Ekesodu 5:1-23
5 Tsô Mose man Aron za nyôr hen Farou, ve kaa a na ér: “Yehova, Aôndo u Iserael ngu kaan ér, ‘De ior av ve za ve za erem iniongo ken taaikyôngo.’”
2 Kpa Farou pine ér: “Ka an nan lu Yehova+ ve me ungwa imo na, me de Mbaiserael vea yeme?+ M fa Yehova ga kuaa, bee kera yô, m ngu den Mbaiserael mer ve yem ga.”+
3 Kpa ve kaa ér: “Aôndo u Mbaheberu lam a vese. Nahan wea lumun yô, se soo u zan zende u ayange atar ken taaikyôngo, za nan Yehova Aôndo wase nagh,+ gayô una tsaha se sha bouange, shin una tim se sha sanker.”
4 Tor u Igipiti gema kaa a ve ér: “We Mose man Aron, er nan ne ne ior ve de u eren tomo? Hide za er nen tom wen!”+
5 Shi Farou kaa ér: “Nenge ior mban ve ngee ken tar ne sha wono, man ne mba nan ner ve de tom ve.”
6 Sha iyange la je, Farou kaa a mbakighir ior a tom man mba nengen sha mbatomov ér:
7 “Hii hegen je, de kera shi naan nen ior mban toho u tan akam a mi ga.+ De ve zaan ve za keren toho ayol a ve.
8 Kpa kighir nen ve her, ve taan akam sha ingyegh ki yange ve vanden tan la. De panden nen ve ingyegh kira ga, sha ci u mba haan iyol inya.* Ka nahan ve ve lu kaan ér, ‘Se soo u yemen, se soo u za nan Aôndo wase nagh’ ye!
9 Seer nen ve a seer tom, ve lu a tom kpishi sha er vea kera kegh ato a mbaaie ga yô.”
10 Tsô mbakighir ior a tom+ man mba nengen sha mbatomov mbara due za kaa a ior ér: “Ka kwagh u Farou a ôr je ne, ‘M kera ngu nan ne toho ga.
11 Due za ker nen toho ayol a en, ape ne za ve ne zua a mi cii, kpa tom wen yô a pande u mayange ga.’”
12 Maa ior mban gba zenden hanma ijiir ken tar u Igipiti keren adenga, sha u a hingir ve toho u tan akam a mi.
13 Shi mbakighir ior a tom mbara gba torough a ve kaan ér: “Gba u hanma iyange yô, hanma wen nana been tom u nan, vough er shighe u i naan ne toho la nahan.”
14 Shi i gbidye mba nengen sha mbatomov mba ken Iserael, mba mbakighir ior a tom mba Farou tsua ver ér ve nengen sha a ve la.+ Ve pine ve ér: “Er nan ve ne lu tan akam sha ingyegh ki yange ne vanden tan la ga? Nyen kpa ne fatyô ga, nyian kpa ga.”
15 Tsô mba ken Iserael mba ve nengen sha mbatomov la, za hen Farou gba za vaan iyol a na kaan ér: “Er nan ve u lu eren a ikpan you nahana?
16 Mba kera nan ikpan you toho ga, man mba kaan a vese her di tsô ér, ‘Ta nen akam!’ Shi mba gbidyen ikpan you, man gema ka ibo i ior ou.”
17 Kpa a kaa ér: “Ne mba haan iyol inya,* ne mba haan iyol inya!*+ Ka nahan ve ne lu kaan ner, ‘Se soo u yemen, se soo u za nan Yehova nagh’ ye.+
18 Nahan yem za er nen tom! Mba kera nan ne toho ga, kpa shi ne za hemen u tan akam sha ingyegh ki i gbe u ne taan la.”
19 Nahan mba ken Iserael mba nengen sha mbatomov mbara kav er kwagh a tser ve tsung yô, sha ci u i kaa a ve ér: “De panden nen ingyegh ki akam a ne te ayange ayange la ga.”
20 Tsô mba dugh yô, ve kohol Mose vea Aron tile ken won lu keghen ve ér ve due hen Farou.
21 Maa fese je ve kaa a ve ér: “Yehova a nenge sha kwagh wen, a ôr ne ijir, sha ci u ne na Farou man mbatomov nav kôr se ihyom,* shi ne wa ve sanker ken uwe ner ve wua se.”+
22 Tsô Mose gema hen Yehova, kaa ér: “Yehova, er nan u er ior mban ican nahana? Er nan u tindimi?
23 Hii shighe u yange m za hen Farou mer me za lam a na ken iti you la je,+ a er ior mban ican hemba ave a tse,+ man u kera yima ior ou je ga.”+
