Fas Buk Blong Ol King 7:1-51

  • Pales blong Solomon (1-12)

  • Hiram we i gat gudhan i givhan long Solomon (13-47)

    • Tu bigfala pos long kopa (15-22)

    • Kopa si (23-26)

    • Ten kat mo besin we oli wokem long kopa (27-39)

  • Oli finisim blong wokem ol samting long gol (48-51)

7  Nao Solomon i wokem prapa haos* blong hem,+ mo i tekem 13 yia blong hem i finisim evri samting.+  Mo hem i wokem wan haos we nem blong hem Haos Blong Ol Tri Blong Lebanon.+ Longfala blong haos ya i 100 kiubit,* mo bigfala blong hem i 50 kiubit, mo hae blong hem i 30 kiubit, mo haos ya i stap antap long fo laen blong ol bigfala pos blong sida. Mo i gat ol bim blong sida+ antap long ol bigfala pos ya.  Haos ya i stap antap long ol plang we oli wokem long sida, ol plang ya oli stap antap long ol kroswud we oli putum antap long ol bigfala pos ya. I gat 45 evriwan, we 15 i stap long wan laen.  Long haos ya, i gat tri laen blong ol windo we oli gat frem blong olgeta, mo wanwan long ol windo ya i fesem ol windo narasaed.  Olgeta doa blong kam insaed mo ol pos blong doa, oli gat ol frem we oli skwea.* Hemia i sem mak long ol trifala laen blong windo long fored we oli fesem ol wido narasaed.  Mo hem i wokem wan vranda we nem blong hem Vranda Blong Ol Bigfala Pos, we longfala blong hem i 50 kiubit, mo bigfala blong hem i 30 kiubit, mo long fored blong hem, i gat wan narafala vranda wetem ol bigfala pos blong hem mo i gat wan ruf blong hem.  Mo tu hem i wokem Haos Blong Jea Blong King,+ mo hemia nao ples we bambae hem i stap jajem ol man long hem, mo narafala nem blong hem Haos Blong Jajmen.+ Mo oli blokem long ol plang blong sida, i stat long floa i go kasem rafta blong hem.  Haos* we Solomon bambae i slip long hem i stap long wan narafala yad,+ biaen long Vranda Blong Jea Blong King, mo ol samting we oli yusum blong wokem haos ya i sem mak nomo. Mo tu, hem i wokem haos blong gel blong Fero we hem i bin tekem hem i kam waef blong hem.+ Haos ya i sem mak long Vranda ya.  Olgeta haos ya, i stat long fandesen blong olgeta i go kasem top blong olgeta, mo go kasem bigfala yad blong hem, oli wokem long ol sas ston+ we oli bin katemrere finis mo oli makem, mo oli katemgud ol saed blong olgeta long ol so we oli wokem long ston.+ 10  Mo fandesen blong olgeta, oli wokem long ol bigbigfala ston we oli sas. Ol ston ya sam long olgeta oli ten kiubit, mo sam eit kiubit. 11  Mo antap long hem, oli putum ol sas ston we oli katemrere finis folem stret saes we oli makem, mo oli putum ol sida tu. 12  Mo blong wokem wol we i goraon long bigfala yad ya, oli putumap tri laen blong ston we oli katem finis mo wan laen blong ol bim blong sida, olsem we oli mekem long yad insaed+ long haos blong Jehova mo long rum long doa blong tempol.+ 13  Nao King Solomon i sanem sam man oli go long Taea mo oli tekem Hiram+ i kam. 14  Hiram ya i boe blong wan wido we i kamaot long traeb blong Naftali, mo papa blong hem i wan man Taea we i stap wokem ol samting long kopa.+ Hiram i gat gudhan blong mekem samting, i kasemsave samting,+ mo i save wokem enikaen samting long kopa.* Nao hem i kam luk King Solomon mo i mekem evri wok we king i askem. 15  Hem i wokem tu bigfala pos long kopa,+ mo wanwan long tufala, hae blong hem i 18 kiubit, mo hem i yusum wan string blong 12 kiubit blong raonem wanwan long tufala bigfala pos ya.*+ 16  Mo hem i wokem tu hed blong putum antap long tufala bigfala pos ya, hem i wokem tufala hed ya long kopa. Wan hed, hae blong hem i faef kiubit, mo narawan tu hae blong hem i faef kiubit. 17  Hed blong tufala bigfala pos ya hem i flasem long net we hem i wokem long ol jen we hem i tantanem tugeta.