Ekesodu 35:1-35
35 Shighe kar yô, Mose kohol nongo u Iserael cii kaa a ve ér: “Ka akaa a Yehova a kaa ér ne eren je ne:+
2 Eren nen tom ayange ataratar, kpa iyange i sha utaankaruhar la yô ia hingir icighankwagh hen a ven, ia lu iyange i memen hanma tom cii, sha ci u Yehova.+ Anti or u nan er tom sha iyange la yô a wua nan.+
3 De keer nen usu sha ajiir a en sha Iyange i Memen ga.”
4 Mose maa kaa a nongo u Mbaiserael cii ér: “Ka kwagh u Yehova a kaa je ne,
5 ‘Kohol nen iyua sha ci u Yehova ken akaa a ne lu a mi la.+ Hanma or u ishima i mgbegha nan yô,+ nana va na iyua sha ci u Yehova: ka zanaria man azurufa man togula
6 man mou u buluu-buluu* man mou u nyian dindee kua mou u nyian bong, man ikyondo i dedoo kua aive a ivo*+
7 man akôv a anomaiyôngo a i nyian a yô, man akôv a ayu* man kon u akashia*
8 man mkurem ma haan ken amenger man balsam u eren mkurem ma tseghan kwagh kua insensi a mi+
9 kua awen a oniki man awen agen a varen sha efodi+ kua sha ikpa i sha vanger.+
10 “‘Hanmô wen u nan fe tom* yô,+ nana va er hanma kwagh u Yehova a kaa cii,
11 ka tabernakel man tenti na man kwagh u cirin un kua uiwever nav man mtôm nam ma lun ipye man itilan na kua mtôm nam man agbur a na a lun a aan,
12 man areki+ kua igbough na+ man kuur la+ kua ikyondo+ i yisan;
13 man tebul la+ kua igbough na man ikyav nav cii, kua beredi u sha ishi;+
14 man daarimenger+ u tan iwanger kua ikyav nav man amenger a na kua mkurem ma haan tsaren;+
15 man atse a nanden insensi+ kua igbough i a; man mkurem ma tseghan kwagh a mi kua insensi u human doon;+ man ikyondo i yisan sha hunda u tabernakel;
16 man atse a nanden nagh+ kua kper u a u sha togula* man igbough i a kua ikyav mbi a cii; man gbangi kua kwagh u veren un sha mi;+
17 man akondo a kasen tembe la a mi+ kua mtôm ma a man agbur a ma a lun a aan sha mi; man shi ikyondo i sha hunda u tembe la;
18 man amande a tabernakel la kua amande a ikyasen i tembe la man ikyor i a;+
19 man akondo a i tum tsembelee+ sha ci u tom u ken icighanjiir la, man uicighanmbaakondov sha ci u pristi Aron,+ kua akondo a ônov nav mba vea eren tom u upristi la.’”
20 Tsô nongo u Iserael cii kar sha ishigh ki Mose kera.
21 Nahan hanma or u ishima kende nan ker,+ man hanma or u jijingi u nan mgbegha nan cii, nan va na Yehova iyua, sha er a er tenti u kohol ker man ityom i ker cii kua uicighanmbaakondov mbara a mi yô.
22 Ve lu van a akaa, nomso man kasev cii, ve lu van a mi sha asema a ve. Ve va a akaa a hweegh a wan sha ikyondo man mbaabinkwini* man ikyunya kua akaa a hweegh agen man akaa agen kposo kposo a sha zanaria. Ve cii ve va a uiyua vev mba* sha zanaria ve va na Yehova.+
23 Shi mba ve lu a mou u buluu-buluu* man mou u nyian dindee kua mou u nyian bong man ikyondo i dedoo kua aive a ivo* man akôv a anomaiyôngo a i nyian a, kua akôv a ayu* cii ve va a mi.
24 Mba ve lu eren iyua sha azurufa man sha togula cii, ve va na Yehova iyua, shi mba ve lu a kon u akashia cii ve va a mi, sha er a er tom la a mi yô.
25 Kasev mba fan akondo a tumen+ va a kwagh u ve tume sha ave a ve la, lu mou u buluu-buluu* man mou u nyian dindee man mou u nyian bong kua ikyondo i dedoo.
26 Shi kasev mba fan tomaveegh mba asema mgbegha ve cii, ve tume aive a ivo* la.
27 Shi utyombaiorov va a awen a oniki man awen agen a varen sha efodi kua sha ikpa i sha vanger la,+
28 man balsam man mkurem ma haan ken amenger man ma eren mkurem ma tseghan kwagh+ kua insensi a mi.+
29 Nomso man kasev mba asema mgbegha ve cii, ve va a kwagh sha ci u tom u Yehova kaa a Mose ér i er la, Mbaiserael na Yehova iyua ne a ishima ve.+
30 Maa Mose kaa a Mbaiserael ér: “Nenge, Yehova tsua Besalel wan u Uri wan u Hur, u ken ipyaven u Yuda.+
31 A iv un a jijingi u Aôndo, a na un kwaghfan man mkav man mfe u varen hanma iwa cii,
32 sha u eren hwe sha akaa man sha u eren tom a zanaria man azurufa man togula,
33 man u kuan awen shi eren ajiir a varen a, kua u eren hanma injakwagh i hweegh cii sha ikyon.
34 Shi a wa ken ishima na ér a tese ior, un man Oholiabi+ wan u Ahisamaki u ken ipyaven u Dan.
35 A iv ve a mfe*+ u eren tom u varen hanma iwa, man u tumen akaa sha akondo man u eren hwe sha akondo, sha mou u buluu-buluu* man sha mou u nyian dindee man sha mou u nyian bong kua ikyondo i dedoo, man sha u tumen akondo. Ior mban vea er hanma tom man hanma kwagh u hweegh cii.
Ngeren mba shin kpe
^ Shin “mou u kwer.”
^ Shin “ice i ivo.”
^ Gayô lu annyam ugen u shin mnger u a bee a bee ayu yô.
^ Akashia ka kon u lun a asaa. Ngu kposo a kashia u ior ve fe un nyian ne.
^ Zwa Heberu, “nan lu a kwaghfan ken ishima.”
^ Shin “u sha iyôgh ki togula.”
^ Shin “inyarev mbi ken ato.”
^ Shin “iniav vev mbi cian a cia mbi.”
^ Shin “mou u kwer.”
^ Shin “ice i ivo.”
^ Gayô lu annyam ugen u shin mnger u a bee a bee ayu yô.
^ Shin “mou u kwer.”
^ Shin “ice i ivo.”
^ Zwa Heberu, “kwaghfan u ken ishima.”
^ Shin “mou u kwer.”
