Ekesodu 25:1-40
25 Yehova maa kaa a Mose ér:
2 “Kaa ior i Iserael wer ve kohol iyua sha ci wam; hanma or u ishima i mgbegha nan yô, nana erem iyua.+
3 Ka iyua i ne ngohol her a ve je ne: zanaria+ man azurufa+ man togula,+
4 man mou u buluu-buluu* man mou u nyian dindee kua mou u nyian bong, man ikyondo i dedoo kua aive a ivo,*
5 man akôv a anomaiyôngo a i nyian a yô, man akôv a ayu* man kon u akashia,*+
6 man mkurem ma haan ken amenger+ man balsam u eren mkurem ma tseghan kwagh+ kua insensi a mi,+
7 kua awen a oniki man awen agen a varen sha efodi+ kua sha ikpa i sha vanger.+
8 Ve erem icighanjiir, nahan me tema* hen atô ve.+
9 Er nen tabernakel la kua akaa a veren ker la vough er m lu tesen we nahan.+
10 “Ve̱ er areki sha kon u akashia, a lihe aseva ahar man tiôn* igbanger na i lu ishiva i môm man tiôn shi ityaven na kpa i lu ishiva i môm man tiôn.+
11 Maa u cir un zanaria u wang iyol.+ Cir un ken atô man ken won cii, shi er ato a na la sha zanaria ningir tser.+
12 Er ahye anyiin sha zanaria, var a ikyua a angahar a na a anyiin la, ahye ahar vegher ne, ahye ahar vegher la.
13 Gba igbough sha kon u akashia, cir mbi zanaria iyol.+
14 Shindi igbough mbira ken ahye a a lu ken ambusu a Areki la, sha er a tôôn Areki la a mi yô.
15 Igbough mbira mbi luun ken ahye a Areki la; i de tsuan mbi sha ga.+
16 U gema Shiada u me na u la u wa shin Areki la.+
17 “Er kuur sha zanaria u wang, ilihen na i lu aseva ahar man tiôn, igbanger na i lu ishiva i môm man tiôn.+
18 Er ucerubi uhar sha zanaria; i var ve a var,* ve lu sha akighir a ahar a kuur la.+
19 Er ucerubi mbara sha akighir a ahar la, cerubi u môm sha ikighir i kuur ingin, cerubi ugen sha ikighir ingila.
20 Ucerubi mbara ve samber akper a ve a ahar la a kôndo sha, akper a ve la a gba mure sha kuur la,+ hanmô a ver ishigh ken ugen. Ucerubi mbara ve na ishigh hen kuur la.
21 U gema kuur la u cir+ sha Areki la, shi u gema Shiada u me na u la u wa shin Areki shon.
22 Me vaan hen a we heregh me va lamen a we sha kuur la.+ Ka hen atô u ucerubi mba uhar mba ve lu sha areki u Shiada la, me va ôron we akaa a m soo mer ôr Mbaiserael la cii ye.
23 “Shi er tebul+ sha kon u akashia, ilihen na i lu aseva ahar, igbanger na i lu ishiva i môm, ityaven na di i lu ishiva i môm man tiôn.+
24 Cir un zanaria u wang iyol, kase gir sha zanaria sha akur a na ningir tser.
25 Er kpande u gbanger er igbangerwe nahan,* var ken ambusu a na i ningir i tser, er ato a na la sha zanaria ningir tser.
26 Er ahye anyiin sha zanaria, wa ahye la sha azongo a anyiin, sha ajiir a i we angahar anyiin la vough vough.
27 Ahye la a lu ikyua ikyua a kpande la, a lu ijiir i shindin igbough tôôn tebul la.
28 Gba igbough mbira sha kon u akashia, cir mbi zanaria iyol, a tôôn tebul la a mi.
29 “Shi er agbande man ukôôpu man ujôôgu man atasa a haan iniav mbi kwaghman, a veren sha tebul shon. Er ve sha zanaria u wang.+
30 U veren beredi u sha ishi sha tebul la sha ishigh yagh hanma shighe.+
31 “Er daarimenger+ sha zanaria u wang. I var a var daarimenger la.* Ityô na man itine na man agbaa a na kua ukôôpu nav man adôôr a na kua uikparen nav cii, ve lu jimin, ijoron i de lu ga.+
32 Daarimenger la a lu a agbaa ataratar, agbaa atar vegher môm, agbaa atar vegher ugen.
33 Ukôôpu utar mba lun er uikparen mba amondi nahan, ve lu sha agbaa a vegher môm la, idyôôr i lu, ikparen i lu, zan zan i yem, shi ukôôpu utar mba lun er uikparen mba amondi nahan, ve lu sha agbaa a atar agen la, idyôôr i lu, ikparen i lu, zan zan i yem. Kape itine i daarimenger la ia ta agbaa ataratar je la.
34 Itine i daarimenger la i lu a ukôôpu unyiin mba lun er uikparen mba amondi nahan, idyôôr i lu, ikparen i lu, maa kôôpu a lu, zan zan i yem.
35 Idyôôr i lu shin ityô i agbaa ahar a hiihii a a due sha itine la, shi idyôôr igen i lu shin ityô i agbaa ahar a a dondo la, idyôôr igen shi i lu shin ityô i agbaa ahar a masetyô la, i lu nahan sha agbaa a ataratar a a due sha itine la cii.
36 Adôôr la man agbaa la man daarimenger la jimin cii a lu jimin, ijoron i de lu ga, i var un a var* sha zanaria u wang.+
37 Er un amenger ataankarahar; zum u i tsar amenger la yô, aa ta iwanger hen ijiir i i lu hen ishigh nagh la.+
38 Ugbegba nav* man agbande a na a usu cii, i er sha zanaria u wang.+
39 I er un kua ikyav mbin cii, sha zanaria u wang u kuman talenti môm.*
40 Ver ishima er akaa ne vough er i tese u sha uwo nahan.+
Ngeren mba shin kpe
^ Shin “mou u kwer.”
^ Shin “ice i ivo.”
^ Gayô lu annyam ugen u shin mnger u a bee a bee ayu yô.
^ Akashia ka kon u lun a asaa. Ngu kposo a kashia u ior ve fe un nyian ne.
^ Shin “me tim tabernakel.”
^ Ishiva i môm yange i lihe i kuma usentimita 44.5 (uinci 17.5). Nenge Ngeren u Seer u B14 la.
^ Ka u eren ve sha hama man kanji je la.
^ Gbanger kuma er usentimita 7.4 nahan (uinci 2.9). Nenge Ngeren u Seer u B14 la.
^ Ka u eren un sha hama man kanji je la.
^ Ka u eren un sha hama man kanji je la.
^ Shin “akambe a na a dughun usu a mi.”
^ Talenti môm yange a yuha i kuma ukilogeram 34.2. Nenge Ngeren u Seer u B14 la.
