Fas Buk Blong Ol King 6:1-38
6 Long namba 480 yia afta we ol laen blong Isrel* oli aot long Ijip,+ Solomon i stat blong wokem haos blong Jehova* long manis Sif*+ (hemia seken manis), hemia long namba 4 yia afta we hem i kam king blong Isrel.+
2 Haos blong Jehova we King Solomon i wokem, longfala blong hem i 60 kiubit,* mo bigfala blong hem i 20 kiubit, mo hae blong hem i 30 kiubit.+
3 Rum long doa+ blong tempol, longfala* blong hem i 20 kiubit, sem mak olsem bigfala blong haos ya.* Mo bigfala blong rum ya hem i ten kiubit.
4 Biaen hem i mekem ol windo blong haos ya, mo hem i wokem we aotsaed i smol be insaed i bigwan.+
5 Biaen hem i wokem wan narafala haos bakegen i goraon long wol blong haos ya, hemia wol blong tempol* wetem rum ya we i insaed olgeta.+ Mo insaed long narafala haos ya, hem i wokem ol rum.+
6 Faswan stori we i stap daon, bigfala blong hem i faef kiubit, mo sekenwan we i stap antap long hem, bigfala blong hem i sikis kiubit, mo laswan we i stap antap, bigfala blong hem i seven kiubit. Hemia from we raon long wol blong haos ya, hem i mekem sam ples blong ol timba oli save sidaon gud long hem, olsem nao i no nid blong timba i gotru long wol blong tempol.+
7 Haos ya oli wokem long ol ston ya we oli bin putumgud finis i stap,+ nao i no gat noes blong hama, o akis, o ol aean tul, taem oli stap wokem haos ya.
8 Doa blong go insaed long faswan stori ya i stap long saed blong haos ya, long saed i go long saot,*+ mo i gat wan lada we i goraon i go kasem seken stori, mo i stap long seken stori i go kasem laswan stori.
9 Solomon i gohed blong wokem haos ya kasem we i finisim,+ biaen i yusum ol pos mo ol plang blong sida blong wokem ruf blong haos ya.+
10 Stori haos ya we i goraon long tempol ya,+ hae blong olgeta wanwan i faef kiubit, mo ol timba blong sida oli joenem tufala haos ya.
11 Long taem ya, tok blong Jehova i kamtru long Solomon se:
12 “Long saed blong haos ya we yu stap wokem, sipos yu wokbaot folem ol loa blong mi, mo yu obei long ol jajmen blong mi, mo yu mekem olgeta samting we komanmen blong mi i talem,+ bambae mi mi mekem samting we mi promes long papa blong yu Deved, i kamtru long yu,+
13 mo bambae mi stap long medel blong ol laen blong Isrel,+ mo bambae mi no save lego ol man blong mi, ol man Isrel.”+
14 Nao Solomon i gohed blong wokem haos ya blong finisim.
15 Insaed long haos ya, hem i blokem ol wol blong hem wetem ol flat timba blong sida. Hem i putum ol timba ya long wol, i stat long floa blong haos ya i go kasem ol rafta long siling, mo hem i putum ol flat timba blong junipa long floa blong haos ya.+
16 Insaed long en blong haos ya, hem i wokem wan rum blong 20 kiubit. Hem i yusum ol flat timba blong sida blong wokem rum ya, i stat long floa blong hem i go kasem ol rafta blong hem. Mo hem i mekem rum ya i kam rum we i insaed olgeta,+ hemia Rum We i Tabu We i Tabu.+
17 Mo tempol,*+ hemia rum we i stap long fored blong hem, hem i 40 kiubit.
18 Insaed long haos ya, oli blokemgud long sida, mo yu no save luk ston. Mo oli katem ol pija blong wael melen+ mo ol flaoa we oli open,+ long ol sida ya.
19 Nao insaed long haos ya, hem i rerem rum ya we i insaed olgeta,+ blong putum bokis blong kontrak blong Jehova long hem.+
20 Rum ya we i insaed olgeta, longfala blong hem i 20 kiubit, bigfala blong hem i 20 kiubit, mo hae blong hem i 20 kiubit.+ Mo hem i blokem ol ples ya long gol we i klin gud, mo i blokem olta+ long sida.
