Ekesodu 17:1-16
17 Tsô nongoior u Iserael cii mough hen taaikyôngo u Sen+ gba haan afo yemen, vough er Yehova tese nahan.+ Ve va haa afo hen Rafidim.+ Kpa ior zua a mngerem ma man her ga.
2 Nahan ior gba zôhôn a Mose+ kaan ér: “Na se mngerem se ma.” Kpa Mose kaa a ve ér: “Er nan ne lu zôhôn a moo? Er nan ka ne shi karen Yehova nahana?”+
3 Kpa imura kôr ior mbara hen ijiir la kpishi, nahan ve zer gban ahon a Mose+ kaan ér: “Er nan u due a vese ken Igipiti kera wer u va wua se man ônov asev man ilev yasev cii sha imura?”
4 Ken masejime yô, Mose vaa a Yehova kaa ér: “M er a ior mban nena? Shi kpuaa tsô vea tam awen!”
5 Maa Yehova kaa a Mose ér: “Kar ior mban sha hemen, kua a mbatamen mba Iserael mbagen, shi tôô gbough ough ku yange u gbidye sha Ifi u Nil la.+ Tôô ku kôr ken uwe yemen.
6 Nenge! M ngu tilen sha ishigh you her sha vande, hen Horebi. Gbidye vande la, nahan mngerem ma a due ker ior vea ma.”+ Tsô Mose er nahan sha ashe a mbatamen mba Iserael mbara.
7 Nahan a ii ijiir la iti ér Masa*+ man Meriba,*+ sha ci u zwa u Mbaiserael zôhô la, kua sha ci u ve kar Yehova+ sha u pinen ér: “Yehova ngu her atô wase shin ngu ga?”
8 Tsô Mbaamaleki+ mough va u va nôngon ityav a Iserael hen Rafidim.+
9 Maa Mose kaa a Yoshua ér:+ “Tsua nomso sha ci wase, mough za nôngo nen ityav a Mbaamaleki. Kper mo me tile sha igyungu a gbough ku Aôndo u mimi la ken uwegh agh.”
10 Maa Yoshua er vough er Mose kaa un nahan,+ a gba za nôngon ityav a Mbaamaleki. Mose man Aron man Hur+ di gema unde sha ityough ki igyungu la.
11 Nahan Mose una kende ave a na sha yô, Mbaiserael ve hemban, kpa una shirin a shir ave nahan maa, Mbaamaleki ve gba hemban.
12 Ave nga va kpen Mose yô, ve tôô iwen ve ver un a tema sha mi. Maa Aron man Hur ve tile keen man keen ve kôr ave na, nahan ave na lu her dông zan zan iyange kar miren.
13 Kape Yoshua hemba Amaleki kua ior nav sha sanker la.+
14 Yehova maa kaa a Mose ér: “Nger kwagh ne ken takeda, a lu kwagh u umbur, kimbir un Yoshua a ungwa, nger wer, ‘Me ese a ese Amaleki sha won kera, a kera umbur un ga.’”+
15 Maa Mose ta atse her, a ii a iti ér Yehova-nishi,*
16 a kaa ér: “Er uwegh ku Amaleki ku lu hendan a ikyônough ki torough ki Yehova* yô,+ Yehova una nôngo ityav a na sha ikyov ikyov.”+