+ Hem i putum seven long wan hed mo seven long narawan. 18  Mo raon long wan net, hem i wokem tu laen blong ol frut blong grenadin, blong kavremap hed blong bigfala pos ya. Hem i mekem olsem long tugeta bigfala pos ya. 19  Antap long hed blong tufala bigfala pos ya we i stap long fored blong rum long doa blong tempol, hem i wokem flaoa ya lili we hae blong hem i fo kiubit. 20  Tufala hed ya i joen wetem tufala bigfala pos ya, stret long ples we net i stap long hem, mo i gat 200 frut blong grenadin long wan laen raon long tufala hed ya.+ 21  Nao hem i stanemap tufala bigfala pos ya blong rum long fored blong tempol.*+ Bigfala pos we hem i stanemap long raetsaed,* hem i singaot se Jakin,* mo bigfala pos long lefsaed,* hem i singaot se Boas.*+ 22  Mo flaoa ya lili i stap long top blong tufala bigfala pos ya. Nao wok blong tufala bigfala pos ya i finis. 23  Biaen hem i wokem wan Si* long aean.+ Si ya i raon, mo maot blong hem i 10 kiubit, mo hae blong hem i 5 kiubit, mo hem i yusum wan teplaen blong 30 kiubit blong raonem Si ya.*+ 24  Mo aninit long maot blong hem, i gat pija blong ol frut blong wael melen+ i goraon long hem, i gat ten frut long wan kiubit, mo i gat tu laen blong ol frut ya we hem i wokem wantaem wetem Si ya. 25  Si ya i sidaon antap long 12 bul,+ 3 i lukluk i go long not, 3 i lukluk i go long wes, 3 i lukluk i go long saot, mo 3 i lukluk i go long is. Mo as blong olgeta i go wanples long medel. 26  Si ya i tik olsem saes blong wan han.* Mo hem i wokem maot blong hem olsem maot blong wan kap, olsem wan lili we i open. Si ya i save holem 2,000 bat* blong wota. 27  Biaen hem i wokem ten kat*+ long kopa. Wanwan long ol kat ya, longfala blong hem i fo kiubit, bigfala blong hem i fo kiubit, mo hae blong hem i tri kiubit. 28  Hemia fasin we hem i folem blong wokem ol kat ya: Ol kat ya oli gat ol wol long ol saed blong olgeta. Blong mekem wol ya, hem i putum ol aean we oli krosem olgeta, mo bitwin long ol aean ya hem i putum ol flat kapa. 29  I gat pija blong ol laeon,+ ol bul, mo ol jerubim+ long ol flat kapa ya we oli stap bitwin ol aean we oli krosem olgeta, mo ol sem pija ya oli stap tu long ol aean we oli krosem olgeta. Antap mo aninit long ol laeon mo ol bul ya, hem i wokem ol mak blong flasem.* 30  Evri kat ya oli gat fo wil long kopa, wetem ol longfala aean we hem i wokem long kopa, blong holem ol wil ya. Mo long kona blong kat ya, i gat fo narafala aean we oli longfala i go antap, blong sapotem olgeta. Ol aean we oli stap aninit long besin blong sapotem besin ya, oli gat ol mak blong flasem olgeta. Hem i wokem ol mak ya long sem taem we hem i wokem ol longfala aean ya. 31  Maot blong besin ya i stap insaed long wan raon frem, mo stat long botom blong besin ya i go kasem stat blong frem ya, hem i wan kiubit. Opening blong frem ya i raon, mo i stap antap long ol aean we oli sapotem besin ya, mo hae blong olgeta i wan mo haf kiubit, mo hem i wokem ol pija long frem ya. Mo ol flat kapa we oli stap long saed blong frem ya, oli skwea, oli no raon. 32  Ol fofala wil blong kat ya oli stap daon long saed blong kat ya, mo ol sapot blong ol wil ya, hem i mekem i fas long kat. Hae blong wanwan long ol wil ya hem i wan mo haf kiubit. 33  Ol wil ya oli olsem ol wil blong jariot mo evri haf blong hem, hem i wokem long kopa, i gat rim blong ol wil ya, ol sapot blong olgeta, ol aean blong wil, mo aean we i pas long medel blong wil mo i go joen wetem longfala aean we i holem ol wil. 34  I gat fo aean long kona blong ol kat ya blong sapotem. Mo ol fofala aean ya oli haf blong kat ya. 35  Antap long kat ya i gat wan raon frem we hae blong hem i haf kiubit. Mo top blong kat ya, wetem ol frem blong hem, mo ol flat kopa long saed blong frem ya, oli wan pis nomo wetem kat ya. 36  Long ol frem ya mo long ol flat kopa long saed blong hem, hem i wokem ol pija blong ol jerubim, ol laeon, mo ol pamtri, folem spes we i stap, mo i wokem ol mak raon long hem blong flasem.