Ekesodu 1:1-22
1 Ka ati a ônov mba Iserael mba ve va ken Igipiti vea Yakob je ne, hanma or va vea mba hen ya u nan:+
2 Lu Ruben man Shimion man Levi man Yuda+
3 man Isakar man Sebulon man Benyamin
4 man Dan man Nafetali man Gadi kua Asher.+
5 Ônov mba Yakob mar cii* yô, lu iorov 70, kpa Yosev yô vande lun ken Igipiti.+
6 Shighe kar yô, Yosev va kpe+ kua anmgbianev nav cii, kov la cii kpe.
7 Mbaiserael* mar kpishi gba seer iyenge, ve za hemen u seer a seer shi taver sha gbenda u kpilighyol, je yô ve iv ken tar la.+
8 Shighe kar yô, tor ugen gba hemen Igipiti u fa Yosev ga yô.
9 Nahan a kaa a ior nav ér: “Nenge! Ior mba Iserael hemba se iyenge, shi ve hemba taver a vese.+
10 De se er nen kwagh a ve sha ayom. Gayô vea za hemen u seer iyenge, nahan yange ityav mbia gbaan yô, vea kohol mbahyomov asev vea ta num sha a vese maa vea undu tar ne.”
11 Nahan ve ver mbavesen mba kighir ior a tom ér ve kighir ve a tom u sha ican.+ Ve maa Farou agar a koson akaa ker, lu Pitom man Raamse.+
12 Kpa er ve lu kighir ve la, ve lu hemban ngeen a ngee, shi ve lu hemban samber cii, je yô mciem hingir u gban ve iyol tsung sha kwagh u Mbaiserael.+
13 Kwagh ne na yô, Mbaigipiti gba kighir Mbaiserael a tom u kpan u vihin tsung.+
14 Ve na uma due ve ishima a tom u sha ican. Ve er tom u hôron inya tan akam man hanma injatom i kpan cii ken ityev. Een, ve kighir ve a tom u sha ican, ve er hanma tom u kpan cii.+
15 Shighe kar yô, tor u Igipiti lam a kasev mba Heberu mba ve kôron mar la, ati a ve lu Shifera man Pua.
16 A kaa a ve ér: “Shighe u ne lu kôron kasev mba Heberu mar yô,+ ver nen ishima tsembelee nenge nen wan u ve* mar la, aluer ka wan u nomso yô wua nen kpee je, kpa aluer ka u kwase yô, de nen a lu uma.”
17 Nahan kpa, kasev mba kôron mar mbara cian Aôndo u mimi la, nahan ve er kwagh u tor u Igipiti kaa ve la ga. Ve gema ve lu den ônov mba nomso mbara uma her.+
18 Shighe kar yô, tor u Igipiti yila kasev mba kôron mar mbara pine ve ér: “Er nan ne lu den ônov mba nomso mbara uma here?”
19 Kasev mba kôron mar mbara gema kaa a Farou ér: “Kasev mba Heberu mba er kasev mba Igipiti nahan ga. Ve taver iyol, cii ve kasev mba kôron mar mbara ve va nahan, ka ve mar kera kpaa.”
20 Nahan Aôndo er a kasev mba kôron mar mbara doo doo, shi ior mbara za hemen u seer shi lun mbaageev kpishi.
21 Man er kasev mba kôron mar mban lu cian Aôndo u mimi la yô, a va na ve icombor.
22 Ken masejime yô, Farou va wa ior nav cii tindi kaa ér: “Hanma wannomso u Mbaheberu ve mar yô, kende nen nan shin Ifi u Nil, kpa hanma wan u kwase yô, de nen nana lu uma.”+
