Ekesodu 16:1-36
16 Tsô ve mough hen Elim; nahan ken masejime yô, nongoior u Iserael cii va nyôr hen taaikyôngo u Sen,+ u a lu her atô u Elim man Senai la, lu ken uwer u sha uhar ayange 15, zum u ve due ken tar u Igipiti kera la.
2 Maa nongo u Mbaiserael cii gba gban ahon a Mose man Aron ken taaikyôngo.+
3 Mbaiserael zer kaan a ve ér: “Guda yange ma se kpe sha uwegh ku Yehova ken tar u Igipiti, zum u se teman a atsua a inyam ikyum,+ se yaan kwagh* kuman se la. Hegen ne va a vese ken taaikyôngo heen sha u va timin nongoior ne jimin cii sha ijen.”+
4 Maa Yehova kaa a Mose ér: “Nenge, m ngu nan kwaghyan* una duen sha una haan,+ hanma or nana duen ayange ayange nana za kuran i kuman nan,+ sha er me kar ior mban me nenge, aluer ka u vea kuran tindi wam shin vea kuran ga yô.+
5 Kpa sha iyange i sha ataratar la yô,+ ve er kwaghyan a kwagh u ve kura la i kuma er u ve vanden eren ken ayange agen la nahan kwa har.”+
6 Nahan Mose man Aron kaa a Mbaiserael cii ér: “Hen aikighe ne, ne fa wang er i lu Yehova yange due a ven ken tar u Igipiti kera yô.+
7 Kper pepe ne nenge a iengem i Yehova, gadia Yehova ungwa ahon a ne lu gban a na la. Se mba di nyi je ve ne za gba ahon a vese?”
8 Mose shi kaa ér: “Zum u Yehova una na ne inyam aikighe ér ne ya, shi una na ne kwaghyan* pepe ne ya a kuma ne la, ne nenge er Yehova a ongo ahon a ne lu gban a na la yô. Kpa se mba nyi? Ka se ne lu gban ahon a vese ga, kpa ka Yehova.”+
9 Maa Mose kaa a Aron ér: “Kaa nongo u Mbaiserael cii wer, ‘Kporom nen hen ishigh ki Yehova, sha ci u a ungwa ahon a ne lu gban la.’”+
10 Aron lamen a nongoior u Iserael cii been a bee nahan maa, ve gema ve na ishigh vegher u ken taaikyôngo la, tsô nenge! iengem i Yehova ande ken ibyeenegh kira.+
11 Yehova shi lam a Mose kaa ér:
12 “M ungwa ivever i Mbaiserael la.+ Kaa ve wer, ‘Ne va ya inyam aikighe, kper pepe yô, ne ya kwagh* a kuma ne,+ nahan ne fa wang er mo m lu Yehova Aôndo wen yô.’”+
13 Nahan hen aikighe la, utakange cir hen afo la,+ sev mbu aven yô, avure gba hen afo la cii.
14 Avure la nga uman kera yô, ve nenge kwagh lu hen inya ken taaikyôngo la avur avur,+ kungu hen inya er ka senou nahan.
15 Mbaiserael mba nengen a mi yô, ve gba pinen ayol a ve ér, “Ka nyi nee?” sha ci u ve fa kwagh shon ga. Mose gema kaa a ve ér: “Ka kwaghyan u Yehova a ne ne ér ne ya yô.+
16 Nahan ka kwagh u Yehova a kaa je ne, ‘Hanma or a kura un sha mye u nan. Kura nen ikyaren i omer i môm*+ sha ci u hanma or, sha ingyegh ki ior mba hanmô wen nan lu a mi hen tenti u nan la.’”
17 Tsô Mbaiserael gba eren nahan; ve kura un, mbagen lu kuran kpishi, mbagen lu kuran cuku.
18 Kpa zum u vea va karen un sha omer yô, or u nan kura kpishi la nan lu a mi i ngee i gande ga, shi or u nan kura cuku la kpaa nan lu a mi i yina ga.+ Hanmô ve kura sha mye u nan.
