Ekesodu 10:1-29
10 Maa Yehova kaa a Mose ér: “Za hen Farou, gadia m de mer ishima na kua ishima i mbatomov nav i cighir,*+ sha er me er uivande av sha ashe a na yô,+
2 man sha er ne va pase ônov enev kua ônov mba ônov enev, uivande mba yange m er ken Igipiti man er m tsaha ve tsung yô;+ nahan ne fa wang er mo m lu Yehova yô.”
3 Nahan Mose vea Aron ve za hen Farou ve za kaa a na ér: “Ka kwagh u Yehova, Aôndo u Mbaheberu, a kaa je ne, ‘Ka hanma shighe jim man u de u taver mo ityougho?+ De ior av ve yem ve za civir mo.
4 Aluer u zer vendan wer ior av ve de yemen ga yô, kper me haa ikyomon hen tar wou.
5 Ikyomon kira kia cir hen inya je yô, a kera fatyô u nengen a inya ga; kia ya kwagh u awombo a vihi a shi ne her la, kia ya hanma kon u u mende ne ken akôngo cii.+
6 Shi kia cir ken ayou a ou man ayou a mbatomov ou cii, kua ayou a Igipiti cica cii, sha gbenda u uter ou man uter mba uter ou nenge a mi ga yô, hii shighe u ve lu ken tar ne la zan zan nyian.’”+ Tsô a gema ijime, a due hen Farou kera.
7 Maa mbatomov mba Farou kaa a na ér: “Ka hanma shighe jim or ne una de u van se a haghelaa?* De ior mban ve yem ve za civir Yehova Aôndo ve. U ngu a nenge er Igipiti a saa ishe gaa?”
8 Nahan i hide i yila Mose man Aron ve va hen Farou, a kaa a ve ér: “Yem za civir nen Yehova Aôndo wen. Kpa ka an man an ve lu zana?”
9 Maa Mose kaa ér: “Se yem a agumaior a ase man ior asev mba been iyol man ônov asev mba nomso man ônov asev mba kasev man iyôngo yase kua ibua yase kpaa,+ sha ci u se mba za eren Yehova iniongo.”+
10 A kaa a ve ér: “Aluer mo nahan m na ne ian mer yem nen vea ônov enev imôngo yô, Yehova ngu a ven di je!+ Ikyav tese wang ér ne wa ishima u eren iferkwagh.
11 Nahan m venda! Ka ne nomso tseegh ne za civir Yehova ye, sha ci u ka kwagh u yange ne kaa ner ne soo u eren je la.” Maa i zenda ve sha ishigh ki Farou kera.
12 Yehova maa kaa a Mose ér: “Naregh uwegh ough sha tar u Igipiti, sha er ikyomon kia due kia va haa ken tar u Igipiti, kia ya hanma kwagh u a mende hen inya cii yô, hanma kwagh u awombo yange vihi mase shin la cii.”
13 Maa fese je Mose naregh gbough nagh sha tar u Igipiti, maa Yehova er ahumbe a sha ityoughkitaregh due gba va tan sha tar u Igipiti iyange la cii, kua tugh kaka. Sev mbu aven yô, ahumbe a sha ityoughkitaregh la va a ikyomon.
14 Ikyomon kira va ken tar u Igipiti cii, va cir hen haregh u Igipiti cica cii.+ Ki vihi tu kpen kpen;+ er i gba je ikyomon lu a ngee nahan ga, shi a tsa kpa kia kera ngee nahan ga.
15 Ki cir hen inya hanma ijiir ken tar la, nahan ki na tar la cii wa ime; ki vihi hanma imendenegh ki ken tar la, kua hanma ityamegh ki kon ki awombo yange vihi mase shin la cii. Ken tar u Igipiti cii kwagh u ndor môm kera shi sha kon shin sha imendenegh ga.
16 Nahan Farou yila Mose man Aron fese kaa a ve ér: “M er Yehova Aôndo wen kwaghbo, ne kpa m er ne kwaghbo.
17 Nahan nea lumun yô, ma ne mase den mo kwaghbo wam kwa ne tsô, zamber nen Yehova Aôndo wen, a kar a ican i vihin tsung ne her a mo kera.”
18 Tsô a* due hen ishigh ki Farou kera, a za zamber a Yehova.+
19 Maa Yehova er ahumbe la kôr gema, a hingir ahumbe a taver a shin ityôtar, a kura ikyomon kira a yem a mi a za haa shin Zegemnger u Nyian. Ikyomon i môm kpa kera shi ken tar u Igipiti ga.
20 Nahan cii kpa, Yehova de ér ishima i Farou i cighir,+ a na Mbaiserael ian ér ve yem ga.
21 Yehova maa kaa a Mose ér: “Kende uwegh ough sha aôndo, sha er ime ia wa ken tar u Igipiti yô, angôghime a wa je er or a fatyô u benden a mi nahan.”
22 Fese je maa Mose kende uwegh nagh sha aôndo, maa zege angôghime wa ken tar u Igipiti cii ayange atar.+
23 Ve fatyô u nengen a ayol a ve ga, shi or ve môm fatyô u moughon ape nan tema la ga zan zan ayange atar; kpa Mbaiserael yô iwanger lu sha ajiir a ve lu la cii.+
24 Farou maa yila Mose kaa a na ér: “Yem za civir nen Yehova.+ I lu iyôngo yen man ibua yen tseegh undu nen her ye. Ônov enev je kpa ve yem vea ven.”
25 Kpa Mose kaa ér: “We iyol you kpa a gba u u na se* ilev mbi za nan iniav mbi sôngon man iniav mbi nanden, se za na Yehova Aôndo wase nagh a mi.+
26 Se mba zan a ilev yasev kpaa. Ilegh i môm* kpa a undu ken ijime ga, sha ci u ka ker se za dugh mbigenev se civir Yehova Aôndo wase a mi ye, man se fa kwagh u se za civir Yehova a mi ga, saa se za nyôr her ve se fa ye.”
27 Nahan Yehova de ishima i Farou cighir, a lumun u den ér ve yem ga.+
28 Farou kaa a na ér: “Karem sha ishi kera! Mayange de kera keren wer u nenge a ishigh yagh ga, sha ci u iyange i u nenge a ishigh yagh la, u kpe.”
29 Tsô Mose kaa ér: “I lu er u kaa nahan, me kera ker u nengen a ishigh you ga.”
