Seken leta i go long Tesalonaeka 3:1-18
3 Ol brata, hemia lastok blong mi. Plis yufala i gohed blong prea from mifala,+ blong tok blong Jehova* i save goaot kwik long evri ples,+ mo blong ol man oli save leftemap tok ya olsem we yufala i stap mekem.
2 Mo yufala i prea tu blong God i tekemaot mifala long han blong ol rabis man mo ol man blong spolem man,+ from we i no evri man we oli gat bilif.+
3 Be Masta i stap holem tok blong hem, mo hem bambae i mekem yufala i strong, mo i protektem yufala long man ya we i rabis.*
4 Mo mifala ol man blong Masta, mifala i trastem yufala se yufala i stap mekem ol samting we mifala i talem, mo bambae yufala i gohed blong mekem olsem.
5 Mifala i prea se Masta i givhan long yufala blong yufala i lavem God+ mo blong yufala i stanap strong+ from Kraes.
6 Ol brata, long nem blong Masta blong yumi Jisas Kraes, mifala i givim advaes long yufala naoia se yufala i mas kamaot long evri brata we oli no stap wokbaot folem oda,+ mo oli no stap folem kastom* we yufala i* kasem long mifala.+
7 Yufala i save finis samting we yufala i mas mekem blong folem fasin blong mifala,+ from we taem mifala i stap wetem yufala, fasin blong mifala i no olbaot,
8 mo mifala i no askem long yufala blong yufala i givim kakae long mifala, we mifala i no pem.*+ Be mifala i wok had long dei mo long naet we mifala i stap taetem bun blong mifala, blong yufala i no spenem mane blong yufala blong givhan long mifala, nao long rod ya mifala i no kam wan baden long yufala.+
9 Mifala i gat raet blong askem sam samting long yufala,+ be mifala i no mekem from we mifala i wantem soemaot eksampol blong yufala i folem.+
10 Taem mifala i stap wetem yufala, mifala i stap talem strong long yufala se: “Sipos wan man i no wantem wok, hem i no mas kakae.”+
11 Mifala i harem se sam long yufala oli no stap wokbaot folem oda,+ mo oli no wok nating, be oli stap pusum nus blong olgeta long ol samting we i no bisnes blong olgeta.+
12 Long nem blong Masta Jisas Kraes, mifala i tok strong blong wonem olgeta se oli mas lukluk long prapa bisnes blong olgeta nomo mo oli mas wok had blong kasem kakae blong olgeta.+
13 Ol brata, long saed blong yufala, yufala i no mas les blong mekem ol samting we i stret.
14 Be sipos wan man i no obei long tok we mifala i raetem long leta ya, yufala i makem gud hem mo yufala i stop blong joen wetem hem,+ nao samting ya bambae i mekem hem i sem.
15 Be yufala i no mas luk hem olsem wan enemi, yufala i mas gohed blong givim advaes long hem+ olsem we hem i wan brata.
16 Mifala i prea se long evri rod, Masta blong pis i givim pis long yufala oltaem.+ Mifala i prea se Masta i stap wetem yufala evriwan.
17 Mi Pol mi talem halo long yufala, mo mi nomo mi raetem tok ya.+ Tok ya i soemaot we leta ya i blong mi stret. Hemia fasin blong mi blong raet.
18 Prea blong mi se Masta blong yumi Jisas Kraes i gohed blong kaen long yufala evriwan.