19 Maa Mose kaa a ve ér: “Or môm nana de den ér a tsa her ga.”+
20 Kpa ve ungwa imo i Mose ga. Mbagenev de un tsa her, nahan a gba azôô, a huma, tsô ishima vihi Mose a ve.
21 Ve duen hanma pepe ve za kuran, hanma or nan kura sha mye u nan. Oo ua va taan yô maa a sough kera.
22 Sha iyange i sha ataratar la, ve kura kwaghyan la kuma er ve vanden kuran nahan kwa har,+ uomer uhar sha ci u hanma or. Nahan utyombaiorov mba nongoior la cii va, va ôr Mose kwagh ne.
23 Tsô a kaa a ve ér: “Ka kwagh u Yehova a kaa je la. Gba u iyange i kper la a mem hanma tom cii,* ka icighan iyange i memen i Yehova.+ Kaa nen kwagh u i gbe u ne kaa la, shi jiidi nen kwagh u i gbe u ne jiidi la kpaa;+ kwagh u a shi her la yô, ver nen her zan zan kper pepe.”
24 Nahan ve ver un her zan zan sev kar aven, vough er Mose kaa nahan, kpa a huma ga, shi a gba azôô kpaa ga.
25 Maa Mose kaa ér: “Ya un nen nyian, sha ci u nyian ka iyange i memen i Yehova. Ne kera zua a mi hen inya nyian ga.
26 Ne kuran un ayange ataratar, kpa sha iyange i sha utaankaruhar i i lu Iyange i Memen la yô,+ una kera lu ga.”
27 Nahan kpa, ior mbagenev due sha iyange i sha utaankaruhar la ér vea za kura, kpa ve zua a kwagh ga.
28 Nahan Yehova kaa a Mose ér: “Ne zer vendan akaawan a am man atindi a am a kuma shighe nan je?+
29 Fa nen ner Yehova na ne Iyange i Memen.+ Ka nahan ve a lu nan ne kwaghyan u ayange ahar sha iyange i sha ataratar la ye. Hanma or nana lu ape nan lu la; or môm nana de undun ijiir i nan sha iyange i sha utaankaruhar la ga.”
30 Nahan ior kura Iyange i Memen* sha iyange i sha utaankaruhar la.+
31 Nahan ya u Iserael yila kwaghyan la ér “mana.”* Lu pupuu er ka asange a koliande nahan, lu ken zwa er ka beredi u par par u i nongo iyough sha mi nahan.+
32 Maa Mose kaa ér: “Ka kwagh u Yehova a kaa je ne, ér, ‘Kura un nen ikyaren i omer môm poo, koso un nen her zan zan sha ikyov ikyov,+ sha er vea nenge a kwaghyan u yange m na ne ken taaikyôngo mer ya nen, zum u m lu duen a ven ken tar u Igipiti kera la yô.’”
33 Nahan Mose kaa a Aron ér: “Tôô ityegh, kar mana la ikyaren i omer i môm haa shimi, ver un sha ishigh ki Yehova, i lu kwagh u a ver un her sha ikyov yen cii yô.”+
34 Tsô Aron ver un sha ishigh ki Shiada la,+ vough er Yehova kaa Mose nahan, sha er a koso un una lu her yô.
35 Mbaiserael ya mana la anyom 40,+ zan zan ve kar nyôron ken tar u ior tema her yô.+ Ve ya mana la zan zan ve va ar hen ijootar i tar u Kaanan.+
36 Uikyaren mba omer pue gema ka ikyaren i efa i môm.*
Ngeren mba shin kpe
^ Zwa Heberu, “beredi.”
^ Zwa Heberu, “beredi.”
^ Zwa Heberu, “beredi.”
^ Zwa Heberu, “beredi.”
^ Yange a kuma ulita 2.2. Nenge Ngeren u Seer u B14 la.
^ Shin “Kper la ka iyange i memen.”
^ Shin “ior mem.”
^ A shi nan kpa i zua a iti ne ken ishember i ken zwa Heberu i i gem ér “Ka nyi nee?” la.
^ Efa môm yange a kuma ulita 22. Nenge Ngeren u Seer u B14 la.