+ 37  Hemia nao fasin we hem i folem blong wokem ol ten kat ya.+ Olgeta evriwan oli sem mak nomo+ mo saes blong olgeta i sem mak. 38  Hem i wokem ten besin long kopa+ blong putum long wanwan long ol kat ya. Mo wan besin i save holem 40 bat blong wota mo saes blong hem i fo kiubit.* 39  Biaen hem i putum faef kat long raetsaed blong haos ya, mo faef long lefsaed blong haos ya. Mo hem i putum Si ya long raetsaed blong haos ya, long saed i go long saotis.+ 40  Hiram+ i wokem ol besin tu, wetem ol savel,+ mo ol bol.+ Nao Hiram i finisim olgeta wok we King Solomon i askem hem blong mekem long haos blong Jehova:+ 41  Hemia tu bigfala pos,+ tu hed we tufala i raon olsem bol, mo tufala i stap antap long tufala bigfala pos ya, mo tu net+ blong kavremap tufala hed ya we i stap antap long tufala bigfala pos ya, 42  mo 400 grenadin+ blong tufala net ya, wanwan long ol net ya i gat tu laen blong grenadin blong kavremap tufala hed ya we i raon olsem bol, we oli putum antap long tufala bigfala pos ya, 43  mo ten kat+ mo ten besin+ blong ol kat ya, 44  mo Si+ wetem ol 12 bul we oli stap aninit long Si ya, 45  mo ol baket, ol savel, ol bol, mo olgeta samting blong yusum long haos blong God, blong King Solomon i putum olgeta long haos blong Jehova. Hiram i wokem olgeta samting ya long kopa we i saengud. 46  King i wokem ol samting ya long eria blong Jodan Reva, long medel blong Sukot mo Jaretan. Blong wokem ol samting ya, hem i kafsaedem kopa i go long ol mol we oli wokem long klei mo we oli gat ol sep blong ol samting ya. 47  Solomon i no skelem evri samting we bambae oli yusum long haos blong God, from we oli plante we plante. Oli no traem blong faenemaot stret wet blong kopa.+ 48  Solomon i wokem evri samting blong yusum long haos blong Jehova: Olta+ we i gol, tebol we i gol+ we i blong putum sobred,* 49  ol ples blong putum laet+ we hem i wokem long gol we i klin gud, mo oli putum long fored blong rum ya we i insaed olgeta, we faef i stap long raetsaed mo faef long lefsaed. Hem i wokem long gol ol flaoa we i open,+ ol laet, mo ol samting blong holem wik blong laet.*+ 50  Mo hem i yusum gol we i klin gud blong wokem ol besin, ol sisis blong katem wik blong laet,+ ol bol, ol kap,+ mo ol faea holda.+ Mo ol stamba ples blong doa blong rum we i insaed olgeta,+ hemia Rum We i Tabu We i Tabu, mo ol stamba ples blong ol doa blong haos tempol,+ hem i wokem long gol. 51  Nao King Solomon i finisim olgeta wok we hem i mas mekem long haos blong Jehova. Biaen hem i go tekem ol samting we papa blong hem Deved i mekem i tabu,+ mo i go putum long haos ya, mo hem i putum ol silva, ol gol, mo ol narafala samting long ples blong putumgud ol sas samting long haos blong Jehova.+

Ol futnot

NT: “pales.”
1 kiubit i sem mak long 44.5 sentimeta. Yu luk Ap. B14.
NT: “fo saed.”
NT: “pales.”
NT: “bras,” long ples ya mo ol nara vas long japta ya.
NT: “raon long wanwan long tufala pos ya hem i 12 kiubit.”
Hemia Rum We i Tabu.
NT: “saot.”
Hemia i minim “I Gud Hem [Jehova] i Mekem Hem i Kam Strong.”
NT: “not.”
Maet hemia i minim “Long Paoa.”
NT: “tank.”
NT: “raon long besin ya i 30 kiubit.”
1 bat i sem mak long 22 L. Yu luk Ap. B14.
Hemia samwe 7.4 sentimeta. Yu luk Ap. B14.
NT: “kat blong wota.”
Maet hemia ol mak we oli raon.
NT: “bigfala blong hem i fo kiubit.”
Yu luk Diksonari.
NT: “ol tongs.”