Ekesodu 9:1-35
9 Tsô Yehova kaa a Mose ér: “Za hen Farou za kaa a na wer, ‘Ka kwagh u Yehova Aôndo u Mbaheberu a ôr je ne: “Na ior av ian ve yem ve za civir mo.+
2 Kpa aluer u venda u nan ve ian, u zer ve mba her yô,
3 nenge! uwegh ku Yehova+ kua va a ican sha ilev you mbi mbi lu ken akôngo la. Bouange u vihin tsung una va sha anyinya a ou man ujaki ou man urakumi ou man ibua you kua iyôngo you kpaa.+
4 Man Yehova una tese mkposo hen atô u ilev mbi Iserael a ilev mbi Igipiti, ilegh ki Mbaiserael i môm kpa kia kpe ga.”’”+
5 Heela tseegh ga, Yehova shi ver shighe kpaa, a kaa ér: “Kper Yehova una er kwagh ne hen tar ne.”
6 Kpernan je maa Yehova er kwagh ne, hanma inja zendenya i Mbaigipiti cii gba kpen,+ kpa Mbaiserael yô zendenya ve môm kpe ga.
7 Farou tôvon sha mi yô, nenge! zendenya u Iserael môm tsô kpa kpe ga. Nahan cii kpa, ishima i Farou za hemen u cighir her,* a venda u nan ior mbara ian ér ve yem.+
8 Yehova maa kaa a Mose man Aron ér: “Kese nen mtwem ma ken atse sha ave poo, Mose a tsenda ma sha ahumbe sha ashe a Farou.
9 Ma a hingir ihundu i vian lueen ken tar u Igipiti cica cii, ia haa uumace man zendenya atundu a hughum iyol, ken tar u Igipiti cii.”
10 Maa ve kese mtwem ma ken atse, ve za tile sha ishigh ki Farou, maa Mose gema tsenda sha ahumbe, tsô ma haa uumace man zendenya atundu a hughum.
11 Mbaahiriv mbara kera fatyô u tilen sha ishigh ki Mose ga sha ci u atundu la, gadia a mura mbaahiriv mbara iyol, kua Mbaigipiti cii.+
12 Kpa Yehova de ishima i Farou cighir, nahan a kegh ato a ve ga, vough er Yehova vande ôron Mose nahan.+
13 Maa Yehova kaa a Mose ér: “Mough tugh tugh za za tile sha ishigh ki Farou, kaa a na wer, ‘Ka kwagh u Yehova, Aôndo u Mbaheberu, a kaa je ne: “Na ior av ian ve yem ve za civir mo.
14 M ngu van a atsan ne cii sha a we man sha mbatomov ou man sha ior ou hen shighe ne, sha er u fa er sha tar cii or môm nan lu er mo nahan ga yô.+
15 Gadia mea soo yô, hegen nahan ma m naregh uwegh agh, ma m haa u kua ior ou cii bouange u vihin, ma m tim u sha tar kera.
16 Kpa ityôkyaa i i ne ve m de u lu uma her yô ka i ne: ka sha u me tese u tahav av, shi me na a pase iti yam sha tar cii yô.+
17 U ngu di kenden a iyol you sha her,* vendan u nan ior av ian wer ve yem zee?
18 Yô nenge, kper er hegen nahan me nôô zegeura u awombogh, imba i i gbe Igipiti je i lu a vande nôôn ga zan zan nyian yô.
19 Sha nahan yô, tindi i hide a hanma zendenya wou kua hanma kwagh u a lu u wou u a lu ken akôngo cii hen ya. Hanma or man zendenya u a lu a hide ken ya ga, man awombo ne a kohol ve ken akôngo cii yô, vea kpe.”’”
20 Hanma ortom u Farou u yange nan cia kwaghôron u Yehova cii, nan hide a mbatomov mba nan kua uzendenya mba nan hen ya fese,
21 kpa or u yange nan wa imo i Yehova ikyo ga cii yô, nan undu mbatomov mba nan kua uzendenya mba nan cii ve lu ken akôngo.
22 Yehova maa kaa a Mose ér: “Kende uwegh ough sha aôndo, sha er awombo aa nôô ken tar u Igipiti cii,+ sha ior man sha uzendenya man sha imendenev mbi ken ityev mbi ken tar u Igipiti cii yô.”+
23 Tsô Mose kende gbough nagh sha aôndo, nahan Yehova er idyuran gba duran shi awombo gba nôôn, usu due sha haa shin tar,* Yehova er ura u awombogh za hemen u nôôn ken tar u Igipiti cii.
24 Awombo lu nôôn, usu nungwa sha awombo la. A lu nôôn taver taver; hii shighe u Igipiti hingir ikyurior la je, awombo lu a vande nôôn ken tar la imba ne ga.+
25 Awombo la nôô vihi hanma kwagh u ken ityev, ken tar u Igipiti cii, hii sha uumace due sha zendenya, a vihi imendenev kua hanma kon u ken toho cii.+
26 Lu ken tar u Goshen, ape Mbaiserael lu la tseegh, awombo la lu nôôn ga ye.+
27 Nahan Farou tindi i za yila Mose man Aron, a kaa a ve ér: “Kwa ne yô, m er isholibo. Yehova ngu a ishô, ka mo man ior av se lu a ibo ye.
28 Zamber a Yehova, sha er idyuran i Aôndo man awombo ne aa de yô. Nahan me na ne ian ne yem, ne kera ngôôr ga cii.”
29 Nahan Mose kaa a na ér: “Me duen a due hen gar ne kera nahan, me za samber ave me sôn Yehova. Nahan idyuran ne ia de, awombo kpa aa de u nôôn, sha er u fa er tar cii u lu u Yehova yô.+
30 Kpa we man mbatomov ou yô, m vande fan er hen shighe la je kpa ne cia Yehova Aôndo ga yô.”
31 Ada* man barli cii saa ishe, sha ci u hen shighe la barli mar, shi ada kpa kpar.
32 Kpa mbaalakema yô,* i vihi ve ga, sha ci u ve lu iyiav mbi masetyô.*
33 Tsô Mose kar sha ishigh ki Farou kera, due ken gar la za samber ave sôn Yehova, maa idyuran la de, shi awombo kpa de u nôôn, maa ura la tôndo.+
34 Zum u Farou nenge er ura la tôndo, awombo de u nôôn shi idyuran la kpa de yô, shi a er isholibo, a cighir ishima na,+ un man mbatomov nav.
35 Ishima i Farou za hemen u cighir her, a venda u nan Mbaiserael ian ér ve yem, vough er Yehova vande ôron sha zwa u Mose nahan.+
Ngeren mba shin kpe
^ Shin “Farou za hemen u taver ityough her; Farou lumun u ungwan kwagh ga.”
^ Shin “U ngu di moron iyol her tsô.”
^ Alaghga mba ôron kwagh u inyiar i sha utaha.
^ Shin “imendenegh ki eren akondo a mi.”
^ Ngeren u ken zwa Heberu la ter mbaalakema heen uhar, alakema kpôô kpôô man kpan-alakema u yange i kahan ken Igipiti yô.
^ Shin “i kahan ve fele ga.”
