Ekesodu 6:1-30
6 Nahan Yehova kaa a Mose ér: “Hegen u nenge kwagh u me er a Farou yô.+ Ka uwegh ku ageegh kua kighir un ve una de ér ve yem ye, shi ka uwegh ku ageegh kua kighir un ve una zenda ve ken tar na kera kpaa ye.”+
2 Maa Aôndo kaa a Mose ér: “Ka mo Yehova.
3 Yange m anden hen Aberaham man Isaka man Yakob, ve fam ér m ngu Aôndo u Hemban Agee Cii,+ kpa m pase iyol yam hen a ve+ sha iti yam i Yehova la+ ga.*
4 Shi yange m ya ikyur a ve mer me na ve tar u Kaanan, tar u yange ve tema shir ker la.+
5 Hegen m ungwa mtoghor u ior i Iserael, ve mba Mbaigipiti ve ker ve ikpan ne, nahan m umbur ikyuryan yam.+
6 “Sha nahan yô, kaa a Mbaiserael wer, ‘Ka mo Yehova. Me due a ven ken ican i Mbaigipiti ve lu eren ne la, shi me yima ne, ne kera lu ikpan ve ga.+ Me naregh uwegh agh ku ageegh me tsaha ve tsung, nahan me paa ne.+
7 Me ngohol ne ne lu ior av, mo di me lu Aôndo wen,+ nahan ne fa dedoo er i lu mo Yehova Aôndo wen m lu duen a ven ken ican i Mbaigipiti ve lu eren ne la kera yô.
8 Me va a ven ken tar u yange m tôndo zwa shi m bum* mer me na Aberaham man Isaka man Yakob la; nahan me na ne u, ua hingir kwagh wen.+ Ka mo Yehova.’”+
9 Mose va ôr Mbaiserael loho ne, kpa ve kegh ato a Mose ga, sha ci u iyol kpe ve, kua sha ci u tom u kpan u ve lu eren sha ican tsung la.+
10 Maa Yehova lam a Mose kaa a na ér:
11 “Za za ôr Farou tor u Igipiti wer a de Mbaiserael ve due ken tar na kera.”
12 Nahan kpa, Mose gema kaa a Yehova ér: “Nenge! Mbaiserael kpa venda u keghen ato a mo;+ nahan a er nan ve Farou una kegh ato a mo, mo u iliam i nem ican ne sha wono?”+
13 Kpa Yehova shi kimbir ôron Mose man Aron kwagh u vea za ôr Mbaiserael man Farou tor u Igipiti, sha er vea due a Mbaiserael ken tar u Igipiti kera yô.
14 Ka mbayaav mba sha ihinda i uter vev je ne: Ônov mba Ruben waniunda u Iserael yô,+ lu Hanoki man Palu man Heseron kua Karmi.+ Mban ka icombor i Ruben je ne.
15 Ônov mba Shimion yô, lu Yemuel man Yamin man Ohadi man Yakin man Sohar kua Shaul, wan u Kwasekaanan la.+ Mban ka icombor i Shimion je ne.
16 Ka ati a ônov mba Levi+ sha icombor i ve due ker la je ne: Lu Gershon man Kohati kua Merari.+ Levi tsa anyom 137.
17 Ônov mba Gershon yô, lu Libeni man Shimei, sha icombor ve.+
18 Ônov mba Kohati yô, lu Amram man Isehar man Heberon kua Ushiel.+ Kohati tsa anyom 133.
19 Ônov mba Merari yô, lu Maheli man Mushi.
Mban lu icombor i Mbalevi, sha icombor i ve due ker la.+
20 Amram vôso Yokebedi anmgbian u ter na.+ A mar un Aron man Mose.+ Amram tsa anyom 137.
21 Ônov mba Isehar yô, lu Kora+ man Nefegi kua Shikeri.
22 Ônov mba Ushiel yô, lu Mishael man Elisafan+ kua Shiteri.
23 Aron gema vôso Elisheba wan u Aminadabi, ingyôr i Nashon,+ a mar un Nadabi man Abihu man Eleasar kua Itamar.+
24 Ônov mba Kora yô, lu Ashir man Elkana kua Abiasav.+ Mban ka icombor i Mbakora je ne.+
25 Eleasar+ wan u Aron vôso kwase ken ônov mba Putiel. A mar un Pinehashi.+
Mban ka mbayaav mba Mbalevi sha icombor ve je ne.+
26 Ka Aron man Mose shon mba Yehova kaa a ve ér: “Due nen a ior i Iserael ken tar u Igipiti kera, sha akum akum”* la je ne.+
27 Ka ve mban ne yange ve za lam a Farou tor u Igipiti, sha er vea due a ior i Iserael ken Igipiti kera ye. Ka Mose man Aron shon je ne.+
28 Sha iyange i Yehova lam a Mose ken tar u Igipiti la,
29 Yehova kaa a Mose ér: “Mo m ngu Yehova. Ôr Farou, tor u Igipiti, hanma kwagh u m lu ôron we cii.”
30 Maa Mose kaa a Yehova ér: “Nenge! Iliam nem ican, nahan a er nan ve Farou una kegh ato a mo sha wono?”+