21 Nao Solomon i blokem insaed blong haos ya long gol we i klin gud,+ i mekem olsem tu long rum ya we i insaed olgeta, mo i putum ol jen we oli wokem long gol long fored blong rum ya we i insaed olgeta.+
22 Hem i blokem insaed blong haos ya long gol go kasem we ful haos ya i gat gol. Biaen hem i blokem olta ya tu long gol, hemia olta+ we i stap klosap long rum ya we i insaed olgeta.
23 Long rum ya we i insaed olgeta, hem i wokem tu jerubim+ long wud blong paentri* mo hae blong tufala wanwan i ten kiubit.+
24 Wansaed wing blong wan jerubim i faef kiubit, mo narasaed wing i faef kiubit. Stat long en blong wan wing i go kasem en blong narafala wing, hem i ten kiubit.
25 Narafala jerubim ya tu i ten kiubit. Tufala jerubim ya, saes mo sep blong tufala i sem mak nomo.
26 Hae blong wan jerubim i ten kiubit, mo narawan tu i sem mak.
27 Biaen hem i putum tufala jerubim ya+ long rum ya we i insaed olgeta.* Ol wing blong tufala jerubim ya oli open, nao wan wing blong wan jerubim i go kasem wol mo wan wing blong nara jerubim tu i go kasem wol, mo narafala wing blong tufala i go long medel blong rum ya, mekem se tufala wing ya i tajem tufala.
28 Mo hem i blokem tufala jerubim ya long gol.
29 Mo long evri wol blong haos ya, long rum ya we i insaed olgeta mo rum aotsaed,* hem i katem ol pija blong ol jerubim,+ ol pamtri,+ mo ol flaoa we oli open.+
30 Mo floa blong rum ya we i insaed olgeta wetem rum aotsaed, hem i blokem long gol.
31 Mo long doa blong kam insaed long rum ya we i insaed olgeta, hem i wokem tu doa long paentri, wetem ol bigfala pos blong saed blong hem, mo ol pos blong doa, olsem namba 5 haf.*
32 Hem i wokem tufala doa ya long paentri, mo hem i katem pija blong ol jerubim, ol pamtri, mo ol flaoa we oli open long ol doa ya. Biaen hem i blokem ol doa ya long gol. Hem i hamarem gol i go long ol jerubim mo ol pamtri ya.
33 Mo hem i mekem sem mak tu long doa blong kam insaed long tempol,* hem i wokem ol pos blong doa long paentri, olsem namba 4 haf.*
34 Mo hem i wokem tu doa long wud blong junipa. Wan doa i gat tu haf blong hem we oli save foldem, mo narawan tu i gat tu haf blong hem we oli save foldem taem oli openem.+
35 Long doa ya hem i katem ol pija blong ol jerubim, ol pamtri, mo ol flaoa we oli open, mo i blokem ol pija ya long gol.
36 Blong wokem yad insaed,+ hem i putumap tri laen blong ston we oli katemgud mo wan laen blong ol timba blong sida.+
37 Long namba 4 yia, long manis Sif,* fandesen blong haos blong Jehova i finis.+
38 Mo long namba 11 yia, long manis Bul* (hemia namba 8 manis), hem i finisim haos ya wetem evri samting blong hem, folem plan we i stap.+ Hem i tekem seven yia blong wokem haos ya.
Ol futnot
^ PT: “ol boe blong Isrel.”
^ NT: “bigfala.”
^ NT: “bigfala blong haos ya i 20 kiubit.”
^ Hemia i tokbaot Rum We i Tabu.
^ PT: “raetsaed.”
^ Hemia Rum We i Tabu we i stap long fored blong Rum We i Tabu We i Tabu.
^ PT: “oel wud” maet hem i paentri ya Alepo.
^ Hemia Rum We i Tabu We i Tabu.
^ PT: “insaed mo aotsaed.”
^ Maet namba ya i go long ples we doa i mas stap long hem o long saes blong ol doa.
^ Hemia Rum We i Tabu.
^ Maet namba ya i go long ples we doa i mas stap long hem o long saes blong ol doa.
