Ekesodu 18:1-27
18 Tsô Yetero pristi u Midian, terkem u Mose,+ ungwa akaa a Aôndo er a Mose kua ior i Iserael la cii, er Yehova due a Iserael ken Igipiti kera yô.+
2 Yetero terkem u Mose, yange lumun ér Shipora kwase u Mose a lu vea na, shighe u i kaa ér a hide a za kohol un la,
3 un kua ônov nav mba nomso uhar.+ Wan na u môm la iti na lu Gershom,*+ sha ci u Mose kaa ér, “M hingir shiror ken tar ugen.”
4 Iti i ugen la di lu Eliezar,* sha ci u a kaa ér, “Aôndo u terem ka or u wasen mo, a yimam sha ikyev i sanker u Farou.”+
5 Nahan Yetero terkem u Mose, mough vea ônov mba Mose man kwase u Mose, ve va hen Mose ken taaikyôngo ape haa afo hen uwo u Aôndo u mimi la.+
6 Maa a tindi loho hen Mose ér: “Mo Yetero teru kem,+ m ngu van her a we vea kwase wou a ônov nav uhar.”
7 Fese je maa Mose due za kegh ter na kem gbenda, a ngurum inya shi a suse un zwa. Ve gba pinen tar, maa ve kar ve za nyôr ken tenti.
8 Tsô Mose ôr ter na kem akaa a Yehova er a Farou man Mbaigipiti sha ci u Iserael la cii,+ man atsan a ve tagher a mi sha gbenda la cii,+ kua er Yehova yima ve la kpaa.
9 Yetero ember sha akaa a dedoo a Yehova er a Mbaiserael sha u yiman ve ken Igipiti* la cii.
10 Maa Yetero kaa ér: “I wuese Yehova, un u a yem ne sha ikyev i Igipiti man sha ikyev i Farou la, a yima ior mban sha ikyev i Igipiti.
11 Hegen m fa er Yehova a hembe mbaaôndo mbagenev cii yô,+ sha ci u kwagh u yange er a mba ve manger sha ior nav la.”
12 Maa Yetero, terkem u Mose, va a nagh ku nanden kua iniav mbigenev va na Aôndo, nahan Aron kua mbatamen mba ken Iserael cii va ya iwer vea terkem u Mose sha ishigh ki Aôndo u mimi.
13 Kpernan sev mbu aven yô, Mose tema lu ôron ior ijir er vanden eren nahan, nahan ior tile sha ishigh ki Mose pepe zan zan iyange kar been.
14 Zum u terkem u Mose nenge kwagh u lu eren a ior cii la yô, a kaa ér: “Ka nyi u eren a ior mban nahana? Er nan u tem heen we tswen, ior cii ve til sha ishigh you pepe zan zan aikighee?”
15 Mose maa kaa a ter na kem ér: “Ka sha ci u ior mban ka ve zer van hen a mo va pinen Aôndo kwagh.
16 Ikyaa ka ia due yô, ve va hen a mo, m va kure ikyaa i i zough orgen a orgen la, shi m ôr ve kwagh u Aôndo a kaa la, kua atindi a na kpaa.”+
17 Terkem u Mose kaa a na ér: “Kwagh u u lu eren ne doo ga.
18 A va gande u iyol, we kua ior mba u lu vea ve mban, sha ci u ikyav mbin mbi yuhwa gande u, u fatyô u tôôn mbi tswen ga.
19 Yô ver ato a mo. Me due u a mhen, shi Aôndo una lu a we.+ We tile sha ityough ki Aôndo u mimi la hen ior mban,+ nahan zaan a ijir hen Aôndo u mimi la.+
20 Tesen ve akaawan man atindi.+ Tese ve ve̱ fa gbenda u i doo u vea zaan sha mi, kua tom u vea eren la kpaa.
21 Kpa we gema tsua nomso mba cian Aôndo ken ior mban, mba vea fatyô u eren tom ne,+ mba ve lu a jighjigh iyol shi ve ker anyighe ihyom yô,+ ver ve ve̱ lu mbahemen ior dubu dubu, man mbahemen ior deri deri, man mbahemen ior akunduahargber akunduahargber kua mbahemen ior pue pue.+
22 Ve ôron ior ajir shighe u ikyaa i dugh yô,* a lu ijir i i taver yô ve va a mi her a we,+ kpa a lu ajir a kiriki la yô ve kure a. Heghem iyol you ikyav sha u panden ikyav mbin nan ve ve wase u.+
23 Aluer u er kwagh ne man ka sha ishima i Aôndo kpaa yô, a kera gande u iyol ga, shi hanma or kpa nana yem hen ya u nan saan saan.”
24 Nahan fese je, Mose ungwa imo i ter na kem, a er hanma kwagh u kaa la.
25 Mose tsua nomsombaiorov ken Iserael cii mba vea fatyô u eren tom la yô. A ver ve ve lu ityough sha ior, ve lu mbahemen ior dubu dubu, man mbahemen ior deri deri, man mbahemen ior akunduahargber akunduahargber kua mbahemen ior pue pue.
26 Nahan ve lu ôron ior ajir shighe u ikyaa i dugh yô. A lu ikyaa i i cimin yô ve va a mi hen Mose,+ kpa hanma ikyaa i kiriki yô ve kure.
27 Tsô Mose za ver ter na kem gbenda,+ a hide a yem ken tar na.
