Ekesodu 3:1-22
3 Tsô Mose gba kuran ilev mbi ter na kem Yetero,+ pristi u Midian. Er lu yemen a ilev mbira ken taaikyôngo, vegher u shin ityôtar yô, a va nyôr hen uwo u Aôndo u mimi la, ka Horebi je la.+
2 Maa ortyom u Yehova va ande hen a na ken nomborusu, ken atô u ageva.+ Er lu kenger yô, a nenge ageva la lu yeghen usu kpa gema lu hian ga.
3 Nahan Mose kaa ér: “De m za m za nenge kwagh u kpilighyol ne, m za nenge er i hii ve ageva la a lu hian ga la.”
4 Zum u Yehova nenge er a ze sha u za nengen yô, Aôndo yila un ken ageva la ér: “Mose! Mose!” A gema a kaa ér: “Mo ne.”
5 Maa a kaa ér: “De kporom ikyua ga. Tsua akôv shin angahar a ou kera, sha ci u ijiir i u til her ne ka icighanjiir.”
6 Shi a kaa ér: “Mo m ngu Aôndo u teru, Aôndo u Aberaham+ man Aôndo u Isaka+ man Aôndo u Yakob.”+ Maa Mose yer ishigh nagh, sha ci u lu cian u kenger sha Aôndo u mimi la.
7 Yehova shi kaa ér: “M nenge dedoo er ior av ve lu yan ican ken Igipiti yô, shi m ungwa mliam ma ve lu vaan sha kwagh u mba ve lu kighir ve a tom la; m fa ican i ve lu yan la dedoo.+
8 Me sen me za yima ve sha ikyev i Mbaigipiti,+ me due a ve kera, me yem a ve ken tar u u doo shi u kehe yô, tar u u mgbough a atumba man iyough yô;+ ka tar u Mbakaanan man Mbahiti man Mbaamor man Mbaperishi man Mbahivi kua Mbayebushi ve tem ker la.+
9 Nenge! Mliam ma Mbaiserael ve lu vaan la ar a mo, shi m nenge gbenda u vihin tsung u Mbaigipiti ve lu kighir ve la kpaa.+
10 Yô, va m tindi u hen Farou, za due a ior av Mbaiserael ken Igipiti kera.”+
11 Kpa Mose kaa a Aôndo u mimi la ér: “Mo m ngu nyi je ve me za hen Farou me za due a Mbaiserael ken Igipiti kera?”
12 Nahan a kaa ér: “Me lu a we,+ man ka ikyav i ia tese u ér ka mo m tindi u je ne: Zum u u due a ior mbara ken Igipiti yô, ne va civir Aôndo u mimi hen uwo ne.”+
13 Kpa Mose gema pine Aôndo u mimi la ér: “Aluer m za hen Mbaiserael m za kaa a ve mer, ‘Aôndo u uter enev tindim her a ven,’ man ve pinem ér, ‘Iti na ér ana?’+ yô, m kaa a ve mer nyi?”
14 Nahan Aôndo kaa a Mose ér: “Me Hingir Kwagh u M Tsough* u Hingir La.”*+ Shi a kaa ér: “Ka kwagh u u za ôr a Mbaiserael je ne, ‘Me Hingir tindim her a ven.’”+
15 Maa Aôndo shi ôr a Mose ér:
“Ka kwagh u u za ôr a Mbaiserael je ne, ‘Yehova Aôndo u uter enev, Aôndo u Aberaham+ man Aôndo u Isaka+ man Aôndo u Yakob+ tindim her a ven.’ Ka iti yam gbem sha won je ne,+ man kape a umbur mo sha ikyov ikyov kpaa je ne.
16 Yô za, za kohol mbatamen mba Iserael imôngo, kaa a ve wer, ‘Yehova Aôndo u uter enev ande her a mo, Aôndo u Aberaham man Isaka man Yakob, a kaa ér: “M fa kwagh wen vindi vindi,+ shi m nenge kwagh u i eren a ven ken Igipiti la kpaa.
17 Nahan m ngu kaan mer, me due a ven ken ican i ne lu yan+ sha ikyev i Mbaigipiti ne kera, me yem a ven ken tar u Mbakaanan man Mbahiti man Mbaamor+ man Mbaperishi man Mbahivi kua Mbayebushi,+ tar u u mgbough a atumba man iyough la.”’+
18 “Vea ungwa imo you keng je,+ nahan we vea mbatamen mba Iserael ne za hen tor u Igipiti, ne za kaa a na ner: ‘Yehova, Aôndo u Mbaheberu+ lam a vese. Nahan wea lumun yô, de se za zende u ayange atar ken taaikyôngo, se za na Yehova Aôndo wase nagh.’+
19 Kpa mo iyol yam m fa dedoo er tor u Igipiti una na ne ian i zan ga yô, saa a lu sha uwegh ku ageegh.+
20 Nahan a gba u me naregh uwegh me tsaha Igipiti sha akaa a kpilighyol a me er ker la, ka hen shighe la man una na ne ian i duen ye.+
21 Shi me na a doo Mbaigipiti a ior mban, nahan zum u ne duen yô, ne due ave ave ga cii.+
22 Hanma kwase nana̱ sôn or u wan ndor a nan kua kwase u nan tse hen ya u nan la akaa a sha azurufa man a sha zanaria kua akondo. Wuha nen ônov enev mba nomso man mba kasev iyol a mi; ngohol nen Mbaigipiti akaa cica.”*+
Ngeren mba shin kpe
^ Shin “Me Lu Kwagh u Me Lu La.” Nenge Ngeren u Seer u A4 la.
^ Shin “M Soo.”
^ Shin “ya nen Mbaigipiti ishar.”
