we mi mekem wetem hem i blong laef mo pis, we mi bin givim long hem, wetem fasin blong fraet* long mi tu. Hem i fraet long mi, yes, hem i respektem nem blong mi bigwan.
6 Loa* blong trutok i stap long maot blong hem,+ mo man i no save faenem fasin we i no stret long lips blong hem. Hem i wokbaot oltaem wetem mi long pis mo i mekem i stret oltaem,+ mo hem i givhan long plante man blong lego ol rabis fasin blong olgeta.
7 From lips blong wan pris i sud protektem save, mo ol man oli sud go faenem loa* long maot blong hem,+ from we hem nao i mesenja blong Jehova komanda blong ol ami.
8 “Be yufala i gowe finis long stret rod. Yufala i mekem samfala oli stambol from oli no save loa.*+ Yufala i spolem gud kontrak blong Livae,”+ hemia nao tok blong Jehova komanda blong ol ami.
9 “Taswe long fes blong olgeta man, bambae mi mekem se yufala i olsem rabis nomo mo yufala i daon olgeta, from we yufala i no obei long ol tok blong mi, be yufala i yusum loa blong mekem i gud moa long samfala.”+
10 “?Yufala i foget se yumi evriwan i kamaot long wan papa nomo?+ ?Yufala i foget se wan God nomo i mekem yumi? ?Taswe from wanem yumi stap brekem ol promes ya we yumi nomo i mekem long yumi,+ nao yumi stap sakem doti long kontrak blong ol olfala blong yumi?
11 Juda i brekem promes blong hem finis, mo ol man oli mekem wan samting we i nogud olgeta long Isrel mo long Jerusalem, from we Juda i sakem doti long tabu fasin* blong Jehova,+ we Hem i laekem tumas. Nao hem i go maredem wan dota blong wan god blong narafala kantri.+
12 Eni man long ol tent blong Jekob we i mekem olsem, Jehova bambae i kilim hem i ded, yes enikaen man,* i nating se hem i givim wan ofring olsem presen long Jehova komanda blong ol ami.”+
13 “Mo i gat wan narafala* samting we yufala i mekem, nao olta blong Jehova i fulap gud long wota blong ae wetem olgeta we oli stap krae mo oli stap pulum nogud win blong olgeta, mekem se hem i no moa lukluk ol ofring we yufala i givim olsem presen, mo i no glad long eni samting we han blong yufala i givim.+
14 Nao yufala i stap askem se: ‘?From wanem i olsem?’ From Jehova i stap olsem wan witnes bitwin yu mo waef blong yu we yu maredem taem yu yang, be yu mekem i no stret long hem nating se hem i patna blong yu mo hem i waef blong yu folem kontrak.*+
15 Be i gat wan man we i no mekem olsem, from we spirit blong God i stap yet long hem. ?Mo hem i stap lukaotem wanem? I stap lukaotem Pikinini* blong God. Taswe yufala i mas lukaot gud long tingting* blong yufala, mo yufala i no mas mekem i no stret long waef blong yufala we yufala i maredem taem yufala i yang.
16 From mi mi no laekem nating* divos,”+ hemia nao tok blong Jehova, God blong Isrel, “mo man we i stap kavremap klos blong hem long raf fasin,”* hemia nao tok blong Jehova komanda blong ol ami. “Mo yufala i mas lukaot gud long tingting* blong yufala, mo yufala i no mas brekem promes blong yufala.+
17 “Yufala i mekem we Jehova i taed gud long ol tok blong yufala.+ Be yufala i talem se: ‘?Mifala i mekem hem i taed gud olsem wanem?’ Hemia taem yufala i talem se: ‘Jehova i luk se man we i mekem samting we i nogud, hem i gud nomo, mo hem i glad long hem,’+ o taem yufala i talem se: ‘?Wehem God blong jastis?’”
Ol futnot
^ PT: “mi tok strong long.”
^ Hemia ples we oli stap sakem sitsit blong ol animol we oli kilim blong mekem sakrefaes.
^ NT: “respek; tinghevi.”
^ NT: “Tijing.”
^ NT: “tijing.”
^ MNT: “from tijing blong yufala.”
^ MNT: “tabu ples ya.”
^ PT: “man we i wekap mo man we i ansa.”
^ PT: “Mo seken.”
^ NT: “waef blong yu we yu mared long hem folem loa.”
^ PT: “Sid.”
^ PT: “spirit.”
^ PT: “From we hem i no laekem nating.”
^ NT: “man we i stap faet.”
^ PT: “spirit.”
